جاقىندا اتىراۋدا بولعان بۇل جانتۇرشىگەرلىك جول اپاتى تۋرالى حابار ەلگە تەز تارادى. ءبۇتىن ءبىر اۋلەتتىڭ ءۇمىت كۇتىپ وتىرعان جالعىز ۇلىنىڭ وسىلايشا اجال قۇشقانى, ارينە وكىنىشتى. تاعى دا وكىنىشتىسى, مۇنداي مىسالدار از ەمەس. جىل باسىنان بەرى جاياۋ جۇرگىنشىلەردى جولدان وتكىزبەگەندەرى ءۇشىن ايماقتا 1962 اۆتوكولىك جۇرگىزۋشىسى اكىمشىلىك جاۋاپكەرشىلىككە تارتىلعان.
وبلىستىق پوليتسيا دەپارتامەنتىنىڭ باسشىسى بەرىك امانگەلدىنىڭ ايتۋىنشا, وتكەن جىلدىڭ سايكەس كەزەڭىمەن سالىستىرعاندا جول-كولىك وقيعالارىنىڭ سانى 31,7%-عا ارتقان, سونداي-اق جول-كولىك وقيعالارىنان زارداپ شەككەندەر كورسەتكىشى 49,5%-عا ءوسىپ وتىر. دەپارتامەنت دەرەگىندە اپات سالدارىنان كوز جۇمعاندار سانى 7,8%-عا ازايعانى كورسەتىلگەن. دەگەنمەن, اسىرەسە قالاارالىق جانە رەسپۋبليكالىق ماڭىزى بار جولداردا كەلەڭسىز جايتتار ءالى دە كەزدەسەدى. وسى ماسەلە كوتەرىلگەن سەلەكتورلىق ماجىلىستە وبلىستىڭ باس پوليتسەيى جول-كولىك وقيعالارىنا جۇرگىزۋشىنىڭ جىلدامدىقتى ارتتىرۋى, قارسى جولاققا شىعۋى جانە اۋەسقوي اۆتوموبيلشىلەردىڭ بىلىكتىلىكتەرىنىڭ تومەندىگى سەبەپ بولىپ وتىرعانىن ايتتى.
وڭىردە ءتۇرلى ساناتتاعى جۇرگىزۋشىلەردى دايىندايتىن 26 اۆتومەكتەپ جۇمىس ىستەيدى. «ازاماتتارعا ارنالعان ۇكىمەت» مەملەكەتتىك كورپوراتسياسى فيليالىنىڭ ديرەكتورى مۇسا حايرۋلليەۆ اۆتومەكتەپتەردىڭ ءبىلىم ساپاسى كوڭىل كونشىتپەيتىنىن جاسىرمادى. «مىسالى, 2018 جىلى 9671 جۇرگىزۋشى كۋالىگى بەرىلسە, وتكەن جىلدىڭ جەلتوقسان ايىندا مامانداندىرىلعان حقكو اشىلعالى بەرى اۆتومەكتەپتەردىڭ تۇلەكتەرىنەن 4419 قۇجات قابىلداندى. سونىڭ ىشىنەن 419 تاپسىرۋشى عانا تەوريادان, 93-ءى تاجىريبەلىك داعدى سىناقتارىنان ءوتتى. بۇل جۇرگىزۋشىلەردى دايىنداۋ ساپاسىنىڭ تومەندىگىن كورسەتەدى», دەدى ول.
وبلىس ورتالىعىندا قوعامدىق كولىكتەر 30 باعىتقا قاتىنايدى. بيىل اۆتوبۋس پاركى جاڭارتىلدى. سوڭعى كەزدەرى سول جاڭا اۆتوبۋستار دا ءجيى جول-كولىك وقيعالارىنا ۇشىراپ ءجۇر. قىركۇيەك ايىنىڭ سوڭعى كۇنىندە اۆتوبۋس پەن جۇك كولىگى سوقتىعىسىپ, 11 جولاۋشى زارداپ شەكتى. وسى جايتتارعا توقتالعان وبلىس اكىمى نۇرلان نوعاەۆ: «اۆتوپاركتەردىڭ باسشىلارىنا اۆتوبۋس جۇرگىزۋشىلەرىن جۇمىسقا الماس بۇرىن باقىلاۋدى جانە ۇنەمى تەكسەرىپ وتىرۋدى تاپسىرامىن. بۇگىندە جولاۋشىلار ءبىزدىڭ اۆتوبۋستارىمىزعا وتىرىپ, باراتىن جەرلەرىنە قاۋىپسىز, امان جەتۋلەرىنە الاڭدايتىن كۇيگە جەتتى», دەپ اتاپ ءوتتى.
وڭىردە جىل باسىنان بەرى جىلدامدىق ءتارتىبىن ساقتاماعاندارعا 41 حاتتاما تولتىرىلعان. جول ءتارتىبىن بۇزعانداردى جەدەل انىقتاپ, كولىك اپاتتارىنىڭ الدىن الۋ ءۇشىن ناقتى شارالار اتقارىلىپ جاتقانىن دا ايتا كەتۋىمىز كەرەك. جاياۋ جۇرگىنشىلەر جولىنا پروجەكتورلار, جولدارعا – كامەرالار مەن جىلدامدىق ولشەۋىشتەر, جىلدامدىق باسەڭدەتكىش پەن باعدارشامدار ورناتىلدى. قالادا ورتالىق كوشەلەردى كەڭەيتۋ, وڭ جاقتى اينالما جولدار سالۋ, جاڭا جول بەلگىلەرىن ورناتۋ جۇمىستارى قارقىندى جۇرۋدە. ايتالىق, وبلىس ورتالىعىنداعى قۇلمانوۆ كوشەسىندە 3D فورماتىنداعى العاشقى جاياۋ جۇرگىنشىلەر جولى سالىندى. جازاتايىم وقيعالاردىڭ الدىن الۋ جانە ادامداردىڭ قاۋىپسىزدىگىن قامتاماسىز ەتۋگە باعىتتالعان بۇل شارا اتىراۋدا ءبىرىنشى رەت قولعا الىنىپ وتىر.
جالپى جىل باسىنان بەرى قالادا 315 جاڭا جول بەلگىلەرى ورناتىلىپ, جاياۋ جۇرگىنشىلەر جولى سوڭعى ۇلگىدەگى جارىقتاندىرعىشتارمەن جابدىقتالعان. مەكتەپتەر مەن بالاباقشالاردىڭ اينالاسىنا جارىقديودتى شامدار ورناتىلدى. سونىڭ وزىندە كۇرە جولداعى كەلەڭسىز وقيعالار ازايار ەمەس. جولدا ءجۇرۋ قاشان قاۋىپسىز بولادى دەگەن ساۋالعا جاۋاپ تابۋ دا قيىن بولىپ تۇر.
اتىراۋ
