تالدىقورعان مەن تەكەلى قالالارىن جالعاپ جاتقان كۇرە جول بويىنداعى بۇلاق باسىنا قويىلعان ەسكەرتكىشكە مەتسەنات 20 ميلليون تەڭگە قاراجات جۇمساپتى. «تۋعان جەر» باعدارلاماسى اياسىندا ءوزى وسكەن ولكەنى وركەندەتۋگە ۇلەس قوسىپ جۇرگەن عالىم ەندى بۇل جەردە جۇرەك جاراستىعىمەن شاڭىراق كوتەرەتىن جۇبايلار كەلىپ, ءومىر بۇلاعىنان بىرگە سۋسىندايتىنىنا سەنىمدى.
– ءبىز زايىبىم كاشيپا ەكەۋمىز دە وسى جەتىسۋ اۋىلىنىڭ ورتا مەكتەبىندە وقىعانبىز. ەكەۋمىز تۇڭعىش رەت وسى بۇلاق باسىندا تانىسىپ, كەيىننەن ءدام-تۇزىمىز جاراسىپ, شاڭىراق كوتەردىك. ۇلدارىمىزدى ۇياعا, قىزدارىمىزدى قياعا قوندىرىپ, نەمەرەلەردىڭ قىزىعىن كورىپ وتىرمىز. مىنە, ەكەۋمىزدىڭ وتاۋ قۇرعانىمىزعا تابانى كۇرەكتەي ەلۋ جىل تولىپ وتىر. جارتىعاسىرلىق مەرەيتويىمىزدىڭ قۇرمەتىنە وسى ماحاببات ەسكەرتكىشىن ورناتىپ وتىرمىز. ونداعى ماقساتىمىز – وسى ءتاسمۇسىن ماڭگىلىك ماحابباتتىڭ سيمۆولى رەتىندە وسىندا كەلىپ, بۇلاقتىڭ سۋىنان ءدام تاتقان جاس جۇبايلاردىڭ دا ماحابباتتارىنىڭ ءمولدىر بولۋىنا ىقپال ەتىپ, ءبىزدىڭ جولىمىزدى بەرسىن دەگەن تىلەگىمىز ەدى, – دەدى ءمۇسىننىڭ اشىلۋىندا ءسوز العان قوناەۆ اتىنداعى زاڭ اكادەمياسىنىڭ رەكتورى ءومىرالى جالايري.
وسى ەسكەرتكىش-ستەللانىڭ اشىلۋ قارساڭىندا ءومىرالى شاكاراپ ۇلى مەن جارى كاشيپا اپايدىڭ وتاۋ قۇرعانىنا 50 جىل تولىپتى. التىن تويدىڭ كۋاسى بولىپ, ماحاببات ستەللاسىنىڭ اشىلۋ سالتاناتىن كورۋگە وبلىستىق ءماسليحاتتىڭ حاتشىسى سۇلتان دۇيسەنبينوۆ, وبلىستىق مادەنيەت سارايىنىڭ ديرەكتورى ءالي الپىسباەۆ, «جەتىسۋ» گازەتىنىڭ باس رەداكتورى امىرە ءارىن, وبلىستىق مادەنيەت باسقارماسىنىڭ باسشىسى مارلەن كولباەۆ, ەسكەلدى اۋدانىنىڭ اكىمى راۋان راقىمبەكوۆ, تەكەلى قالاسىنىڭ اكىمى باقتيار ونەرباەۆ, كوكسۋ اۋدانىنىڭ اكىمى الماس ءادىل جانە قازاق ەستراداسىنىڭ تانىمال اكتەرلەرى قاتىستى. شارادا ءسوز العان سۇلتان دۇيسەنبينوۆ يگى ىسكە ارقاۋ بولعان مەتسەنات ءومىرالى شاكاراپ ۇلىنا العىس ءبىلدىرىپ, الداعى ۋاقىتتا دا «رۋحاني جاڭعىرۋ» باعدارلاماسى اياسىندا جۇيەلى ىستەر اتقارىلاتىنىنا سەنىمى زور ەكەنىن ءبىلدىردى. سونداي-اق جاڭا ومىرگە اياق باسىپ, وتاۋ قۇرعالى تۇرعان 2 جۇپ وسى ماحاببات ەسكەرتكىشىنىڭ جانىنا كەلىپ, قۋانىشتى ءساتتىڭ كۋاسى بولدى. جاس جۇبايلارعا قۋانىش يەلەرىنىڭ اتىنان شاعىن سىيلىق تابىستالدى.
الماتى وبلىسى
