وسى باستاماعا وراي, الماتىداعى قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ «Sanaly urpaq» رەسپۋبليكالىق جوبالىق كەڭسەسىنىڭ باسشىسى قايىرجان توكۋشەۆپەن كەزدەستى.
جيىندا ق.توكۋشەۆ جوبالىق كەڭسەنىڭ نەگىزگى قىزمەتى تۋرالى بايانداپ, ونى جوعارى وقۋ ورىندارىندا اشۋداعى ماقساتى مەن مىندەتىن ايتتى.
– ۇرپاق تاربيەسى ەڭ الدىمەن مەكتەپ پەن ۋنيۆەرسيتەت قابىرعاسىندا قالىپتاسادى. بالانىڭ دۇنيەتانىمىنىڭ, ومىرگە دەگەن كوزقاراسىنىڭ, قوعاممەن قارىم-قاتىناسىنىڭ باستاۋىندا اتا-اناسى مەن ۇستازدارى ۇلكەن ءرول اتقارادى. سوندىقتان جاستار تاربيەسىنە ءبارىمىز جاۋاپتىمىز. كەز كەلگەن وقۋ ورنى ءۇشىن ساپالى ءبىلىم ءبىرىنشى كەزەكتە تۇرۋى ءتيىس. مىندەتىمىز – قوعامنىڭ جەگى قۇرتىنا اينالعان سىبايلاس جەمقورلىققا قارسى الدىن الۋ شارالارىن جۇرگىزۋ, ورتاق ءادىس-تاسىلدەر ەنگىزىپ, جاستارمەن جان-جاقتى جۇمىس ىستەۋ. سونىمەن قاتار ەلىمىزدىڭ ءبىلىم بەرۋ جۇيەسى ارقىلى جەمقورلىققا قارسى مۇلدەم توزبەۋشىلىكتى قالىپتاستىرۋدىڭ ەڭ ۇزدىك تاجىريبەسى ەكەنىن كورسەتىپ, ودان باس تارتاتىن ورتانى كەڭەيتۋ باستى ماقساتىمىز, – دەدى ق.توكۋشەۆ.
كەزدەسۋ بارىسىندا قىزدار ۋنيۆەرسيتەتىنىڭ 100 ستۋدەنتى «Sanaly urpaq» رەسپۋبليكالىق جوبالىق كلۋبىنا مۇشەلىككە قابىلداندى.
باسقوسۋدى وقۋ ورنىنىڭ الەۋمەتتىك دامۋ جونىندەگى پرورەكتورى مىندەتىن اتقارۋشى جاڭاگۇل سۇلتانوۆا قورىتىندىلاپ, ۋنيۆەرسيتەتتە سىبايلاس جەمقورلىقپەن كۇرەس باعىتىندا اتقارىلىپ جاتقان جۇمىستارعا توقتالىپ ءوتتى.
ونىڭ ايتۋىنشا, ۋنيۆەرسيتەتتىڭ تاربيە, وقۋ جانە عىلىم ۇدەرىسىندە ادەپتىلىك قاعيدالارىن ساقتاۋ باستى نازارعا الىنعان. بۇل تۇرعىدا «سىبايلاس جەمقورلىققا قارسى مادەنيەت نەگىزدەرى» اتتى ءپان وقۋ باعدارلاماسىنا ەنگىزىلدى. اتالعان ءپان ستۋدەنتتەردىڭ سانالى تۇردە جانە ادامگەرشىلىكپەن سىبايلاس جەمقورلىققا قارسى مادەنيەتتى قالىپتاستىرادى.
كەزدەسۋ اياسىندا ق.توكۋشەۆ ستۋدەنتتەردىڭ ءوزىن ءوزى باسقارۋ جانە دەمالىس ورنىنىڭ قىزمەتىمەن تانىستى. وقۋ ورنىنىڭ باس عيماراتىنىڭ بازاسىندا جاقىندا اشىلعان بۇل ورتالىقتا بىلىمگەرلەر وزدەرىن جان-جاقتى دامىتىپ, قوعامدىق بەلسەندىلىگىن ارتتىرۋعا مۇمكىندىك الماق. سونداي-اق ءتۇرلى باستامالار مەن جوبالاردى ىسكە اسىرۋدى تالقىلايدى.
الماتى
