ادامداردىڭ ءومىر تۇرمىسىن جاقسارتۋدىڭ جانە جەڭىلدەتۋدىڭ ءبىر جولى – تازا اۋىزسۋعا, تابيعي گازعا, كولىك ينفراقۇرىلىمىنا قولجەتىمدىلىك دەڭگەيىن ارتتىرۋ بولىپ تابىلادى. وكىنىشكە قاراي, قازاقستانداعى قازىرگى جاعداي بىردەي ەمەس ەكەنى ءمالىم. وسى ورايدا پرەزيدەنت ءوزىنىڭ جولداۋىندا: «ەلىمىزدىڭ ءار ايماعىنىڭ تۇرعىندارىنىڭ تازا اۋىز سۋعا, تابيعي گازعا, كولىك ينفراقۇرىلىمىنا قول جەتكىزۋ دەڭگەيى بىركەلكى ەمەس ەكەنى بەلگىلى. وسى تەڭسىزدىكتى جويۋ ءۇشىن جۇمىستى جانداندىرۋ قاجەت. ەلباسىنىڭ تاپسىرماسى بويىنشا «سارىارقا» گاز قۇبىرىنىڭ ماگيسترالدى جەلىسىنىڭ ءبىرىنشى كەزەكتەگى قۇرىلىسى اياقتالىپ كەلەدى. كەلەسى جىلى نۇر-سۇلتان قالاسىندا جانە قاراعاندى, سودان سوڭ اقمولا مەن سولتۇستىك قازاقستان وبلىستارىندا تاراتۋ جەلىلەرىن سالۋ جۇمىستارى باستالادى. ناتيجەسىندە 2,7 ميلليوننان استام ادام تابيعي گازبەن قامتاماسىز ەتىلەتىن بولادى», دەگەن ەدى.
ۇكىمەتتىڭ ەسەبىنە جۇگىنسەك, «سارىارقا» ماگيسترالدى كوگىلدىر وتىن قۇبىرىنىڭ مىڭ شاقىرىمنان اساتىن العاشقى كەزەڭى مارەگە جەتۋگە جاقىن قالدى. العاشقى كەزەڭ اياقتالعاننان كەيىن نۇر-سۇلتان, قاراعاندى, تەمىرتاۋ, جەزقازعان, ساران, شاحتينسك قالالارىنىڭ جانە وسى شاھارلارعا جاقىن ورنالاسقان, قۇبىر جولىنىڭ بويىندا قونىس تەپكەن ەلدى مەكەندەردىڭ ءبارى تابيعي گازدىڭ قىزىعىن كورۋگە ءتيىس. ودان ءارى «سارىارقا» جوباسى «استانا – كوكشەتاۋ», «كوكشەتاۋ – پەتروپاۆل» باعىتىمەن جالعاسادى. جوبانىڭ جىلدىق قۋاتى 2,2 ملرد تەكشە مەتر گاز وتكىزۋگە جەتەدى. ۇلان-عايىر دالانى كوكتەپ وتەتىن قۇبىر جولىن سالۋ ءۇشىن «استاناگاز» قمگ» كومپانياسى قۇرىلدى, بۇل كومپانيانىڭ اكتسيونەرى «سامۇرىق – قازىنا» مەن «بايتەرەك» حولدينگى ەكەنىن ايتا كەتەيىك.
ەنەرگەتيكا مينيسترلىگى حابارلاعانداي, بىلتىر تامىز ايىنىڭ سوڭىندا ەكونوميكانى جاڭعىرتۋ جونىندەگى مەملەكەتتىك كوميسسياسىنىڭ شەشىمىمەن الىپ قۇرىلىس جوباسىن قارجىلاندىرۋ كەستەسى مەن تالاپتارى بەكىتىلدى. سونىمەن 80,3 ملرد تەڭگە جوعارىدا ايتقان ەكى اكتسيونەر كومپانياعا 40,15 ملرد تەڭگەدەن تەڭدەي ءبولىنىپ بەرىلدى. تاعى 102 ملرد تەڭگەنى قازاقستاننىڭ دامۋ بانكى مەن ەۋرازيالىق دامۋ بانكى, 85 ميلليارد تەڭگەنى «بجزق» اق ينۆەستيتسيالايتىن بولىپ كەلىسىلدى. قورىتا كەلگەندە الىپ جوبانىڭ جالپى قۇنى 263,3 ملرد تەڭگەنى قۇرادى. ونىڭ باس مەردىگەرى – «قازسترويسەرۆيس» كومپانياسى. بىلتىر قاراشا ايىندا «استاناگاز قمگ» مەن «قازسترويسەرۆيس» اراسىندا قۇرىلىس تۋرالى كەلىسىمشارت جاسالدى.
ەنەرگەتيكا مينيسترلىگىنىڭ حابارلاۋىنشا, قازىرگى تاڭدا قۇرىلىس جۇمىستارى قارقىندى ءجۇرىپ جاتىر.
– 1061,3 شاقىرىمدىق قۇبىر جولىن سالۋعا قاجەتتى قۇبىر ونىمدەرى تۇگەل جەتكىزىلدى, ونىڭ 1050 شاقىرىمى, ياعني 98,9 پايىزى جالعاندى. تاۋلىك سايىن ورتا ەسەپپەن 5,6 شاقىرىمدىق قۇبىر دانەكەرلەنىپ جاتىر, – دەپ حابارلادى مينيسترلىكتىڭ ءباسپاسوز قىزمەتى.
اۆتوماتتاندىرىلعان گازرەتتەگىش ستانسا سالۋعا كەرەكتى قۇرىلعىلاردىڭ 80 پايىزى ءتيىستى جەرىنە جەتكىزىلىپتى. ستانسالارداعى مونتاج جۇمىستارىنىڭ 63 پايىزى اياقتالعان. قۇرىلىس جۇمىستارى بەكىتىلگەن كەستەگە ساي ءجۇرىپ جاتىر دەۋگە بولادى.
– جالپى العاندا بيىل جەلتوقسان ايىندا بارلىق نىساندار سالىنىپ بىتەدى. اتاپ ايتقاندا, ماگيسترالدى گاز قۇبىرى, 5 اۆتوماتتاندىرىلعان گازرەتتەگىش ستانسا, گاز ولشەۋ جانە باسقارۋ ستانساسى دايىن بولادى. ياعني, قۇبىر جولى نۇر-سۇلتان قالاسىنا جوسپارلانعان مەرزىمدە – جەلتوقسان ايىندا جەتەدى, – دەپ حابارلادى ەنەرگەتيكا مينيسترلىگى.
«سارىارقا» جوباسىنىڭ حالىقتى كوگىلدىر وتىنمەن قامتىپ, الەۋمەتتىك احۋالىن جاقسارتۋدان باسقا دا يگى ىقپالى مول دەۋگە بولادى. ەلدىڭ بىرنەشە وڭىرىندە ينفراقۇرىلىمنىڭ دامىعانى شاعىن جانە ورتا بيزنەستىڭ دامۋىنا, سول ارقىلى ەكونوميكانىڭ كوتەرىلۋىنە ىقپال ەتەتىنى انىق.
وعان قوسا, ءومىر باقي كومىر جاعۋدان كوزى اشىلماعان وڭىرلەردىڭ تابيعي گازعا كوشكەنى اۋاعا تارايتىن زياندى قالدىقتاردى دا ازايتىپ, ەكولوگيالىق احۋال جاقسارا تۇسپەك. ميلليونداعان ادام قونىس تەپكەن قالالار مەن وزگە دە ەلدى مەكەندەردە ەكولوگيالىق احۋالدىڭ تۇزەلگەنى حالىقتىڭ دەنساۋلىعىن جاقسارتۋعا سەپتەسەرى ءسوزسىز.
