تالدىقورعاننان وسكەمەنگە دەيىنگى جولدىڭ 880-1073 شاقىرىمدارىن يتاليالىق «توديني تسەنترال ازيا» مەردىگەر كومپانياسى سالۋدا. قۇرىلىستىڭ جالپى قۇنى 67,1 ميلليارد تەڭگەنى قۇرايدى. جول بويىندا 31 كوپىر تۇرعىزىلىپ, سۋ وتكىزۋگە ارنالعان 176 قۇبىر توسەلمەك. كومپانيا جۇمىستاردى قارقىندى اتقارۋدا, ءارى جولدىڭ ساپاسى دا ءوز دارەجەسىندە. ولاردىڭ جول بويىندا ەكى بىردەي زاۋىتى جۇمىس ىستەپ تۇر. ىستەرىندە كىدىرىس جوق. ال قالباتاۋ – مايقاپشاعاي تراسساسىنىڭ 906-1090 شاقىرىمدارىندا «سپ قازگەرقۇرىلىس» جشس جۇمىس اتقارۋدا. بۇل – قالباتاۋ اۋىلىنان باستاپ تارباعاتاي اۋدانىنىڭ اۋماعىنا دەيىنگى ارالىق. وزدەرىنە بەرىلگەن 184 شاقىرىم جولدى 80 ميلليارد تەڭگە قارجىعا سالىپ شىعۋلارى ءتيىس. جول بولىگىندە 18 كوپىر مەن 214 سۋ وتكىزۋ قۇبىرى بولادى. وسى جولدىڭ 1090-شى جانە 1321-ءشى شاقىرىمدارى ارالىعىندا قىتايلىق «سhina Xing-Xing Group Co LTD» كومپانياسى جۇمىس ىستەپ جاتىر. ولار مايقاپشاعايدان باستاپ تارباعاتاي اۋدانىنداعى قابانباي اۋىلى تۇسىنا دەيىنگى جولدى جوندەۋدە. 231 شاقىرىم جولدى سالۋعا 78,5 ميلليارد تەڭگە قاراستىرىلعان. بۇل ارالىقتا 15 كوپىر مەن 230 سۋ قۇبىرى سالىنادى. ءۇش مەردىگەردىڭ جۇمىسىمەن تانىسقان ا.مامين «توديني تسەنترال ازيا» كومپانياسى جۇكتەلگەن مىندەتتى ويداعىداي اتقارىپ كەلە جاتقانىن اتاپ ءوتىپ, «قازگەرستروي» مەن «سhina Xing-Xing Group Co LTD» كومپانيالارىنا قۇرىلىستى شيراتۋ قاجەتتىگىن ايتقان بولاتىن. «جۇمىستىڭ كەلەسى جىلعا جوسپارلانعان كولەمى تىم كوپ ەكەنىن ەستەن شىعارماڭىزدار. ەسكەرتىپ ايتارىم, الداعى جىلدىڭ اياعىنا دەيىن بۇل جولدارمەن كولىكتەر ءجۇرۋى ءتيىس. وزگە اباتتاندىرۋ جۇمىستارى كەيىن اتقارىلادى. ەڭ باستىسى, كولىكتەر قوزعالىسىنا جول اشۋ. مىندەت وسى», دەگەن-ءدى ۇكىمەت باسشىسى.
تالدىقورعان – وسكەمەن باعىتىنداعى 1090-شى جانە 1321-ءشى شاقىرىمدارى ارالىعىندا جۇمىس ىستەپ جاتقان «سhina Xing-Xing Group Co LTD» كومپانياسىنىڭ جۇمىسى نەگە تەجەلۋدە؟ مۇنىڭ سەبەبىن تەحنيكا جەتىسپەۋشىلىگىمەن تۇسىندىرىگەن كومپانيا وكىلدەرى وزدەرىندە 190 بىرلىك تەحنيكا بار ەكەنىن, الداعى ۋاقىتتا قىتايدان تاعى قوسىمشا تەحنيكا جەتكىزىلەتىنىن ايتقان-دى. «قىتايلىق مەردىگەردىڭ جۇمىستى كەشىكتىرۋىنە تەحنيكا عانا ەمەس, بىلىكتى مامانداردىڭ جەتىسپەۋشىلىگى سەبەپ بولۋدا. قازىر مەردىگەر كومپانيا مامان تارتۋ جۇمىستارىمەن شۇعىلدانىپ جاتىر. جول سالۋ جۇمىستارىنا جەرگىلىكتى مامانداردى تارتۋ ماقساتىندا وبلىستىڭ اۋدان اكىمدەرى حالىق اراسىندا ءتيىستى جۇمىستاردى جۇرگىزىپ جاتىر. بۇل ماسەلە جاقىن ارادا وڭ شەشىمىن تابادى دەپ ويلايمىن», دەيدى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان ءجۇمادىلوۆ.
شىعىس قازاقستان وبلىسى
