ايماقتار • 09 قازان، 2019

قوستانايدا حالىقارالىق كىتاپحاناشىلار كونفەرەنتسياسى ءوتىپ جاتىر

247 رەتكورسەتىلدى

قوستانايدا  « ۇلى دالانىڭ جەتى قىرى: قازاقستاندىق قوعامنىڭ رۋحاني  دامۋىنداعى كىتاپحانالاردىڭ ءرولى» اتتى حالىقارالىق عىلىمي-تاجىريبەلىك كونفەرەنتسيا جۇمىسىن باستادى. وعان قازاقستاننىڭ وبلىستارىمەن قاتار رەسەيدىڭ قوستانايمەن كورشى چەليابى، قورعان، سۆەردلوۆ وبلىستارىنان دا كىتاپحانا ماماندارى قاتىسۋدا.

كونفەرەنتسيانىڭ پلەنارلىق ماجىلىسىندە وبلىستىق مادەنيەت باسقارماسىنىڭ باسشىسى ەرلان قالماقوۆ بۇل شارانىڭ قوستاناي جەرىندە كىتاپحانانىڭ جۇمىس ىستەي باستاعانىنا 125 جىل تولۋى اياسىندا ۇيىمداستىرىلعانىن ايتتى.

بايانداما جاساعان ل.تولستوي اتىنداعى وبلىستىق امبەباپ كىتاپحانانىڭ ديرەكتورى داريعا دۇيسەباەۆا وسى سالانىڭ تاريحىنا توقتالدى. ءبىلىم وشاقتارىنىڭ وتكەنى دە قىزىقتى، تاعلىمى مول.

«سوعىس جىلدارى ەلىمىزگە كەڭەس وداعىنىڭ مايدان ءجۇرىپ جاتقان وڭىرلەرىنەن قونىس اۋدارۋشىلار كەلدى. تەك قوستانايدىڭ وزىنە لەنينگرادتان، موسكۆادان، كيەۆتەن، سيمفەروپولدان 3000-نان اسا وتباسى قونىس اۋدارىلدى. سولاردىڭ ەسەبىنەن كىتاپحانالاردىڭ وقىرماندار قاتارى كوبەيدى. قونىس اۋدارۋشىلاردىڭ اراسىندا ءبىلىمدار ادامدار، ءبىلىمدى ماماندار كوپ بولاتىن. سولاردىڭ ەسەبىنەن وقىرماندار ساپاسى دا جوعارىلادى» دەدى داريعا تورەبايقىزى. بۇگىندە قازاقستاننىڭ بارلىق ايماعىنداعى سەكىلدى قوستانايدىڭ اۋدانداى مەن قالالارىنداعى كىتاپحانالار كىتاپ مەن مەرزىمدى باسىلىمدارعا باي، ولار ناعىز مادەنيەت وشاعىنا اينالعان.

قازاقستان ۇلتتىق كىتاپحاناسىنىڭ ديرەكتورى باقىتجامال وسپانوۆا باس كىتاپحانانىڭ قول جەتكەن جەتىستىكتەرى مەن جالپى ەلىمىزدەگى كىتاپحانالاردىڭ وزەكتى ماسەلەلەرى تۋرالى اڭگىمەلەدى. كىتاپحانانىڭ 4 ميلليون وقىرمانى بار. بارلىق جاڭا تەحنيكا جانە تەحنولوگيالارمەن جابدىقتالعان، الەم كىتاپحانالارىمەن تىعىز بايلانىستا جۇمىس ىستەيدى.

«كىتاپحانانىڭ بۇگىنگى باستى وزەكتى ماسەلەسى تسيفرلاندىرۋ بولىپ تابىلادى. وسى كەزگە دەيىن 6 60 000-نان اسا قۇجاتتاردى تسيفرلاندىردىق. ونىڭ تەڭ جارتىسىنا جۋىعى قازاق تىلىندەگى قۇجاتتار. ەكىنشىدەن ماماندار دايىنداۋ دا وتكىر تۇر. ءبىز بۇل جۇمىستى ءوز كىتاپحانامىزدا ۇيىمداستىرامىز» دەدى باقىتجان قايىربەكقىزى.

تاريح عىلىمدارىنىڭ دوكتورى، قازاقستان جۋرناليستەر اكادەمياسىنىڭ پرەزيدەنتى، قازاقستاننىڭ تۇڭعىش پرەزيدەنتى سىيلىعىنىڭ لاۋرەاتى، قازاقستان جۋرناليستەر لداعىنىڭ التى دۇركىن لاۋرەاتى ساعىمباي قوزىباەۆ تا كونفەرەنتسيا قوناعى بولدى. ول قاتىسۋشىلارعا رۋحاني دۇنيەمىز بەن كىتاپحانا بايلانىسى تۋرالى تاعىلىمدى اڭگىمە ايتتى.

كونفەرەنتسياعا قاتىسۋشىلار مۇنان كەيىن سەكتسيالارعا ءبولىنىپ جۇمىس ىستەدى. ەكى كۇنگە جوسپارلانعان كونفەرەنتسيا جۇمىسى ەرتەڭ جالعاسادى.

سوڭعى جاڭالىقتار

ۇقساس جاڭالىقتار