كاسىپوداقتار ورتالىعىنىڭ ءتورايىمى ايگۇل ەسەكەنوۆانىڭ ايتۋىنشا, وبلىس كولەمىندە كوپتەگەن قىزمەتكەردى بىرىكتىرگەن كاسىپوداقتار اياسى جىلدان-جىلعا كەڭەيىپ كەلەدى. سوڭعى ءبىر جىلدا «SENIM» دەنساۋلىق ساقتاۋ جۇيەسى قىزمەتكەرلەرىنىڭ سالالىق كاسىپتىك وداعى جانە «ىنتىماق» ورتا جانە كىشى بيزنەس جۇمىسكەرلەرىنىڭ كاسىپوداعى قۇرىلعان. سونىمەن قاتار 59 باستاۋىش كاسىپوداق ۇيىمى جاڭادان قۇرىلىپ, كاسىپوداق مۇشەلەرىنىڭ سانى 10755-كە وسكەن.
– ءوڭىر بويىنشا 75 مىڭعا جۋىق ادامدى بىرىكتىرگەن 15 سالالىق جانە جەرگىلىكتى كاسىپوداق ۇيىمدارىنىڭ قۇرامىندا مىڭعا جۋىق باستاۋىش كاسىپوداق ۇيىمى تۇراقتى جۇمىس ىستەيدى. وڭىردەگى وبلىس اكىمدىگى, قىزمەتكەرلەردىڭ وبلىستىق بىرلەستىكتەرى جانە جۇمىس بەرۋشىلەر بىرلەستىكتەرى اراسىندا 2018-2020 جىلدارعا ارنالعان ايماقتىق ۇشجاقتى كەلىسىم جاسالىپ, ەڭبەك ينسپەكتسياسىمەن بىرگە تىعىز بايلانىستامىز. كاسىپوداق نازار اۋداراتىن ماسەلەنىڭ ءبىرى – ۇجىمدىق شارتتار. قازىرگى تاڭدا وڭىردە باستاۋىش كاسىپوداق ۇيىمدارى بار ەڭبەك ۇجىمدارىنىڭ بارلىعىندا ۇجىمدىق شارت جاسالدى. ادەتتە جالاقىنى كەشىكتىرۋ, قىزمەتكەرلەردىڭ قۇقىعىن بۇزۋ, ولاردىڭ ارىز-شاعىمدارىن ەلەمەۋ سياقتى الەۋمەتتىك شيەلەنىستەر كاسىپوداق ۇيىمدارى جوق ەڭبەك ۇجىمدارىندا تۋىندايدى, – دەدى ءوز سوزىندە كاسىپوداقتار ورتالىعىنىڭ ءتورايىمى.
باتىس قازاقستان وبلىسى بويىنشا ەڭبەك ينسپەكتسياسىنىڭ مالىمەتىنە سۇيەنسەك, قازىرگى تاڭدا وڭىردە بارلىق تىركەلگەن ۇجىمدىق شارتتىڭ سانى – 1545-كە جەتكەن. بۇل قىزمەت ەتىپ جاتقان شارۋاشىلىق نىساندارىنىڭ 25%-ى دەگەن ءسوز. ۇجىمدىق شارتپەن قامتىلعان ادام سانى 130 مىڭ ادامنان اسادى نەمەسە بارلىق قىزمەتكەرلەردىڭ 55,6%-ىن قۇرايدى. ويتكەنى وبلىستىق ستاتيستيكا دەپارتامەنتىنىڭ مالىمەتى بويىنشا, وڭىردە مەكەمەلەر مەن كاسىپورىندارداعى قىزمەتكەرلەر سانى – 234 442. دەمەك, بولاشاقتا كاسىپوداق ۇيىمدارىنىڭ جۇمىسىن ودان ءارى جانداندىرۋ كەرەك.
كاسىپوداق ەرەكشە كوڭىل ءبولىپ وتىرعان ماسەلەنىڭ ءبىرى – جۇمىسشىلاردىڭ جالاقىسى. مۇشەلىك ۇيىمدار جەرگىلىكتى اتقارۋ ورگاندارىمەن بىرگە جالاقىسى تومەن جۇمىسشىلاردىڭ ەڭبەكاقىسىن جوعارىلاتۋ بويىنشا ءىرى كومپانيالارمەن جۇمىس جۇرگىزۋدە. ناتيجەسىندە 2019 جىلدىڭ باسىنان 1 ماۋسىمىنا دەيىن وڭىردەگى 1491 جۇمىس بەرۋشى 36 565 جۇمىسشىنىڭ ەڭبەكاقىسىن كوتەردى. ءسويتىپ, 64 ءىرى, 122 ورتا جانە 1305 كىشى كاسىپكەرلىك نىساندارىندا جالاقىسى تومەن جۇمىسشىلاردىڭ ورتاشا جالاقىسى ورتا ەسەپپەن 20%-عا ۇلعايدى.
ارينە, ەڭبەك قاۋىپسىزدىگى ماسەلەسى دە وتە ماڭىزدى تاقىرىپ. قازاقستان كاسىپوداقتار فەدەراتسياسىنىڭ كەزەكتەن تىس XXV سەزىندە ۇيىمنىڭ بۇرىنعى توراعاسى باقىتجان ءابدىرايىم وندىرىستەردە ەڭبەك قاۋىپسىزدىگى مەن ەڭبەكتى قورعاۋ, جۇمىسشىنى الەۋمەتتىك قورعاۋ سالاسىن جاڭعىرتۋعا نازار اۋدارعان بولاتىن. بۇگىندە كاسىپوداقتار ەڭبەك كودەكسىنە ەڭبەك جاعدايىنا تولىقتاي ءار ۋاقىتتا جۇمىس بەرۋشىلەردىڭ جاۋاپتىلىعىن مىندەتتەيتىن نورما ەنگىزۋ بويىنشا جۇمىس ىستەۋدە. جازاتايىم وقيعاعا جول بەرمەۋ, ونداي بولعان جاعدايدا جۇمىسشىنى, وتباسىن قورعاۋ ماسەلەسى كۇن تارتىبىندە تۇر. ماسەلەن, 2019 جىلدىڭ ءى جارتىجىلدىعىندا باتىس قازاقستان وبلىسىندا 24 جازاتايىم وقيعا بولعان. 28 ادام زارداپ شەگىپ, 3 ادام قازا تاپقان.
– قازىر وبلىستىڭ كاسىپوداق ۇيىمدارىندا ەڭبەكتى قورعاۋ جانە ەڭبەك قاۋىپسىزدىگى بويىنشا 600-دەن استام وندىرىستىك كەڭەس جۇمىس ىستەيدى جانە كاسىپوداقتان 725 تەحنيكالىق ينسپەكتور بۇل ماسەلەدە قوعامدىق باقىلاۋدى جۇزەگە اسىرادى, – دەيدى ايگۇل ەسەكەنوۆا.
فورۋم جۇمىسى اياسىندا بالاما تاسىلدەرمەن شەشىلەتىن داۋلاردى رەتتەۋ ىسىندە كاسىپوداقتىڭ ءرولى, مەدياتسيا بويىنشا اتقارىلعان جۇمىستار تانىستىرىلدى. جيىنعا قاتىسقان ىسكەرلىك باسقارۋ دوكتورى, «كيوس» جشس زاڭ ءبولىمىنىڭ باستىعى انارگۇل سۇندەتوۆا وسى تاقىرىپتا ارنايى ترەنينگ وتكىزدى. بۇل ساباق باستاۋىش كاسىپوداق ۇيىمدارىنىڭ مۇشەلەرى ءۇشىن قىزىقتى ءارى پايدالى بولدى.
شارا مەرەكەلىك كونتسەرتكە, ۇيىمعا ەڭبەگى سىڭگەن ارىپتەستەردى ماداقتاۋعا ۇلاستى. وڭىردەگى سالالىق, جەرگىلىكتى جانە باستاۋىش كاسىپوداق ۇيىمدارىنىڭ ۇزدىك مۇشەلەرى سالتاناتتى تۇردە قۇتتىقتاۋ, ماراپاتقا يە بولدى.
بۇل كۇنى مارتەبەسى بيىكتەپ, ماداقتالعانداردىڭ ىشىندە «جايىقجىلۋقۋات» اق مەملەكەتتىك ءتىلدى ەنگىزۋ ءبولىمىنىڭ مەڭگەرۋشىسى اقمارال عابديەۆا دا بار. ول پرەزيدەنت قاسىم-جومارت توقاەۆتىڭ العىس حاتىن يەلەندى.
سالتاناتتى ماجىلىسكە باتىس قازاقستان وبلىسى اكىمىنىڭ ورىنباسارى سەرىك ەگىزباەۆ قاتىسىپ, كاسىپوداق مۇشەلەرىن كاسىبي مەرەكەلەرىمەن قۇتتىقتاپ, وبلىس اكىمى عالي ەسقاليەۆتىڭ اتىنان «جايىقجىلۋقۋات» كادر ءبولىمىنىڭ ينسپەكتورى ساۋلە سۇلتانعوجيەۆاعا, بقو مامانداندىرىلعان №8 مەكتەپ ديرەكتورى انارگۇل قارجاۋوۆاعا, «گيدروپريبور» عزي كادر ءبولىمىنىڭ باسشىسى انار باتىرعاليەۆاعا, كوپ بەيىندى قالالىق اۋرۋحانا ديرەكتورىنىڭ ەمدەۋ ءىسى جونىندەگى ورىنباسارى, دارىگەر نەيروحيرۋرگ باحتيار تاشكەنباەۆقا, باتىس قازاقستان وبلىسى بويىنشا تەكسەرۋ كوميسسياسىنىڭ مۇشەسى باتىرجان حاميدۋللينگە, باتىس قازاقستان وبلىستىق تاريح جانە ارحەولوگيا ورتالىعىنىڭ اعا عىلىمي قىزمەتكەرى يانا لۇقپانوۆاعا, «كازپروجوپەرەيتينگ» جشس باستاۋىش كاسىپوداق ۇيىمىنىڭ توراعاسى سەرىك جۇماباەۆقا, باتىس قازاقستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ ءبولىم باسشىسى تەمىربەك مولداشەۆقا العىس حات تابىستادى.
بۇل كۇنى عاريفوللا قۇرمانعاليەۆ اتىنداعى وبلىستىق فيلارمونيا ءارتىسى قاناتقالي قوجاقوۆ مادەنيەت جانە سپورت مينيسترلىگىمەن بىرىككەن قۇرمەت گراموتاسىمەن, بوكەيوردا اۋداندىق كاسىپوداق ۇيىمىنىڭ توراعاسى تىلەگەن ارىستانبەكوۆ قازاقستان كاسىپوداقتارى فەدەراتسياسىنىڭ «كاسىپوداق ارداگەرى» توسبەلگىسىمەن, «باتىس سۋ ارناسى» كارىزدىك سورعى ستانساسىنىڭ باستىعى جاسۇلان الىبەكوۆ قازاقستان كاسىپوداقتارى فەدەراتسياسىنىڭ «كاسىپوداقتارعا سىڭىرگەن ەڭبەگى ءۇشىن» توسبەلگىسىمەن, اقجايىق شيپاجايى باستاۋىش كاسىپوداق ۇيىمىنىڭ مۇشەسى ءلاززات دۇيسەنعاليەۆا قازاقستان كاسىپوداقتارى فەدەراتسياسىنىڭ قۇرمەت گراموتاسىمەن, وبلىستىق پسيحياتريالىق دەنساۋلىق ورتالىعىنىڭ ديرەكتورى بەكەت مىرزاحمەتوۆ قازاقستان كاسىپوداقتارى فەدەراتسياسىنىڭ العىس حاتىمەن ماراپاتتالدى.
باتىس قازاقستان وبلىسى
