ايماقتار • 11 قازان، 2019

مىنە، ناعىز اگرونوم!

231 رەت كورسەتىلدى

كەگەن اۋدانىنداعى قارقارا اۋىلىندا ىزتەلەۋ نۇسىپقوجاەۆ اتتى ازامات تۇرادى. ونى جەرگىلىكتى جۇرت تابىستى فەرمەر، باعبان ءارى گۇل ءوسىرۋشى ازامات دەپ تانيدى.

ىزتەلەۋ نۇسىپقوجاەۆتىڭ «ايبول» اتتى شارۋا قوجالى­عى بار. جوعارى ءبىلىمدى اگرونوم كەيىنگى جىلدارى كاسىبىن دامىتىپ، ءۇيىنىڭ اينالاسىن كورسەڭ كوزىڭ تويمايتىن دۇنيەلەرگە تولتىرعان جايى بار. ول اۋداندا «باستاۋ-بيزنەس» باعدارلاماسى بويىنشا ءبىلىم الىپ، قولىنا ارنايى سەرتيفيكات تيگەن سوڭ گۇل وسىرەتىن جىلىجاي سالۋدى قولىنا العان. يگىلىكتى ءىسى وڭىنان بولىپ، وبلىس اكىمىنىڭ 1 ميلليون تەڭگە گرانتىن يەلەندى. ەكى مەتر تەرەڭدەتىپ قازىلعان جىلىجايىندا گۇل ءوسىرىپ، كوكتەم شىعىسىمەن اۋداندىق اكىمدىكتىڭ، بىرنەشە ەسكەرتكىشتىڭ الدىن گۇلگە تولتىرىپ ءجۇر.

جالپى، بۇل ازاماتتىڭ گ ۇلىن كوپتەگەن مەكەمە، مەكتەپتەر الىپ، پايدالانىپ كەلەدى. ءبىز بۇرناعى جىلدارى ىزتەلەۋدەي ىسكەر، ەڭبەكقور ازاماتتىڭ گۇل وسىرەتىن شارۋاسىن جازعان بولاتىنبىز. ەندى ول ءۇيىنىڭ ەكىنشى جاعىنان كوكونىس وسىرەتىن جازدىق جىلىجاي سالىپ قويىپتى. ەنى 6 مەتر، ۇزىندىعى 20 مەتر جىلىجايدا قيار، قىزاناق ءوسىرىپتى. ەكەۋى دە بيىل جەمىستى مول بەردى. جىلىجايدىڭ جانىندا جاپ-جاقسى بولىپ ورالىپ قالعان قىرىققابات، ءسابىز، سارىمساق، كارتوپ، ءبارى-ءبارى جايقالا ءوسىپ كوز تارتادى. ەڭبەكقور ازامات بىلتىر قىستا گۇلدىڭ 6000 ءتۇپ كوشەتىن، قىرىققاباتتىڭ 1500 ءتۇپ كوشەتىن دايىنداعان. سونىڭ ناتيجەسىندە ءۇيىنىڭ جانىنداعى شاپ-شاعىن جەردەن جۇزدەگەن ءتۇپ قىرىققابات الدى. ءيىسى بۇرقىراعان جاپ-جاقسى سارىمساقتى ەسىكتىڭ الدىنا جايىپ قويىپتى. ىزتەلەۋدىڭ قيار، قىزاناق، سارىمساقتارىن كورشىلەرى دە ساتىپ الاتىن كورىنەدى. قولدا بار دۇنيەنىڭ ەلگە دە پايداسى ءتيدى.

– قارقارا اۋىلدىق وكرۋگى اۋماعىنان بىلتىردان بەرى سۇراپ ءجۇرىپ 1،5 گەكتار جەر العانمىن. اۋىلدى، اۋداندى قامتيتىنداي ۇلكەن جىلىجاي سالۋدى جوسپارلاپ ءجۇرمىن. قازىر قاراجات جاعىنان قينالىپ تۇرمىن. قىسى-جازى ىستەيتىن جىلىجايدا قيار، قىزاناق، قىرىققابات وسىرسەم دەگەن ويىم بار. ونىڭ شاپاعاتى ەلگە تيەتىن ەدى. بۇرناعى جىلدان باستاپ اينالىسىپ جۇرگەن شارۋالارىمنىڭ ءبارى – تاجىريبە جيناقتاۋ، ۇلكەن ىسكە دايىندىق، – دەيدى ىزتەلەۋ الداعى جوسپارلارىن ءسوز ەتىپ.

راس، كەگەن اۋدانىندا ۇلكەن جىلىجاي جوق. ونى سالۋعا بەل بۋىپ وتىرعان ازاماتقا قالايدا كومەك، قولداۋ كورسەتكەن ارتىق ەمەس. ويتكەنى قولعا العان ءىسىنىڭ ناتيجەسى كورىنىپ تۇر.

10 ميلليون تەڭگەدەي قاراجات كەرەك ەكەن. ول ىسكە قوسىلعان كەزدە 5 ادامدى تۇراقتى جۇمىسپەن قامتىماق. كوكونىس تۇقىمدارىنىڭ دەنى قولىندا. ءوسىرىپ، جايقالتىپ قويعان، جەمىسىن بەرىپ تۇرعان دۇنيەلەرىن كورىپ، ازاماتقا ريزا بولدىق. مىنە، ناعىز اگرونوم جىگىت دەستىك. اۋىلدىڭ سىرت جاعىندا 15 گەكتار ارپاسى، 5 گەكتار كارتوبى بار.

جەردىڭ قاسيەتىن بىلەتىن اگرونوم جىگىت قولىنان كەلگەن شارۋاسىن جاساپ كەلەدى. ەلۋدىڭ ىشىندەگى ازاماتتىڭ ءىسى ماقتاۋعا تۇرارلىق. ونىڭ ءار كۇنى ەڭبەككە تولى. اۋىلدا جۇمىس جوق دەيتىن جاستارعا ۇلگى.

ىزتەلەۋ نۇسىپقوجاەۆتىڭ جۇبايى تۇرعان بۇقاباەۆا اعىلشىن ءتىلىنىڭ مۇعالىمى. ءۇي شارۋاسىنان قولى قالت ەتكەندە اگرونوم جۇبايىنىڭ كوكونىسىن كۇتۋگە كومەكتەسەدى. ەكى ۇل، ءۇش نەمەرەسى بار. شالعاي اۋىلدا ءوزىنىڭ ماماندىعى بويىنشا گۇل، كوكونىس، كارتوپ پەن ءدان ءوسىرىپ، يگىلىگىن كورىپ كەلە جاتقان ازاماتتىڭ قولى قۋاتتى، ءومىرى شۋاقتى بولا بەرگەي!

 قانات ءبىرجانسال

 

سوڭعى جاڭالىقتار

اقتوبەدە اباي ەسكەرتكىشى اشىلدى

ايماقتار • بۇگىن، 23:00

نامىسىن تۋ ەتكەن

رۋحانيات • بۇگىن، 22:18

كوروناۆيرۋستان قالاي قورعانامىز؟

كوروناۆيرۋس • بۇگىن، 21:33

تاراز قالاسىندا نان قىمباتتاعان

ايماقتار • بۇگىن، 19:15

جوعالعان بالا 12 ساعاتتا تابىلدى

ايماقتار • بۇگىن، 14:38

ۇقساس جاڭالىقتار