«ارينە, كاسىپكەر ءارى وتباسىنىڭ بەرەكەسى بولىپ جۇرگەن ايەلدەرگە بىردەن ساحناعا شىعۋ وڭاي ەمەس. سودىقتان ءبىز بىرنەشە كۇن ولارمەن جۇمىس ىستەدىك, شەبەرلىك كلاسىن وتكىزدىك. جىل اياعىندا نۇر-سۇلتان قالاسىندا قورىتىندى بايقاۋ بولادى. بۇكىل وڭىرلىك ساتىداعى بايقاۋلاردىڭ جەڭىمپازدارى قورىتىندى رەسپۋبليكالىق ساتىدا ءوز وبلىستارىنىڭ نامىسىن قورعايتىن بولادى», دەدى بايقاۋدى ۇيىمداستىرۋشى ساۋلە قايسار.
بايقاۋعا قاتىسقان 8 بيزنەس-حانىمدار الدىن الا دايىنداعان بەينە ماتەريال ارقىلى وزدەرىن تانىستىردى. سودان كەيىن ولار پاراسات پايىمى دەڭگەيى بويىنشا باسەكەگە ءتۇستى. جارىستىڭ ءۇشىنشى ساتىسىندا كورەرمەن الدىندا ونەرىن كورسەتتى. بايقاۋعا قاتىسقان حانىمداردىڭ ادەمىلىگىن بىلاي قويعاندا, بارلىعى دا ىسكەر, وتباسىنىڭ ۇيتقىسى, بالا تاربيەلەپ وتىرعان انالار. الايدا جارىستىڭ ماقساتى ۇزدىكتى انىقتاۋ بولعاندىقتان, قازىلار القاسىنىڭ تاڭداۋى رۋدنىيلىق اننا ناسيبۋلليناعا ءتۇستى. كەنشىلەر قالاسىنداعى قىزمەت كورسەتۋ سالاسىندا كاسىپكەرلىگىن ءۇيىرىپ وتىرعان اننا بايقاۋدىڭ بارلىق شارتتارى بويىنشا جاقسى ونەر كورسەتتى. ول ەندى جىل اياعىندا نۇر-سۇلتان قالاسىندا وتەتىن رەسپۋبليكالىق بايقاۋدا باعىن سىنايدى.
