ساياسات • 09 قازان، 2019

مۇحتار تىلەۋبەردى: اۋعانستان ەكونوميكاسىن كورشى ەلدەرمەن ينتەگراتسيالاۋدىڭ ماڭىزى زور

56 رەتكورسەتىلدى

سىرتقى ىستەر ءمينيسترى مۇحتار تىلەۋبەردى ەلوردادا ءوتىپ جاتقان ەۋروپاداعى قاۋىپسىزدىك جانە ىڭتىماقتاستىق ۇيىمىنىڭ اۋعانستان ماسەلەلەرى بويىنشا دوڭگەلەك ۇستەلىندە اۋعانستاننىڭ ەكونوميكاسىن كورشى ەلدەرمەن، سونىڭ ىشىندە ورتالىق ازيا مەملەكەتتەرمەن ينتەگراتسيالاۋدىڭ ماڭىزى زور ەكەنىن ايتتى.

«سوڭعى 28 جىلدا قازاقستان ايماقتاعى تاريحى مەن مادەنيەتى ورتاق سەرىكتەستەرىمەن تىعىز بايلانىس ورناتۋدا تىڭ باستامالاردى كوتەرىپ كەلەدى. كەزىندە تاريحي تۇرعىدا زور ماڭىزعا يە بولعان جىبەك جولى بويىنداعى ورتالىق ازيا ەلدەرىنىڭ گەوگرافيالىق ورنالاسۋى – ءوزارا قارىم-قاتىناستى كۇشەيتۋگە مۇمكىندىك بەرەدى. سونداي-اق ورتالىق ازيا مەملەكەتتەرى باسشىلارىنىڭ بەيرەسمي وتىرىسىنىڭ ارقاسىندا ىنتىماقتاستىققا جاڭا جول اشىلدى. قازىرگى تاڭدا ءبىزدىڭ كوشباسشىلار ورتاق مىندەتتەردى ورىنداۋدا ورتاق امال-ادىستەردى ويلاپ تابۋعا نىق سەنىممەن كەلە جاتىر. ماسەلەن، 2018 جىلدىڭ تامىزىندا ورتالىق ازيا ەلدەرىنىڭ باسشىلارى تۇرىكمەنستاندا كەزدەسىپ، ارال تەڭىزىن الىپ قالۋ شارالارىن تالقىلادى. الايدا ءبىزدىڭ ءبارىمىز دە بۇگىن، ەرتەڭ ءۇشىن دە كۇردەلى ماسەلەلەلەردىڭ ءبىرى – اۋعانستانداعى تۇراقتىلىققا بايلانىستى ەكەنىن بىلەمىز» دەدى سىرتقى ىستەر ءمينيسترى.

سونداي-اق مينيستر اۋعانستاننىڭ تۇراقتى تۇردە دامۋى، ونداعى بەيبىتشىلىك پەن تۇراقتىلىق – ايماقتاعى ىنتىماقتاستىقتىڭ دامۋىنا نىق ۇلەس قوساتىنىن ايتتى.

«قازاقستان – ايماقتىق ىنتىماقتاستىقتىڭ بەلسەندى ادۆوكاتى رەتىندە ايماقتاعى «ويىنشىلار» اراسىنداعى ءوزارا تۇسىنىستىككە جەتۋ ءۇشىن كۇش بىرىكتىرۋدى كوزدەيدى. اۋعانستان تولىعىمەن بەيبىت پروتسەسسكە، ومىرگە ورالىپ، حالىقارالىق الاڭدا قازاقستان ساياساتى ءۇشىن باسىمدىققا يە ەلدەردىڭ ءبىرى بولىپ قالا بەرەدى» دەدى ول.

مۇحتار تىلەۋبەردى ءوز سوزىندە ءوزارا ىنتىماقتاستىقتىڭ اياسىن كەڭەيتە وتىرىپ، اۋعانستاننىڭ ەكونوميكاسىن كورشى ەلدەرمەن، سونىمەن بىرگە، ورتالىق ازيا مەملەكەتتەرمەن ينتەگراتسيالاۋدىڭ ماڭىزى زور ەكەنىن اتاپ ءوتتى.

«ەكى اپتا بۇرىن قاسىم-جومارت توقاەۆ نيۋ-يوركتەگى بۇۇ باس اسسامبلەياسىنىڭ 74-ءشى سەسسياسىندا ءبىزدىڭ ەلىمىزدىڭ اۋعانستانعا كومەك كورسەتۋدى جالعاستىرۋعا دايىن ەكەنىن بىلدىرگەن بولاتىن. مەملەكەت باسشىسى مىقتى ىنتىماقتاستى، ۇزاق مەرزىمدى ينۆەستيتسيا مەن ايماقتىق كەلىسىم تابىس پەن ەلدەگى بەيبىت پروتسەستەرگە قول جەتكىزۋدى شەشۋشى فاكتور ەكەنىن اتاپ ءوتتى» دەدى مينيستر.

سوڭعى جاڭالىقتار

ۇقساس جاڭالىقتار