وقۋ ورنىنىڭ ءباسپاسوز قىزمەتى تاراتقان اقپاراتقا سۇيەنسەك, جوبا نيدەرلاندى كورولدىگىنىڭ ەلشىلىگىنىڭ قولداۋىمەن جۇزەگە اسىرىلۋدا.
اتالعان مەملەكەتتىڭ قازاقستانداعى ەلشىسى اندرە كارستەنس قىزدار ۋنيۆەرسيتەتىنە جاساعان ساپارى اياسىندا وقۋ ورنىنىڭ ستراتەگيالىق دامۋ جانە حالىقارالىق بايلانىستار جونىندەگى پرورەكتورى ءلاززات بۋلەباەۆامەن كەزدەسىپ, ىنتاماقتاستىقتى دامىتۋ جايىن تالقىلادى. اتاپ ايتقاندا, تاراپتار ايەلدەر مەن قىزداردىڭ الەۋەتىن ارتتىرۋ جانە مۇمكىندىكتەرىن كەڭەيتۋ, ولار جايلى ينتەرنەت كەڭىستىگىندە اقپارات تاراتۋ جايىن قاۋزادى. سونىمەن قاتار اتالعان بىرەگەي جوبانىڭ ماڭىزى تۋرالى دا ايتىلدى.
– بۇل جوبانىڭ قازاقستان ءۇشىن پايداسى كوپ دەپ ويلايمىن. باستى ماقسات – ەسىمى كوپشىلىك ءۇشىن بەيمالىم دەسە دە ءوز سالاسى بويىنشا جەتىستىككە جەتكەن نازىكجاندىلاردى كەڭىنەن ناسيحاتتاۋ, ينتەرنەت كەڭىستىكتە ولار تۋرالى اقپاراتتى قولجەتىمدى ەتۋ. ونلاين كىتاپحاناداعى مالىمەت قازاق, اعىلشىن جانە ورىس تىلدەرىندە جاريالانباق, – دەدى كەزدەسۋ بارىسىندا ءلاززات بۋلەباەۆا.
ءوز كەزەگىندە اندرە كارستەنس ەكى ەل اراسىنداعى ىنتىماقتاستىق جايى تۋرالى اڭگىمەلەپ, نۇر-سۇلتان مەن امستەردام اراسىنداعى تۇراقتى بايلانىس دەڭگەيىنىڭ ءوسىپ وتىرعاندىعىن ەرەكشە اتاپ ءوتتى.
ساپار اياسىندا ديپلومات ۋنيۆەرسيتەتتىڭ «اقتۇمار» تاريحي-ەتنوگرافيالىق مۋزەيى مەن «Art Dara»ونەر گالەرەياسىنداعى جادىگەرلەرمەن تانىسىپ, قىلقالام شەبەرلەرىنىڭ تۋىندىلارىن تاماشالادى.
