سەنبىلىك شارالارى اياسىندا 1 ميلليون 116 مىڭ تەكشە مەتر اۋلانىڭ اۋماعى تازالانىپ, 10,2 مىڭ توننا قوقىس, 14 مىڭ توننا جاپىراق سىرتقا شىعارىلعان. سونداي-اق 277 ەسكەرتكىش ماڭى قالىپقا كەلتىرىلدى. جەرگىلىكتى اكىمدىكتەردىڭ قولداۋىمەن 10,3 مىڭ ءتۇپ كۇزگى اعاش وتىرعىزىلعان. سەنبىلىككە 91 مىڭ ادام مەن 800 بىرلىك تەحنيكا قاتىسقان. ال اباتتاندىرۋ ىسىنە نەمقۇرايلى قاراعان تۇرعىندار مەن شاعىن جانە ورتا كاسىپكەرلىك وكىلدەرىنە جەرگىلىكتى پوليتسيا تاراپىنان 112 اكىمشىلىك حاتتاما تولتىرىلىپ, 348 مىڭ تەڭگە كولەمىندە ايىپپۇل سالىنىپتى. ماسەلەن, «حاگي-پاۆلودار» جشس 19 ءتۇپ اعاشتى كەسكەنى ءۇشىن 93 ءتۇپ اعاشتى قايتا ەگەتىن بولعان-دى. اكىمشىلىك جاۋاپكەرشىلىككە تارتىلعان كاسىپورىنعا 100 مىڭ تەڭگە كولەمىندە ايىپپۇل سالىندى. جالپى, ۇلتتىق ەكونوميكا ءمينيسترىنىڭ بۇيرىعىمەن بەكىتىلگەن «اعاشتاردى قورعاۋ جانە ساقتاۋ تۋرالى» ەرەجەلەرىنە سايكەس, اعاشتاردى زاڭسىز كەسۋ كەزىندە 5 ەسە ەسەلەنگەن وتەماقى مولشەرى بەلگىلەنەدى. ءاربىر زاڭسىز كەسىلگەن اعاش ءۇشىن قايتا 5 اعاش وتىرعىزىپ, وعان ەكى جىل مەرزىمىندە كۇتىم جاساۋ قاجەت.
قالالىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ مامانى ايزادا كەلدىبەكوۆانىڭ ايتۋىنشا, بيىل وبلىس ورتالىعىنا 6196 ءتۇپ اعاش ەگىلدى. ونىڭ ءبىر مىڭنان استامى – وتەماقى تۇرىندە وتىرعىزىلعان اعاشتار ەكەن. ال قالعانى بيۋدجەت قاراجاتىنا ساتىپ الىنعان. ياعني قالانى كوگالداندىرۋ, كوشەت ەگۋ, ونى سۋارۋ بويىنشا جاريالانعان تەندەردى بيىل «گورزەلەنستروي» جشس, «دوس-پۆل» جشس جانە «اياۋلى الاقان» جشس سىندى كومپانيالار ۇتىپ العان. بۇل ماقساتقا قالالىق بيۋدجەتتەن 104 ميلليون تەڭگە قاراجات بولىنگەن.
– كاسىپكەرلەر قۇرىلىس جۇرگىزۋ ءۇشىن بۇرىننان ءوسىپ تۇرعان اعاشتاردى كەسۋگە رۇقسات سۇرايدى. سوندىقتان ءبىر اعاش كەسسە, ورنىنا 5 ءتۇپ جاس تال ەگۋ مىندەتىن قويۋ ارقىلى رۇقسات بەرىلەدى. مىسالى, «دەنساۋلىق» ساياباعىندا سالىنىپ جاتقان «Forte bank» اق 100-گە جۋىق اعاشتى كەسىپ, ونىڭ ورنىنا ۋسولكا شاعىن اۋدانىنداعى باسسەين ماڭىنا 500 ءتۇپ جاس تال ەكتى, – دەيدى مامان.
الايدا مۇنداي جولمەن ەگىلگەن جاس كوشەتتەردىڭ قانشاسى كوكتەپ, قانشاسى قۋراپ قالعانىن ەشكىم بىلە بەرمەيدى. سونداي-اق وبلىس ورتالىعىندا, اۋدانداردا دا كورىپ جۇرگەنىمىزدەي, سەنبىلىكتە وتىرعىزىلعان اعاشتاردىڭ سۋارىلماي, كۇتىمنىڭ جوقتىعىنان قۋراپ, سولىپ قالاتىنى – نازارعا الاتىن-اق ماسەلە. بۇدان شىعاتىن قورىتىندى, بۇگىندە ءداستۇرلى سەنبىلىكتەردىڭ ءوزى كوزبوياۋشىلىققا اينالىپ بارا جاتقان سەكىلدى. جەرگىلىكتى اكىمدىكتەر جالاڭ كورسەتكىشتەر قۋىپ, ءتىپتى, ويعا قونىمسىز ساندار دا كورسەتە باستادى. ايتالىق بىلتىر وبلىستىق اكىمدىك وتىرىسىندا جەلەزين اۋدانىندا 7 مىڭ ادام, وبلىس ورتالىعىندا 25 مىڭ ادام سەنبىلىككە قاتىسىپ, 230 تەحنيكا جۇمىلدىرىلعان دەلىندى. سەنبىلىككە قاتىسۋشىلار سول ءىس-شارا اياسىنداعى تازالىق پەن كوشەت وتىرعىزۋدى عانا ويلايدى. بىراق سەنبىلىكتەن سوڭ دا ءومىر بار عوي. تۋعان قالامىز بەن اۋىلىمىزدى جاسىل جەلەككە بولەيمىز دەسەك, ءوز قولىمىزبەن ەككەن اعاشتاردى كۇتىپ-باپتاپ, سۋارۋعا دا ارنالعان سەنبىلىكتەر كەرەك سياقتى. سونىمەن بىرگە كوممۋنالدىق سالا بولىمدەرى سەنبىلىكتە ەگىلگەن ءار اعاشتىڭ تاعدىرىنا جاۋاپتى بولۋى كەرەك. ويتكەنى ءار اعاشقا قارجى بولىنەدى.
جالپى, كوشەتتەر وتىرعىزۋ, جەكە اۋلالار مەن قوعامدىق ورىنداردىڭ اۋماعىن تازالاۋ, قالا مەن اۋىل كوشەلەرىن كورىكتەندىرىپ, اباتتاندىرۋ جۇمىستارى جىل بويى جالعاسا بەرەتىن جۇمىس. بيىل وبلىستىق جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسى 100 مىڭنان استام كوشەت وتىرعىزباق.
پاۆلودار وبلىسى
