ايماقتار • 20 قازان، 2019

ورالدا ەرەكشە باعدارشام ورناتىلدى

27 رەتكورسەتىلدى

بۇل باعدارشامنىڭ ەرەكشەلىگى سول - ادەتتەگى ەلەكتر ەنەرگياسىنا تاۋەلسىز. ياعني مەتالل اركادا ورناتىلعان LED-نۇكتەلى جارىقتاندىرۋ ديودتارى كۇننەن قۋات الادى. جانە باعدارشام نىسانىن جاياۋ جۇرگىنشىلەردىڭ وزدەرى رەتتەي الادى.

كوشە قيىلىسىنا كەلگەن جۇرگىنشى باعدارشام كەشەنىندەگى ارنايى تەتىكتى باسقاندا باعدارشامنىڭ جاسىل ءتۇسى 30 سەكۋندقا جانادى. وسى ۋاقىتتا جۇرگىنشىلەر جولدان وتە الادى. بۇعان قوسا قوسىمشا تەتىك ارقىلى پوليتسيا («102») نەمەسە «جەدەل جاردەم» («103») قىزمەتىنىڭ وپەراتورلارىمەن سويلەسۋگە، شاقىرتۋعا مۇمكىندىك بولادى. سونداي-اق نىساندا بەينەباقىلاۋ كامەرالارى ورناتىلعان.

مۇنداي «اقىلدى» باعدارشامدى ورال قالاسىنداعى باس داڭعىل مەن المازوۆ كوشەلەرىنىڭ قيىلىسىنا ءوز قاراجاتىنا ورناتقان - «زەنيتتەحسەرۆيس» جشس ەكەن. قوندىرعى جوباسىنىڭ اۆتورى – رەسەيلىك «نپف سپەكترون» جشس. كومپانيانىڭ كوممەرتسيالىق ديرەكتورى گارري ءباسساۆيننىڭ ايتۋىنشا، رەسەيدە مۇنداي باعدارشام نىساندارى سوڭعى ەكى-ءۇش جىلدان بەرى قويىلىپ جاتىر ەكەن. «قازاقستان بويىنشا ورال قالاسىندا تۇڭعىش رەت قويىلىپ تۇر» دەيدى گ.باسساۆين.

ورال قالاسى اكىمىنىڭ ورىنباسارى بەكجان توعجانوۆ بولاشاقتا وسىنداي باعدارشام كەشەندەرى قالانىڭ باسقا اۋماقتارىنا دا ورناتىلاتىنىن ايتادى. ول جول قوزعالىسى قاۋىپسىزدىگىن قامتاماسىز ەتۋدە تىڭ باستاما باستاعان «زەنيت تەح سەرۆيس» جشس باسشىسى كوشەرباي ايعوجا ۇلىنا قالا اكىمىنىڭ العىس حاتىن تابىس ەتتى.

ورالدىقتار ءۇشىن تىڭ دا توسىن باعدارشامدى قالاي قولدانۋ كەرەكتىگىن العاشقى كۇندەرى «گاۋحار جولى» قوعامدىق بىرلەستىگىنىڭ ەرىكتىلەرى جۇرگىنشىلەرگە كورسەتىپ، قولعابىس ەتتى.

بقو پوليتسيا دەپارتامەنتى ىشكى جانە سىرتقى كوممۋنيكاتسيالار ءبولىمىنىڭ قىزمەتكەرى اسىلاي عۇباشەۆانىڭ ايتۋىنشا، باتىس قازاقستان وبلىسىندا بۇگىندە 93 باعدارشام نىسانى بار ەكەن. ونىڭ 13-ءى – ءبورلى اۋدانىنىڭ ورتالىعى اقساي قالاسىندا، تاسقالا اۋىلىندا – 2، تەرەكتى اۋدانىنا قاراستى پودستەپنىي جانە فەدوروۆ اۋىلدارىندا – 2، اقجايىق اۋدانىنىڭ ورتالىعى چاپاەۆ اۋىلىندا – 2، ال 74 باعدارشام ورال قالاسىندا ورنالاسقان. سونىڭ ىشىندە 41 نىساندا ساناق تايمەرى بار، تاعى 27 باعدارشامعا ورناتۋ كوزدەلۋدە.

-جول-كولىك وقيعالارىنىڭ الدىن الۋ ماقساتىندا جول ۇيىمدارىمەن بىرلەسە وتىرىپ بيىل ورال قالاسىنىڭ ەڭ بەلسەندى 11قيىلىسىنا باعدارشام ورناتىلدى، - دەيدى اسىلاي عۇباشەۆا.

بقو پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى پوليتسيا پولكوۆنيگى جانبولات ءجانشيننىڭ ايتۋىنشا، جىل باسىنان بەرى جاياۋ جۇرگىنشىلەردىڭ قاتىسۋىمەن 82 جول-كولىك وقيعاسى بولىپ، 26 ادام كوز جۇمعان، 67-ءسى ءتۇرلى دەنە جاراقاتىن العان.

سوڭعى جاڭالىقتار

كۇلكى كەرۋەنى № 16

رۋحانيات • بۇگىن، 12:04

اقىنعا ارنالعان كۇن

رۋحانيات • بۇگىن، 07:46

قالانى دامىتۋ قۇجاتى دايىن

ايماقتار • بۇگىن، 07:43

باسپانامەن قامتيتىن باستى قۇجات

باعدارلامالار • بۇگىن، 07:23

ەر ەدىگە جانە ەلدىك مۇددە

رۋحانيات • بۇگىن، 07:20

بولمىسى ءبۇتىن باعاەۆ

رۋحانيات • بۇگىن، 07:19

ۇقساس جاڭالىقتار