كەزدەسۋدى الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيار ۇلى اشتى. سەناتور قارالىپ وتىرعان زاڭ جوبالارى مۇعالىمدەر مەن مەكتەپكە دەيىنگى مەكەمەلەر قىزمەتكەرلەرىنىڭ مارتەبەسىن ەداۋىر ارتتىرۋعا, جۇكتەمەنى ازايتۋعا, پەداگوگيكا قىزمەتكەرلەرىنىڭ قۇزىرەتىنە جاتپايتىن قىزمەتتەردى قىسقارتۋعا مۇمكىندىك بەرەتىنىن اتاپ ءوتتى.
ءبىلىم جانە عىلىم ءمينيسترى ا.ايماعامبەتوۆ سەناتورلارعا زاڭ جوبالارىن تانىستىردى. مينيستر پەداگوگتىڭ قىزمەتىنە جانە ءبىلىم بەرۋ ساپاسىنا اسەر ەتەتىن ماسەلەلەر بويىنشا جۇزەگە اسقان الەۋمەتتىك جانە ساراپتامالىق زەرتتەۋلەردىڭ قورىتىندىسى زەردەلەنگەنىن اتاپ ءوتتى. زاڭ جوبالارى اياسىنداعى مارتەبەنى ارتتىرۋ جونىندەگى جاڭالىقتار بارلىق پەداگوگتەرگە قاتىستى بولادى.
قاتىسۋشىلاردىڭ ايتۋىنشا بۇگىنگى كۇنى پەداگوگتەردىڭ جارتىسىنان استامى ماماندىق مارتەبەسىمەن جانە ەڭبەكاقىلارىنىڭ دەڭگەيىنە ريزا ەمەس. وعان پەداگوگيكا ماماندىعىنا ناعىز دارىنداردىڭ كەلۋىنە ىنتالاندىرۋ تەتىكتەرى جوق جانە ماماندىققا ءتۇسۋ بالىنىڭ تومەندىگى دە سەبەپ بولىپ وتىر.
2020-2022 جىلدارعا ارنالعان رەسپۋبليكالىق بيۋدجەتتى قالىپتاستىرۋ اياسىندا زاڭ جوبالارىن قامتاماسىز ەتۋگە جالپى سوماسى 1 202,1 ملرد.تەڭگە كولەمىندەگى شىعىندار بەلگىلەندى. قاراجات مەملەكەتتىك مەكتەپكە دەيىنگى, ورتا, تەحنيكالىق جانە كاسىبي, ورتا بىلىمنەن كەيىنگى ءبىلىم بەرۋ ۇيىمدارى پەداگوگتەرىنىڭ ەڭبەكاقىسىن ارتتىرۋعا ارنالعان.
2024 جىلعا قاراي ءبىلىم بەرۋ سالاسىنداعى 500 مىڭ قىزمەتكەردىڭ ەڭبەكاقىسى 2 ەسە, ال دەمالىس كۇندەرى 42 كۇننەن 56 كۇنگە دەيىن ۇلعايادى.
سەناتور د. نوكەتاەۆا بۇگىنگى كۇنى «پەداگوگيكا» ماماندىعىنا تومەن بالل العان تۇلەكتەر تۇسەتىنىنە, سونداي-اق مۇعالىمدەر مەن وقۋشىلاردىڭ جۇكتەمەسىنىڭ كوپ ەكەنىنە الاڭداۋشىلىق ءبىلدىردى.
سەناتورلار سونداي-اق پەداگوگتەردىڭ قۇقىقتىق ساۋاتتىلىعىن ارتتىرۋ, بازالىق لاۋازىمدىق ايلىقاقى دەڭگەيىن, پەداگوگتەر ءبىلىمىنىڭ ساپاسى مەن قاشىقتىقتان جانە ونلاين وقىتۋدىڭ ساپاسىن ارتتىرۋ جانە باسقا دا كوپتەگەن ماسەلەلەردى كوتەردى.
