ساياسات • 09 قازان، 2019

موحامماد فايزي: تاليبان الەمگە قاۋىپ ءتوندىرىپ تۇر

67 رەتكورسەتىلدى

نۇر-سۇلتاندا ءوتىپ جاتقان ەۋروپاداعى قاۋىپسىزدىك جانە ىنتىماقتاستىق ۇيىمىنىڭ اۋعانستان ماسەلەلەرى بويىنشا دوڭگەلەك ۇستەلىندە اۋعانستان يسلام رەسپۋبليكاسىنىڭ قاۋىپسىزدىك جانە شەكارالىق ىستەر ماسەلەلەرى بويىنشا ىنتىماقتاستىق دەپارتامەنتىنىڭ ديرەكتورى موحامماد فايزي وسىلاي دەدى.

«جىلدار بويى اۋعانستان تەرروريزمنىڭ قۇربانى بولىپ كەلەدى. ءبىزدىڭ ەل - بۇل جاعدايمەن كۇرەسۋدە بارىنەن كوپ زارداپ شەككەن مەملەكەت. ءبىز تەرروريزممەن كۇرەس ۇجىمدىق سيپاتقا يە بولۋ كەرەك دەپ ەسەپتەيمىز. تاليبان – اۋعانستان اۋماعىندا جۇرگەن شەتەلدىك قارۋلى توپتاردىڭ سەرىكتەسى. قارۋلى توپتار ءارتۇرلى ۇلتتاردان تۇرادى. سول سەبەپتى، ولار اۋعانستاننان بولەك، بۇكىل الەمگە قاۋىپ ءتوندىرىپ تۇر. وكىنىشكە قاراي، تاليبان اۋعانستاننان تىس تا وزىمەن سەرىكتەس كۇشتەرگە قارۋ، ادام مەن بازالاردى شىعارىپ بەرۋگە قاۋقارلى. ولار ەسىرتكىدەن پايدا تابادى. تابىستىڭ تۇراقتى تۇردە ءتۇسىپ تۇرۋى ولارعا كريمينالدىق سينديكاتتارمەن بايلانىس ۇستاپ وتىرۋعا جول اشادى. ەسىرتكى– تاليبتەر ءۇشىن تابىس كوزى بولىپ وتىر» دەدى موحامماد فايزي.

ونىڭ ايتۋىنا قاراعاندا، اۋعان بيلىگى ەسىرتكىمەن كۇرەستى بارىنشا قاتاڭ جۇرگىزۋگە تىرىسادى. ەسىرتكى وسىرىلەتىن الاڭدارعا ارنايى اسكەري ۇشاقتار ۇشىرادى. ەسىرتكى ساۋداسىنىڭ جولىن كەسۋدى بارىنشا كۇشەيتىپ كەلەدى. دەسە دە، اۋعانستاننان تىس تا گەروين وندىرەتىن لابوروتوريالار بار. حالىقارالىق دەڭگەيدە ەسىرتكىگە دەگەن سۇرانىس جوعارى. سۇرانىس اقىرى تاليباندىقتارعا دا، كريمينالدىق سينديكاتتارعا ىستەرىن جالعاستىرا بەرۋگە مۇمكىندىك بەرىپ وتىر.

«سول سەبەپتى، ەسىرتكى ترافيگى ماسەلەسىمەن بىرلەسە كۇرەسۋىمىز كەرەك» دەدى ول.

سوڭعى جاڭالىقتار

ۇقساس جاڭالىقتار