فوتولاردى تۇسىرگەن ەربول ەردەنبەك
الەمدىك ماڭىزى زور شارانى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن ۆيتاۋتاس ماگنۋس (ليتۆا, كاۋناس ق.) ۋنيۆەرسيتەتى جانە QS Quacquarelli Symonds حالىقارالىق كومپانياسى بىرلەسىپ ۇيىمداستىردى.
اۋقىمدى شاراعا اكادەميالىق قاۋىمداستىق كوشباسشىلارى – جوعارى وقۋ ورىندارىنىڭ رەكتورلارى, ءبىلىم, عىلىم, ونەر, جۋرناليستيكا, بيزنەس, ەكونوميكا جانە دەنساۋلىق ساقتاۋ سالاسىنداعى وكىلەتتى عالىمدار مەن ساراپشىلار, حالىقارالىق ۇيىمداردىڭ وكىلدەرى جينالدى.
قاتىسۋشىلار كونتينگەنتىن قازاقستان, رەسەي, اقش, ليتۆا, لاتۆيا, ۇلىبريتانيا, جاپونيا, كورەيا, تۇركيا, ءازىربايجان, ەستونيا, ەفيوپيا, پولشا, ۋكراينا, وزبەكستان سياقتى ەلدەر ۇسىنادى. كونفەرەنتسياعا بارعان قازاقستاندىق دەلەگاتسيا قۇرامىندا قازاقستان جوو رەكتورلارى (قازاقستان جوو رەكتورلار كەڭەسىنىڭ توراعاسى ە. سىدىقوۆ), عالىمدار مەن عىلىمي-زەرتتەۋ ينستيتۋتتارىنىڭ باسشىلارى, جالپى سانى جۇزدەن استام دەلەگات بار.
حالىقارالىق جيىنعا قاتىسقان سپيكەرلەر قاتارىندا: Quacquarelli Symonds بريتاندىق كونسالتينگ كومپانياسىنىڭ وڭىرلىك ديرەكتورى زويا زايتسەۆا, بريتاندىق «The Guardian» گازەتىنىڭ رەداكتورى رەيچەل حولل, بەلگىلى جۋرناليست ستيۆەن حوار, ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, ۆيتاۋتاس ماگنۋس ۋنيۆەرسيتەتىنىڭ رەكتورى يۋوزاس اۋگۋتيس, سكولكوۆ عىلىم جانە تەحنولوگيالار ينستيتۋتىنىڭ فاكۋلتەت دەكانى كلەمەنت فورتين جانە باسقالار بار.
QS in conversation - بۇل جوعارى ءبىلىم سالاسىنداعى جاھاندىق مىندەتتەردى تالقىلاۋعا, الەمدىك قاۋىمداستىقتى نىعايتۋداعى ۋنيۆەرسيتەتتەردىڭ ءرولىن انىقتاۋعا, حالىقارالىق جوعارى ءبىلىم بەرۋ جۇيەسىندەگى ترەندتەردى تالقىلاۋعا جانە ت.ب. اسا قاجەتتى ماسەلەلەرگە باعىتتالعان الەمدىك ماڭىزى زور جيىن.
جيىندا حالىقارالىق ىنتىماقتاستىق ارقىلى جوعارى وقۋ ورىندارىنىڭ تانىمالدىعىن ارتتىرۋ ادىستەرى, باق-پەن بايلانىس جولدارى قاراستىرىلدى جانە ستۋدەنتتەردى كاسىپكەرلىك داعدىلارىن دامىتۋ ارقىلى جۇمىسقا ورنالاستىرۋ, كرەاتيۆتى ويلاۋ, جەكە برەندينگ, سونىمەن قاتار رەيتينگتەر ارقىلى باسەكەگە قابىلەتتى كەڭىستىكتە جوو-نىڭ ءوز سايكەستىگىنىڭ جەتىستىكتەرى تالقىلاندى.
فورۋمنىڭ اشىلۋىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, Quacquarelli Symonds بريتاندىق كونسالتينگ كومپانياسىنىڭ وڭىرلىك ديرەكتورى زويا زايتسەۆا, ۆيتاۋتاس ماگنۋس ۋنيۆەرسيتەتىنىڭ رەكتورى يۋوزاس اۋگۋتيس, تاعى باسقالار ءسوز الدى.
ەۇۋ رەكتورى ەرلان سىدىقوۆ اتاپ كەتكەندەي, ءوتىپ جاتقان سامميت –قازاقستاندىق ۋنيۆەرسيتەتتەر, دوستاس ەلدىڭ ۋنيۆەرسيتەتتەرى حالىقارالىق دەڭگەيدە ءوز پوزيتسياسىن سەنىمدى تۇردە ۇستاپ وتىرعانىنا دالەل. موبيلدىلىك, تانۋ, برەندينگ ارقىلى تانىلۋ. حالىقارالىق سامميت تاقىرىبىنىڭ وزەكتىلىگى دە, ءسوز جوق, جوعارى ءبىلىم بەرۋ سالاسىنداعى جاھاندىق باسەكەلەستىكتىڭ وسۋىمەن بايلانىستى.
دەموگرافيالىق تۇراقتاردان شىعا وتىرىپ, ءوسىپ كەلە جاتقان باسەكەلەستىكتى ەشكىم جوققا شىعارمايدى - بالا تۋدىڭ كۇرت تومەندەۋى بايقالادى. وسىعان بايلانىستى تالقىلاۋعا شىعارىلعان ماسەلەلەر ەرەكشە وزەكتىلىككە يە.
باسەكەگە قابىلەتتى مامان, وزىق عىلىمي ءبىلىمدى دامىتۋ – حالىقارالىق ارىپتەستىك پەن ىنتىماقتاستىقتىڭ باستى ۇستانىمدارى.
ۆيتاۋتاس ماگنۋس ۋنيۆەرسيتەتىنىڭ رەكتورى يۋوزاس اۋگۋتيس وزەكتى ماسەلەلەردىڭ وڭ شەشىم تاباتىنىنا ۇمىتتەنەدى: ء«بىز مۇندا كۇش-جىگەرىمىزدى قالاي بىرىكتىرىپ, بولاشاقتا ۋنيۆەرسيتەت ءۇشىن زاماناۋي سىن-قاتەرلەردى انىقتاۋ, ماسەلەنى بەلگىلەۋ جانە شەشىم تابۋ ءۇشىن جينالدىق. ۇلى ترانسفورماتسيا كەزىندە ءبىز بەيىمدەلىپ, قالاي ۇيرەتەتىنىمىزدى جانە نەنى ۇيرەتەتىنىمىزدى ءتۇسىنۋىمىز كەرەك. ويتكەنى تەك جوعارى ءبىلىمدى, سىني ويلايتىن تۇلعا مانيپۋلياتسيالارعا قارسى تۇرا الادى», - دەدى سپيكەر. سونىمەن قاتار يۋوزاس اۋگۋتيس جالپى ماسەلەلەردى شەشۋ ءۇشىن ۋنيۆەرسيتەتتەر سەرىكتەستەرمەن, بيزنەسپەن, ۇكىمەتپەن, قوعاممەن بىرىگۋى كەرەك دەپ مالىمدەدى.
Quacquarelli Symonds بريتاندىق كونسالتينگ كومپانياسىنىڭ شىعىس ەۋروپا جانە ورتالىق ازيا بويىنشا وڭىرلىك ديرەكتورى زويا زايتسەۆا فورۋمنىڭ ماڭىزدىلىعىن اتاپ وتە كەلە: «بۇل جەردە تەك قانا تەوريا, پرەزەنتاتسيالار, باياندامالار عانا ەمەس, ەڭ باستىسى, ادامدار ءبىرىن ءبىرى بىلەدى, كەزدەسەدى جانە تاجىريبە الماسادى» دەدى.
ءىس-شارا رەسەي, قازاقستان, اقش, لاتۆيا ۋنيۆەرسيتەتتەرى باسشىلارىنىڭ, ليتۆانىڭ ءبىلىم, عىلىم جانە سپورت مينيسترلىگى وكىلدەرىنىڭ, تانىمال جۋرناليستەر مەن رەداكتورلاردىڭ, حالىقارالىق ءبىلىم بەرۋ جانە زەرتتەۋ كومپانيالارى وكىلدەرىنىڭ قاتىسۋىمەن وتۋدە. باعدارلاما بويىنشا ۆيتتاۋتاس ماگنۋس, تاللين ۋنيۆەرسيتەتى, ماسساچۋسەتس تەحنولوگيالىق ۋنيۆەرسيتەتى, ەۋرازيا ۇلتتىق ۋنيۆەرسيتەتى, ورال فەدەرالدى ۋنيۆەرسيتەتى, لاتۆيا ۋنيۆەرسيتەتى جانە ت.ب. جوو وكىلدەرىنىڭ باياندامالارىنان تۇرادى.
كەشە باستالعان سامميت ەكى كۇنگە سوزىلادى. جيىنعا قاتىسۋشىلار «ۋنيۆەرسيتەت & باق-پەن بايلانىس», «ۋنيۆەرسيتەتتىك برەندينگ: باسەكەلەستىك كەڭىستىكتە ءوز جولىن تابۋ», «رەيتينگتەر ارقىلى برەندينگ: QS قالاي بارىنشا پايدالانۋ كەرەك» جانە ت.ب. تاقىرىپتاردى تالقىلاماق.
كونفەرەنتسيا سوڭىندا «QS EECA University Rankings 2019 - دامۋشى ەۋروپا مەن ورتالىق ازيا ۋنيۆەرسيتەتتەرىنىڭ QS 2019» رەيتينگىسىنىڭ ناتيجەلەرى جاريالانادى دەپ كۇتىلۋدە.
سونداي-اق وسى شارا اياسىندا ەرلان سىدىقوۆتىڭ توراعالىق ەتۋىمەن قازاقستاننىڭ جوعارى وقۋ ورىندارى رەكتورلارى كەڭەسىنىڭ وتىرىسى ءوتىپ, وعان ليتۆالىق ارىپتەستەر قاتىسپاقشى.
ءلايلا راحمانوۆا,
كاۋناس قالاسى, ليتۆا
