قوعام • 09 قازان، 2019

قىزدار ۋنيۆەرسيتەتىنىڭ جاس عالىمدارى جاڭا جوبانى قولعا الدى

43 رەتكورسەتىلدى

قازاق ۇلتتىق قىزدار پەداگوگيكالىق ۋنيۆەرسيتەتىنىڭ باستاماسىمەن قۇرىلعان قازاقستاننىڭ جاس پەداگوگ-عالىمدارى قاۋىمداستىعى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا جارىق كورگەن كىتاپتاردى كەڭىنەن ناسيحاتتاۋ ماقساتىنداعى باستامانى قولعا الدى.

اتاپ ايتقاندا، جاس عالىمدار بۇگىنگە دەيىن اۋدارىلعان 30-عا جۋىق ەڭبەكتى وقىپ، تالقىلاۋ ءۇشىن اتالعان ۇيىمنىڭ مۇشەلىگىنە كىرەتىن جوعارى وقۋ ورنىنىڭ 1 كۋرس ستۋدەنتتەرىنە ەستافەتا جولداماق.

ەستافەتاعا قاتىسۋ ءۇشىن ستۋدەنتتەر قازاق تىلىنە اۋدارىلعان كىتاپتاردىڭ ءبىرىن وقىپ، مازمۇنىنا وراي بەينەبايان ءتۇسىرۋى كەرەك. سونداي-اق بەينە ماتەريالدى Facebooك جەلىسىنە قىزدار ۋنيۆەرسيتەتىنىڭ Qyzdar Ýnıversıteti رەسمي پاراقشاسىن بەلگىلەي وتىرىپ جۇكتەۋ قاجەت.

– قازاق ۇلتتىق قىزدار پەداگوگيكالىق ۋنيۆەرسيتەتىنىڭ تابالدىرىعىن بيىل اتتاعان ستۋدەنتتەر «كوپكە ۇمتىلعان جالعىز» كىتابىن وقىپ، اتالعان ەڭبەكتىڭ مازمۇنىمەن تولىق تانىسىپ شىقتى. ونى تالقىلاۋ ماقساتىندا جيىندار مەن پىكىر الماسۋلار دا وتكىزىلدى. سونىمەن قاتار «Qyzdar Ýnıversıteti» گازەتىنە ماقالالار جازىپ، ادامزات دامۋىنىڭ كوكجيەگىنە جول اشاتىن وقۋلىقتاردىڭ ەرەكشەلىگىنە شولۋ جاسادى. ءبىزدىڭ كوزدەگەنىمىز بۇل يگىلىكتى ىسكە وزگە دە جوعارى وقۋ ورىندارىن تارتۋ. وسى ارقىلى جاستارعا دۇنيەجۇزىندەگى تاڭداۋلى ۇلگىلەردىڭ نەگىزىندە ءبىلىم الۋىنا مۇمكىندىك جاساۋ، – دەپ اتاپ ءوتتى جاندار اسان.

ەستافەتا سوڭىندا بارلىق بەينە ماتەريال جيناقتالىپ، سونىڭ نەگىزىندە شاعىن فيلم جارىق كورمەك. ول قازاقستاننىڭ جاس پەداگوگ-عالىمدارىنىڭ ءۇشىنشى سلەتى قارساڭىندا كوپشىلىك نازارىنا ۇسىنىلماقشى.

قازىرگى تاڭدا قازاق تىلىنە اۋدارىلعان كىتاپتار مەن جوعارى وقۋ ورىندارىنىڭ ءتىزىمى ءتۇزىلىپ، بەينەباياندى تۇسىرەتىن ناقتى مەرزىمى بەكىتىلگەن.

ايتا كەتەيىك، بىلتىر قازاقستان جاس پەداگوگ-عالىمداردىڭ ءبىرىنشى رەسپۋبليكالىق سلەتى قارساڭىندا وتاندىق جاس پەداگوگ-عالىمداردىڭ قاۋىمداستىعى قۇرىلدى. قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆانىڭ يدەياسىمەن قۇرىلعان ۇيىم مەملەكەت پەن قوعام دامۋىنا بەلسەندى قىزمەت ەتەتىن، جاڭاشا تۇرعىدا ويلاي الاتىن جاڭاشىل جاستاردى بىرىكتىرىپ، ولاردىڭ ديالوگ الاڭىن قۇرۋدى ماقسات تۇتادى. بۇگىنگە دەيىن اتالعان قاۋىمداستىقتىڭ ۇيىتقى بولۋىمەن بىرنەشە جوبالار ءساتتى جۇزەگە اسىرىلدى.

سوڭعى جاڭالىقتار

ۇقساس جاڭالىقتار