فورۋمنىڭ اشىلۋىمەن قۇتتىقتاۋ العىسوزىندە سىرتقى ىستەر ءمينيسترى مۇحتار تىلەۋبەردى وسىمەن 12-رەت ءوتىپ جاتقان «ورتالىق ازيا – وڭتۇستىك كورەيا» فورۋمىنىڭ ءرولىن نىعايتۋعا قازاقستاننىڭ كوپ كۇش سالىپ جاتقانىن اتاپ ءوتتى. «ورتالىق ازيا ەلدەرىنىڭ كورەيا رەسپۋبليكاسىمەن ىنتىماقتاستىعىن دامىتۋداعى ايرىقشا قارىم-قاتىناسىمىزعا قازاقستاننىڭ فورۋمعا قاتىسۋ دەڭگەيىن سىرتقى ىستەر مينيسترلەرىنە دەيىن كوتەرۋگە باستاما جاساۋى دالەل بولا الادى. ءبىزدىڭ ويىمىزشا, «ورتالىق ازيا – وڭتۇستىك كورەيا» فورۋمىنىڭ الاڭى كورەيا رەسپۋبليكاسىنىڭ ورتالىق ازيا ەلدەرىمەن سەرىكتەستىگىن نىعايتۋدا ءتيىمدى تەتىك قىزمەتىن اتقارماق», دەدى ءوز سوزىندە مۇحتار تىلەۋبەردى.
سىرتقى ىستەر ءمينيسترى مۇحتار تىلەۋبەردى ورتالىق ازيا ەلدەرىنىڭ كوپعاسىرلىق ورتاق تاريحى مەن مادەنيەتى مەملەكەتتەر اراسىنداعى ىنتىماقتاستىق پەن دوستىقتىڭ نەگىزى سانالاتىنىن ەسكە سالدى. سونىمەن بىرگە ورتالىق ازيانىڭ قارقىندى ءوسىپ جاتقان ايماققا اينالعانىن, بۇگىندە ستراتەگيالىق ماڭىزعا, جوعارى ادامي جانە ەكونوميكالىق الەۋەتكە يە ەكەنىن ايتىپ ءوتتى. «قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن قازاقستان پرەزيدەنتى قاسىم-جومارت توقاەۆ وڭىردەگى ەلدەرمەن باۋىرلاستىق قارىم-قاتىناستى نىعايتۋعا ايرىقشا نازار اۋدارادى. ءبىزدىڭ مەملەكەتتەرىمىزدىڭ كوشباسشىلارىنىڭ تۇراقتى كەزدەسۋلەرى جاقسى داستۇرگە اينالعان. سەنىم مەن سەرىكتەستىكتىڭ وسى ءبىر جوعارى دەڭگەيىن ەرەكشە باعالايمىز», دەدى م.تىلەۋبەردى. مينيستر وسىنداي فورۋمداردىڭ ناتيجەسىندە مەملەكەتتەر باسشىلارى بەسجاقتى ارىپتەستىك نەگىزىندە ەلدەر اراسىندا ۆيزاسىز رەجىم ورناتىپ, سەرىكتەستىكتىڭ جارقىن بولاشاعىنا باستايتىن جوسپارلار قۇرىلعانىن ەسكە سالدى. وعان قوسا, قازاقستاننىڭ كورەي تۇبەگىندەگى «بەيبىت پروتسەستى» جانە سەۋلدىڭ كورەيارالىق قاتىناستاردى دامىتۋ ءارى وڭىردەگى شيەلەنىستى تومەندەتۋ ساياساتىن قولدايتىنىن جەتكىزدى. ەلىمىز ءۇشىن يادرولىق قارۋدان ازات بەيبىتشىلىككە قول جەتكىزۋ باستى باسىمدىق سانالاتىندىعىن باسا ايتتى. «قازىرگى الەمدە قارۋدىڭ وسىناۋ تۇرىنە يەلىك ەتۋ ۇستەمدىكتىڭ كورسەتكىشى بولىپ سانالمايدى. قايتا جاھاندىق قاۋىپسىزدىككە قاتەر ءتوندىرىپ, حالىقارالىق قوعامداستىقپەن ىنتىماقتاستىققا كەدەرگى تۋدىرادى. وسىعان وراي ورتالىق ازيادا يادرولىق قارۋدان ازات بىرەگەي ايماقتىڭ قۇرىلۋى كورەي تۇبەگى ءوڭىرى ءۇشىن دە ۇلگى بولا الادى», دەدى مينيستر.
جيىن سوڭىندا باق وكىلدەرىنە سۇحبات بەرگەن سىرتقى ىستەر مينيسترلىگىنىڭ وكىلى ايبەك سمادياروۆ 20 قىركۇيەك كۇنى وڭتۇستىك كورەيا استاناسى سەۋلدە جەتى جاسار بالانى قاعىپ كەتكەن 20 جاستاعى قازاقستاندىقتىڭ تەرگەۋ يزولياتورىندا ەكەنىن مالىمدەدى. ونىڭ ايتۋىنشا, قازىر ناقتى شەشىم ايتۋعا ەرتە. وتانداسىمىزعا قورعاۋشىنى كورەيا تاراپى ۇسىنباق. قازاقستان كونسۋلىنىڭ ايىپتالۋشىمەن جانە تەرگەۋشىمەن كەزدەسەتىنى بەلگىلى بولدى. اقپاراتقا سۇيەنسەك, ايىپتالۋشى كورەيادا زاڭسىز جۇرگەن. سونىمەن بىرگە ايبەك سمادياروۆ بۇگىندە بالانىڭ جاعدايى قالىپتى ەكەنىن حابارلادى.
