«اقش-تا ەلەكتروندى تەمەكىلەردى شەككەن ادام ءولىمىنىڭ بەسىنشى جاعدايى تىركەلدى. اقش دەنساۋلىق ساقتاۋ مينيسترلىگى ەلەكتروندى تەمەكىنى پايدالانۋدان پايدا بولاتىن بەلگىسىز اۋرۋعا بايلانىستى, ادامداردى ولاردان باس تارتۋعا شاقىرۋدا. بۇگىنگى تاڭدا ۆەيپينگپەن بايلانىستى تىنىس الۋ جۇيەسىنىڭ پروبلەماسىمەن ەمدەۋگە جاتقىزىلعان 500-دەن اسا جاعداي تىركەلگەن. ايرىقشا تارالعان اۋرۋ بەلگىلەرى جوتەل, كەۋدەنىڭ اۋىرسىنۋى, اۋانىڭ جەتىسپەۋى, قالتىراۋ, باس اۋرۋى, ەستەن تانىپ قالۋ, ديارەيا, انورەكسيا, سالماق جوعالتۋ جانە ت.ب. بولدى. برونحوسكوپيا بۇل اۋرۋدىڭ جۇقپالى ەمەس ەكەندىگىن انىقتاۋعا مۇمكىندىك بەردى. رەنتگەنوگرامما وكپەنىڭ استىڭعى بولىگىنىڭ كۇڭگىرتتەنگەنىن, كومپيۋتەرلىك توموگرافيا - وكپە الۆەولارى ۇلپىلدەلىگىنىڭ تومەندەگەنىن كورسەتتى», دەلىنگەن حابارلامادا.
اۋەلى باستان ەلەكتروندى تەمەكىلەر مەن ۆەيپەرلەر شىلىم شەگۋدى تاستاۋعا نەمەسە 18 جاستان جوعارى ادامدار ءۇشىن زياندى ادەتتىڭ زالالىن تومەندەتۋگە كومەكتەسەتىن قۇرال رەتىندە ۇسىنىلعان. الايدا سوڭعى جىلدارى ولار مەكتەپ وقۋشىلارى مەن جاستار اراسىندا تانىمال بولىپ كەتتى.
ۆەيپتىڭ نەگىزگى كومپونەنتتەرى نيكوتين, پروپيلەنگليكول – ە1520 تاعامدىق قوسپاسى, گليتسەرين, سۋ جانە يىستەندىرگىشتەر (اروماتيزاتورلار).
گارۆارد عالىمدارى ەلەكتروندى تەمەكىلەرگە ارنالعان بىررەتتىك كارتريدجدەردىڭ 75 بەلگىلى ماركاسى مەن ۆەيپتەرگە قايتا قۇياتىن سۇيىقتىقتاردى زەرتتەگەن. ناتيجەسىندە دەمىكپەنى, وكپەنىڭ قابىنۋى مەن قىزمەتىن تومەندەتەتىن اۋرۋلاردى تۋدىراتىن باكتەريالىق جانە زەڭدىك توكسيندەردىڭ ىزدەرىن انىقتاعان. باكتەريالىق توكسيندەر جەمىس ءدامى بار ۆەيپتەردە ءجيى كەزدەستى, ال زەڭدىك توكسيندەر تەمەكى جانە مەنتول ءيىسى بار تولتىرمالاردا كەزدەسكەن.
«بۇگىنگى تاڭدا ورىن العان جاعدايلارعا بايلانىستى, بۇكىل الەمنىڭ عالىمدارى دۇنيەجۇزىلىك دەنساۋلىق ساقتاۋ ۇيىمىمەن بىرلەسىپ ەلەكتروندى تەمەكىلەردىڭ ادام دەنساۋلىعىنا تيگىزەتىن زالالىن زەردەلەۋدە, الايدا ءبىز ءوزىمىزدى جانە بالالارىمىزدى اقش-تا بولعان ەپيدەمياعا ۇقساس جاعدايدان قورعاۋىمىز قاجەت. وسىعان بايلانىستى, قوعامدىق دەنساۋلىق ساقتاۋ ۇلتتىق ورتالىعى قازاقستاندىقتارعا ەلەكتروندى تەمەكىلەردەن باس تارتۋ مۇمكىندىگىن قاراستىرۋدى ۇسىنادى. ۆەيپتەردى قاۋىپسىز دەپ ساناۋعا بولمايدى. ونىڭ قۇرامىندا كانتسەروگەندەرمەن بىرگە اعزانى ۋلايتىن الەۋەتتى زياندى قوسىندىلار مەن ۋىتتى قوسپالار بار, سونداي-اق مەتالل ىزدەرى نەمەسە قىزدىرعىش ەلەمەنتتىڭ, نە تەمەكى قۇرىلعىسىنىڭ باسقا بولىگىنىڭ ىزدەرى بار. بۇدان باسقا, دەۆايستار اتىلىپ, تۇتىنۋشى ادامدى جاراقاتتاۋى مۇمكىن», دەلىنگەن ورتالىق تاراتقان اقپاراتتا.
