عىلىمي كونفەرەنتسيا باستالماس بۇرىن اۋليەاتا وڭىرىنە كەلگەن مارتەبەلى مەيماندار قاراحان كەسەنەسى, تۇڭعىش پرەزيدەنت ساياباعى, تاۋەلسىزدىك مەموريالى, «قازاق حاندىعى» مونۋمەنتى جانە ايشا ءبيبى, بابادجا حاتۋن كەسەنەلەرىنە ەكسكۋرسيا جاسادى. بۇدان كەيىن كەنەن ازىرباەۆ اتىنداعى جامبىل وبلىستىق فيلارمونياسى «الاتاۋ» قازاق فولكلورلىق-ەتنوگرافيالىق ۇجىمىنىڭ ونەرىن تاماشالاپ, « ۇلى جىبەك جولى» اتتى كىتاپ كورمەسىنە قاتىستى. اتالعان شارا اياسىندا قازاقستان ەتنوستارىنىڭ قولونەر كورمەسى مەن «جىبەك جولى بويىنداعى سۇحبات» اتتى فوتوكورمە ۇيىمداستىرىلىپ, LED ەكران ارقىلى «جىبەك جولى بويىنداعى سۇحبات» جوباسى تۋرالى تۇسىرىلگەن دەرەكتى فيلم كورسەتىلدى.
ءوز كەزەگىندە «جىبەك جولى بويىنداعى سۇحبات – 2019» حالىقارالىق مادەنيەتتانۋ جوباسىنىڭ اشىلۋ سالتاناتىنا ەلىمىزدەگى بەلگىلى جازۋشىلار مەن عىلىم قايراتكەرلەرى, سونىمەن قاتار رەسەي, قىرعىزستان, وزبەكستان, تاجىكستان, تۇرىكمەنستان ەلدەرىنىڭ جەتەكشى عالىمدارى, حالىقارالىق ساراپشىلارى, قازاقستان حالقى اسسامبلەياسى عىلىمي-ساراپشىلىق كەڭەس مۇشەلەرى, ەتنومادەني بىرلەستىكتەر مەن اسسامبلەيانىڭ كافەدرالارى قاتىستى. مادەنيەتتانۋ جوباسىنىڭ اشىلۋ راسىمىندە اۋەلى قازاقستان رەسپۋبليكاسى پرەزيدەنتىنىڭ جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ديرەكتورى, تاريح عىلىمدارىنىڭ دوكتورى, پروفەسسور ساتتار ءماجيتوۆ ءسوز الىپ, بۇل جيىننىڭ ماقساتى ۇلى جىبەك جولىنىڭ تاريحى مەن الەۋمەتتىك-مادەني تۇرعىدان جاڭعىرۋىن سارالاۋ, ورتا ازيا مەملەكەتتەرى اراسىنداعى ىنتىماقتاستىقتى نىعايتۋ, ورتاق مادەني جانە تاريحي قۇندىلىقتاردى ساقتاۋ, وركەنيەتارالىق ديالوگتى دامىتۋ ەكەنىن اتاپ ءوتتى. بۇدان كەيىن جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا تاراز شاھارىنىڭ تاريحى تەرەڭدە ەكەنىن, سان عاسىرلار بويى اتاقتى عالىمداردىڭ زەرتتەۋىنە ارقاۋ بولعانىن ايتا كەلىپ, كورنەكتى عالىمدار مەن تانىمال ساراپشىلاردىڭ قاتىسۋىمەن ءوتىپ وتىرعان كونفەرەنتسيا جۇمىسىنا ساتتىلىك تىلەدى. جيىندى جوبا اۆتورى, بەلگىلى مادەنيەتتانۋشى مۇرات اۋەزوۆ جۇرگىزىپ وتىردى.
جالپى, جىبەك جولى بويىنداعى سۇحبات تاريحي دەرەكتەر مەن شىعىستىق تانىم نەگىزىندە اسەرلى ءوربىدى. وزبەكستان رەسپۋبليكاسىنان كەلگەن شىعىستانۋشى الەكساندر دجۋماەۆ, رەسەي عىلىم اكادەمياسى شىعىستانۋ ينستيتۋتىنىڭ پروفەسسورى, تاريح عىلىمدارىنىڭ دوكتورى الەكساندر كادىرباەۆ, قىرعىزستان رەسپۋبليكاسىنان كەلگەن تاريح عىلىمدارىنىڭ دوكتورى, ورتا ازياداعى امەريكا ۋنيۆەرسيتەتىنىڭ پروفەسسورى چولپون تۋرداليەۆا, فيلوسوفيا عىلىمدارىنىڭ كانديداتى, تاجىكستان رەسپۋبليكاسى موەنشو نازارشوەۆ اتىنداعى حوروگ مەملەكەتتىك ۋنيۆەرسيتەتىنىڭ قىزمەتكەرى مۋنيرا تاۆاكالوۆا سياقتى شەتەلدىك عالىمدار مەن قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى الميرا ناۋرىزباەۆا, «القا» مادەني قورىنىڭ پرەزيدەنتى, اباي اتىنداعى قازاق ۇلتتىق پەداگوگيكا ۋنيۆەرسيتەتىنىڭ پروفەسسورى الۋا تاڭجارىقوۆا جانە وزگە دە تانىمال عالىمدار ۇلى جىبەك جولى تاريحى مەن ورتا ازيا حالىقتارىنىڭ مادەنيەتى جونىندە كەڭىنەن اڭگىمەلەدى. سونىمەن قاتار سۇحبات اياسىندا ۇلى جىبەك جولى ەلدەرىنىڭ جاس اۆتورلارى اراسىنداعى حالىقارالىق ALQA ادەبي بايقاۋىنىڭ تۇساۋكەسەرى ءوتتى. جيىن سوڭىندا «جاڭعىرۋ. ورتا ازيا حالىقتارىنىڭ تاريحي جانە زاماناۋي تاعىلىمى» تاقىرىبىنداعى «جىبەك جولى بويىنداعى سۇحبات – 2019» حالىقارالىق مادەنيەتتانۋ جوباسىنىڭ ناتيجەسى بويىنشا بەينەفيلم ءتۇسىرۋ جوسپارلانۋدا ەكەنى دە ايتىلدى.
جامبىل وبلىسى
