ايماقتار • 09 قازان، 2019

اتىراۋدا 3D فورماتىنداعى جاياۋ جۇرگىنشىلەر بەلگىسى سالىندى

38 رەتكورسەتىلدى

اتالعان جۇرگىنشىلەر جولاعى  قالا كوشەلەرىندەگى جول-كولىك وقيعالارىنىڭ سانىن ازايتۋعا  باعىتتالعان،  دەپ حابارلايدى اتىراۋ وبلىسىنىڭ وڭىرلىك كوممۋنيكاتسيالار قىزمەتى.

3D فورماتىنداعى العاشقى جاياۋ جۇرگىنشى جولى قۇلمانوۆ كوشەسىندە پايدا بولدى. مۇنداي ەرەكشە جۇرگىنشىلەر جولى شەتەل تاجىريبەسىندە  بار، ال  قازاقستاندا ءۇش ولشەمدى «جولاقتار» تەك ءىرى قالالاردا عانا جاسالىنعان. ەندى، مۇنداي وتكەلدى  قالامىزدىڭ ورتالىق كوشەلەرىنەن دە كەزدەستىرۋگە بولادى.  جوبا  قالالىق تۇرعىن ءۇي-كوممۋنالدىق شارۋاشىلىعى جولاۋشىلار كولىگى جانە اۆتوموبيل جولدارى  ءبولىمىنىڭ باستاماسىمەن قولعا الىنعان.

-3D فورماتتاعى جاياۋ جۇرگىنشىلەر  جولى -  قالا كوشەلەرىندەگى جازاتايىم وقيعالاردىڭ الدىن-الۋ ماقساتىندا، جولدان ءوتىپ بارا جاتقان جاياۋ جۇرگىنشىلەردىڭ ءومىرىن قاۋىپسىزدەندىرۋگە ارنالعان. قازىرگى تاڭدا قالالىق تۇرعىن ءۇي-كوممۋنالدىق شارۋاشىلىق ءبولىمى بۇل باعىتتا اۋقىمدى جۇمىستار جۇرگىزۋدە. ماسەلەن،  اعىمداعى جىلدىڭ وزىندە وبلىس ورتالىعىندا 315 جاڭا جول بەلگىلەرى ورناتىلىپ، جاياۋ جۇرگىنشىلەر جولى زاماناۋي جارىقتاندىرعىشتارمەن جارىقتاندىرىلدى، - دەيدى قالالىق تكش ءبولىمىنىڭ ءباسپاسوز حاتشىسى اڭساعان ساعىنباەۆا.

سونىمەن قاتار، اتىراۋ قالاسىنىڭ مەكتەپتەرى مەن بالاباقشالارىنىڭ ماڭىندا جول بەلگىلەرى جاڭارتىلىپ، قالا ماڭىنداعى ەلدى مەكەندەردە  جاياۋ جۇرگىنشىلەر وتكەلىنە ارنالعان جارىقديودتى شامدار ورناتىلعان.

ايتا كەتەيىك، سوڭعى سەلەكتورلىق جينالىس كەزىندە اتىراۋ وبلىسىنىڭ اكىمى نۇرلان نوعاەۆ جول قاۋىپسىزدىگى تاقىرىبىن تالقىلاپ، پوليتسيا دەپارتامەنتىنىڭ باسشىلىعىنا جانە جەرگىلىكتى اتقارۋشى ورگاندارعا  جول-كولىك وقيعالارىنىڭ سانىن ازايتۋ جونىندە بىرقاتار تاپسىرمالار بەرگەن بولاتىن.

سوڭعى جاڭالىقتار

ۇقساس جاڭالىقتار