قوعام • 09 قازان، 2019

تۋريستىك سالانىڭ تامىرىنا قان جۇگىرسە...

55 رەتكورسەتىلدى

پرەزيدەنت قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتالاتىن قازاقستان حالقىنا ارناعان جولداۋىندا: «ەكونوميكانىڭ ماڭىزدى سالاسى رەتىندە ءتۋريزمدى، سونىڭ ىشىندە ەكو جانە ەتنوتۋريزمدى دامىتۋعا باسا نازار اۋدارۋ كەرەك.

التىن وردانىڭ 750 جىل­دىعىن ءبىزدىڭ تاريحىمىزعا، مادەنيەتىمىزگە، تابيعاتىمىزعا تۋريستەردىڭ قىزىعۋشىلىعىن ارتتىرۋ ماقساتىندا اتاپ ءوتۋى­مىز قاجەت. ءتۋريزمدى دامىتۋ ءۇشىن قاجەتتى ينفراقۇرىلىم­دار قۇرىلىسىمەن، ەڭ الدىمەن جولمەن قامتاماسىز ەتۋ، سونداي-اق بىلىكتى مامانداردى دايارلاۋ ماڭىزدى»، دەدى.

سوڭعى بىرنەشە جىل بويى باتىس قازاقستان وڭىرىندە ىشكى ءتۋريزمدى دامىتۋ بويىنشا قىز­مەت ەتىپ جۇرگەندىكتەن، پرەزي­دەنتىمىز كوتەرگەن كەرەمەت يدەيا ءۇشىن قاتتى قۋاندىم. راسىندا دا دۇرىس جولعا قويسا، ەكونوميكانى دامىتاتىن كورسەتكىشتىڭ ءبىرى – وسى تۋريزم.

مەملەكەت باسشىسى ينفرا­قۇرىلىمدى دامىتۋ تۋرالى ايتتى. ءبىزدىڭ باتىس قازاقستان وبلىسىندا ءالى كۇنگە اسفالت جەتپەي جاتقان ەكى ءوڭىر – جانىبەك جانە بوكەي ورداسى اۋداندارى بار. ەكەۋى دە تۋريستىك الەۋەتى وتە جوعارى ءوڭىر. بوكەي ورداسىندا ايگىلى حان ستاۆكاسى – جالپىۇلتتىق كيەلى نىساندار قاتارىنا ەنگەن بوكەي ورداسى تاريحي-مۋزەي كەشەنى بار. وسى وڭىرگە جول قۇرىلىسى باستالعانىمەن، ءالى قارقىندى ەمەس. سوندىقتان پرەزيدەنت­تىڭ جولداۋى وسى جول قۇرىلىسى­نا دا بەلسەندىلىك اكەلەدى دەپ ۇمىتتەنەمىن. جول سالىنىپ بىتسە، وبلىس ەكونوميكاسىنىڭ دامۋىنا سەپتىگىن تيگىزەر ەدى دەگەن ويدامىن.

شىنىن ايتساق، باتىس قازاق­­ستان وبلىسىندا تۋريس­تەر­دى قىزىقتىراتىن تاريحي-تابي­عي نىساندار كوپ. امال نە، ول جەرلەردە «جۇم­ساق» ينف­راقۇرىلىم: جول سىلتە­مەلەرى، اجەتحانا، اۆتوكولىك تۇراعى، ءبولىپ جينايتىن قوقىس ورنى، سۋ، ت.ب. جوق. ەڭ باستىسى، جانا­شىر قوجايىن جوق. ارينە قا­عاز جۇزىندە قوجايىن بار، بىراق بارساڭ، ەشكىم جوق.

مىسالى، اقجايىق وڭىرىن­دەگى ەڭ ايگىلى شالقار كولىن الايىق. جاز بويى كول جاعاسىن­دا قۇرىلعان كيىز ءۇي، شاتىر­دىڭ سانى بىرنەشە جۇزدەن اسىپ كەت­تى. ياعني، قىزمەت كورسەتۋشى دە بار، تىنىعۋشىلار دا بار. بىراق كول جاعاسىنا كەلگەن تۋريس­كە قىزمەت كورسەتۋشىلەر ارنايى ءبىلىم الماعان، اركىم ءوز بىلگەنىنشە ءجۇر. سوندىقتان دا بۇل قىزمەت ءتيىستى دەڭگەيدە ەمەس. ءبىز شالقار كولى بويىنشا ءوز جوبامىزدى تەرەكتى اۋدانى اكىمدىگىنە ۇسىندىق: ارنايى مامانداردى شاقىرىپ، كول جاعاسىنا كەلگەن حالىققا قىز­مەت كورسەتۋشى ءسارىومىر اۋىلى­نىڭ تۇرعىندارىن اۋىل ءتۋريزمى بو­يىنشا وقىتىپ، سەرتيفيكات بەرۋ كەرەك. بۇعان قوسا شالقار كولىنىڭ جاعاسىن سپورت ايماعى، اۆتوتۇراق ايماعى، ساۋدا-ساتتىق ايماعى، دەمالۋ ايماعى دەپ ءتۇرلى ساناتقا ءبولۋ; جاعاجايعا جارىق، سۋ، وتكىزۋ; ءاربىر قىزمەت كورسەتۋشىگە تۇراقتى جەر تەلىمىن تومەن قارجىمەن جالعا بەرۋ; سۋ بويىندا 500 مەترلىك قورعاۋ ايماعىن ساقتاۋ سەكىلدى ماسەلەلەر كۇن تارتىبىندە تۇر. اۋدان اكىمدىگى بۇل جوبانى قولدايدى دەپ ويلايمىز. مىنە، وسى ماسەلەلەر جولعا قويىلسا، شالقار كولى ۇلگىلى دەمالىس ورنىنان اينالار ەدى. بۇل جەردى تەك جازدا ەمەس، قىستا دا پايدالانىپ، «قانسونار» بايقاۋىن وتكىزۋ، شانا، شاڭعى سپورتىن دامىتىپ، بەلسەندى دەمالىس ايماعىنا اينالدىرۋ جونىندە جوبامىز دا بار.

ايتپاقشى، پرەزيدەنت ءوز سوزىندە قازاقستان ىشىندەگى ۇشاق بيلەتىنىڭ وتە قىمبات بولۋىن سىنادى. ەگەر جول قۇنى تومەندەسە، بۇل دا قازاق­ستان­دىقتاردىڭ قارىم-قاتىناسىن دامىتۋعا، ياعني تۋريزمگە قوسال­قى تىنىس بەرۋگە ىقپال ەتەر ەدى.

سونداي-اق مەملەكەت باسشى­سى كوتەرگەن شاعىن كاسىپكەر­لىكتى سالىقتان بوساتۋ ماسەلەسى – بيزنەستىڭ دامۋىنا وراسان زور ىقپال ەتەتىن ۇلەس دەپ ويلايمىن. سوڭعى كەزدەرى اقجايىق وڭىرىندە باس بىرىكتىرە باستاعان قولونەر شەبەرلەرى وسى جاڭالىققا ەرەكشە قۋانىپ جاتىر. جوعارىدا ايتىلعانداردىڭ ءبارى جۇزەگە اسسا، مەملەكەتتىڭ مۇمكىندىگىن ارتتىراتىن ماڭىزدى سالانىڭ تامىرىنا قان جۇگىرەر دەگەن ويدامىز.

 

ايبولات قۇرىمباەۆ،

«Tourwestkaz» توبىنىڭ جەتەكشىسى

 

باتىس قازاقستان وبلىسى

 

سوڭعى جاڭالىقتار

ۇقساس جاڭالىقتار