ال «NFC Kazakhstan» جشس وكىلى جارقىن تۇرىشەۆتىڭ ايتۋىنشا, كومپانيا ەلىمىز بويىنشا مۇمكىندىگى شەكتەۋلى جاندارعا 20 ميلليون تەڭگەگە كومەك كورسەتكەن. سەرىكتەستىك وڭىردەگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىمەن تىعىز بايلانىستا جۇمىس ىستەۋدە.
بيىل امبەباپ «umbrella» پولياك فيرماسىنىڭ ءۇش ارقالىعى بار ارباسىن, ەرەسەكتەرگە ارنالعان ءبىر ءجۇرىس ارباسىن, ءبىر ۆەرتيكاليزاتور جانە تسەرەبرالدى سال اۋرۋىمەن اۋىراتىن بالالارعا ارنالعان رەسەيلىك «Mega Optima» فيرماسىنىڭ بەكىتكىشى بار بەس ءجۇرىس ارباسىن بىرلەسىپ 2 ميلليون تەڭگەگە ساتىپ العان. سونداي-اق كومپانيا وڭىردەگى كوپبالالى وتباسىلاردىڭ ءتىزىمىن الىپ, الداعى ۋاقىتتا ولاردىڭ مەكتەپتەردە وقيتىن ۇل-قىزدارىنا قايىرىمدىلىق جاساماقشى.
– وكىنىشكە قاراي, مۇمكىندىگى شەكتەۋلى جانداردىڭ ارنايى جەكە اربالارعا مۇقتاجدىق ماسەلەسى ءالى دە بار, – دەدى وبلىس اكىمى بولات باقاۋوۆ اربالاردى تاپسىرۋ كەزىندە. – بيۋدجەتتەن قاراجات ءبولىپ, قاجەتتى اربامەن قامتاماسىز ەتۋدەمىز. بيزنەس تە شەت قالماۋدا. «NFC Kazakhstan» كومپانياسى جىل سايىن دەمەۋشىلىك جاسايدى. كومپانيا باسشىلىعىنا العىسىمىزدى بىلدىرەمىز.
جوعارىدا اتالعان باسقارمانىڭ مالىمەتىنشە, ارنايى قۇرىلعىلاردى وزدىگىنەن ساتىپ الۋ قيىن. ءبىر ارقالىعى بار اربا – 200 مىڭ تەڭگە, بەكىتكىشى بار ءجۇرىس ارباسى – 80 مىڭ تەڭگە, ال قولايلىلىعى جوعارى كەيبىرىنىڭ باعاسى 400 مىڭ تەڭگە تۇرادى.
– ۇلىم باۋىرجان سال اۋرۋىمەن اۋىرادى. ءوزى وتىرا المايتىندىقتان, ارقالىعى بار اربا قاجەت بولدى. اكىمدىككە ءوتىنىش جازىپ, كەزەككە تۇردىق. بۇگىن وتە قۋانىشتىمىز. بىزگە «umbrella» ارباسى بەرىلدى. وبلىس اكىمىنە جانە دەمەۋشىلەرگە العىسىمدى بىلدىرەمىن, – دەدى ەكىباستۇزدىق گۇلنۇر نۇرحاەۆا.
بيىل 79 تۇرعىنعا ارنايى قوزعالىس قۇرالدارى بەرىلگەن. وبلىس بويىنشا ارنايى قۇرال-جابدىقتارعا مۇقتاج جاندار تىزىمىندە 700 ادام بار. ولاردىڭ 50-ءى – بالا.
– مۇگەدەكتىك بەلگىلەنگەن سوڭ كورسەتكىشتەر بويىنشا وڭالتۋدىڭ جەكە باعدارلاماسى ازىرلەنەدى. كوز ناشار كورىپ, قۇلاق دۇرىس ەستىمەسە, سۋردوتەحنيكالىق قۇرالدار دايىندالادى. وڭالتۋ قۇرالدارى بولىنگەن بيۋدجەتكە بايلانىستى الىنادى. بيۋدجەتتەن تۇسكەن قارجى كۋرورتتىق ساۋىقتىرۋعا, پروتەزدىك-ورتوپەديالىق قىزمەتتەرگە ەسەپتەلگەن, – دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى زارينا الەنوۆا.
وبلىس ورتالىعىندا كوپبالالى انالاردىڭ وتىنىشىنە قاراي «مۇمكىندىگى شەكتەۋلى بالالاردى وڭالتۋ ءۇشىن قوسىمشا ورتالىق» اشىلدى. سونداي-اق وبلىستىق اكىمدىك قالاداعى بۇرىنعى بالاباقشانى كۇردەلى جوندەۋدەن وتكىزىپ بەردى. ورتالىقتى قايتا قالپىنا كەلتىرىپ, مۇمكىندىگى شەكتەۋلى بالالارعا ىڭعايلى ەتىپ جاساۋ جۇمىستارى جۇرگىزىلدى.
قازىر ورتالىققا كەلەتىن بالالار بارلىق ەم-دومدى قابىلداي الادى. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە, 80 ورىنعا ارنالعان ورتالىقتا وڭالتۋ مەرزىمى ءۇش اي, ودان كەيىن بالالار دەمالىس الادى. ءبىر جىل ارالىعىندا ورتالىقتا 300-گە جۋىق مۇمكىندىگى شەكتەۋلى بالانى قابىلداۋعا مۇمكىندىك بار.
– ءبىزدىڭ بالالارمەن جۇمىس ىستەۋدە ۇلكەن تاجىريبەمىز بار, – دەدى تىرەك-قيمىل اپپاراتى بۇزىلعان بالالاردى وڭالتۋ بويىنشا قىزمەت كورسەتۋ ورتالىعىنىڭ ديرەكتورى روزا قادىربەكوۆا. – كەيبىر بالالار بىزدە 4 ساعاتقا دەيىن, كەيبىر بالالار 10 ساعاتقا دەيىن, ال وبلىستىڭ باسقا قالالارى مەن اۋداندارىنان كەلگەن بالالار تاۋلىك بويى بولادى.
سونىمەن بىرگە جۋىردا وبلىس ورتالىعىنا قاراستى كەنجەكول اۋىلىندا مۇگەدەكتەردى وڭالتۋ كابينەتى اشىلدى. وندا مۇمكىندىگى شەكتەۋلى جاندارعا بارلىق جاعداي جاسالعان. ال ەمدەلۋشىلەردى باقبەرگەن قالامۇش قابىلدايدى. ونىڭ ءوزى دە مۇگەدەكتەر ارباسىنا تاڭىلعان جان. قايتسە دە ءجۇرىپ كەتۋدى ارماندايتىن ول, ءوزى سياقتى ارباعا تاڭىلعاندارعا كەدەرگىسىز ءومىر سىيلاماق.
– الدىمەن «اتامەكەن» كاسىپكەرلەر پالاتاسىندا ارنايى كۋرستان ءوتتىم. جەكە كاسىبىمدى اشۋعا گرانت الدىم. بىراق اۋىلدان مۇگەدەكتەرگە ارنالعان ارنايى جاتتىعۋ زالىن اشاتىن ورىن تاپپادىق. وبلىس اكىمى بولات باقاۋوۆتىڭ قابىلداۋىنا جازىلىپ, كومەك سۇرادىم. اكىم سوزىندە تۇردى, – دەدى ب.قالامۇش.
وڭالتۋ كابينەتى اۋىلدا جۋىردا عانا پايدالانۋعا بەرىلگەن مادەنيەت ءۇيىنىڭ ىشىنەن اشىلدى. كوپ جىل بويى تۇرعىندار اسىعا كۇتىپ جۇرگەن مادەنيەت ۇيىندە 300 ورىندىق زال, بي زالى جانە ءتۇرلى ۇيىرمەلەرگە ارنالعان كابينەتتەر بار. ال وڭالتۋ كابينەتىن قاجەتتى قۇرال-جابدىقتارمەن قامتاماسىز ەتۋ ءۇشىن ERG كومپانياسىنىڭ اتىنان جوبا يەسىنە 5 ميلليون تەڭگە گرانت بەرىلدى.
بۇعان دەيىن اقسۋ فەرروقورىتپا زاۋىتىندا ەڭبەك ەتكەن ب.قالامۇشقا ەۋرازيالىق توپتىڭ وكىلدەرى قولداۋ كورسەتىپتى.
پاۆلودار وبلىسى
