سەنات توراعاسى وبلىستاعى كاسىپكەر ايەلدەرمەن كەزدەسۋدە مەملەكەتتىك باسقارۋعا, رەسپۋبليكالىق جانە ايماقتىق دەڭگەيدەگى وكىلدى ورگاندار جۇمىسىنا ايەلدەردىڭ قاتىسۋىن كەڭەيتۋ قاجەتتىگىن كوتەردى. د.نازارباەۆا كەزدەسۋگە قاتىسۋشىلارعا وتباسىلىق جانە گەندەرلىك ساياسات تۇجىرىمداماسىنىڭ جاڭا جوباسىن تالقىلاۋ تۋرالى اڭگىمەلەدى. گەندەرلىك تەڭدىك قاعيدالارى – قۇجاتتىڭ نەگىزىنە اينالىپ وتىر. ء«بىزدىڭ مىندەتىمىز – ايەلدەردىڭ مەملەكەتتىك باسقارۋعا, ساياسات پەن ەكونوميكاعا قاتىسۋىن كەڭەيتۋ. ماسەلە كەڭىنەن تالقىلانىپ جاتىر. اراب ەلدەرىندەگى احۋالمەن بىرگە الەمدىك تاجىريبەدە ايەلدەردىڭ ۇكىمەتكە, ايماقتارعا باسشىلىق ەتۋگە جانە دەپۋتاتتىق كورپۋسقا قاتىسۋىن كۆوتالاۋعا دەيىن اركەلكى شەشىمدەر اۋقىمىن كورسەتىپ وتىر»,- دەپ اتاپ ءوتتى د.نازارباەۆا.
سەنات باسشىسى جاستار جانە ەرىكتىلەر ۇيىمدارىمەن كەزدەسۋدە جاستار جىلى اياسىندا وڭىردە وتكەن شارالاردىڭ ناتيجەلەرىمەن, سونداي-اق جاستاردى قولداۋ جونىندەگى وبلىستىق باعدارلامالار مەن جوبالاردىڭ جۇزەگە اسۋ بارىسىمەن تانىستى. جاستاردىڭ ەرىكتىلەر قىزمەتىنە قاتىسۋىن ىنتالاندىرۋعا ەرەكشە نازار اۋدارىلدى. سەنات باسشىسىنىڭ ايتۋىنشا, ەلدەگى ەرىكتىلىكتى ىنتالاندىرۋ مەن كوتەرمەلەۋدىڭ ناقتى تەتىكتەرىن زاڭنامالىق تۇرعىدا بەكىتۋ قاجەت بولىپ وتىر.
داريعا نازارباەۆا سەنات دەپۋتاتتارىمەن بىرگە اۋە قورعانىسى كۇشتەرىنىڭ ت.بيگەلدينوۆ اتىنداعى اسكەري ينستيتۋتىندا بولدى. سەنات توراعاسى ينستيتۋتتىڭ ماتەريالدىق-تەحنيكالىق جابدىقتالۋىمەن تانىسىپ, وقىتۋشىلار قۇرامىمەن كەزدەستى جانە كۋرسانتتارمەن اڭگىمەلەستى. وقۋ ۇدەرىستەرىنىڭ ماتەريالدىق-تەحنيكالىق جابدىقتالۋى ماسەلەلەرى جانە بولاشاق ۇشقىشتار مەن اۋە ينجەنەرلەرىن دايارلاۋ ساپاسى كەزدەسۋدىڭ نەگىزگى تاقىرىبى بولدى.
سەنات توراعاسى وڭىردەگى بۇقارالىق اقپارات قۇرالدارىنىڭ باسشىلارىمەن كەزدەسۋدە ەلىمىزدىڭ اقپارات نارىعىنىڭ ماڭىزدى ماسەلەلەرىن تالقىلادى. د.نازارباەۆا ايماقتاعى ءداستۇرلى بۇقارالىق اقپارات قۇرالدارى مەن عالامتور جەلىسىنە جۇمىس ىستەيتىن جاڭا مەديا سالاسىنىڭ ەكونوميكالىق جاعدايىنا ەرەكشە نازار اۋداردى. سەنات باسشىسى ايماقتاعى بۇقارالىق اقپارات قۇرالدارىن ەلىمىزدەگى بۇقارالىق اقپارات قۇرالدارىن دامىتۋعا ارنالعان سالالىق باعدارلامانى ازىرلەۋگە بەلسەندى قاتىسۋعا شاقىردى.
