بۇل شەتەلدە تۇراتىن وتانداستارمەن بايلانىس ورناتۋ جانە نىعايتۋ بويىنشا قور باعدارلاماسى سەرياسىنداعى ءتورتىنشى بيزنەس-فورۋم. شارانىڭ نەگىزگى ماقساتى – ۇلىبريتانياداعى قازاق دياسپوراسى وكىلدەرىمەن ىسكەرلىك قارىم-قاتىناس ورناتۋ. فورۋمعا قازاقستاننىڭ ۇلىبريتانياداعى ەلشىسى ەرلان ىدىرىسوۆ, دۇنيەجۇزى قازاقتارى قاۋىمداستىعى توراعاسىنىڭ ورىنباسارى جانىبەك لەسبەكوۆ, «وتانداستار قورى» كەاق ۆيتسە-پرەزيدەنتى ماعاۋيا سارباسوۆ جانە قازاق دياسپوراسى وكىلدەرى مەن ۇلىبريتانيادا وقىپ جۇرگەن قازاقستاندىق ستۋدەنتتەر قاتىستى.
ماعاۋيا سارباسوۆ جيىنعا قاتىسۋشىلاردى «وتانداستار قورى» جانە دۇنيەجۇزى قازاقتارى قاۋىمداستىعىنىڭ قىزمەتىمەن, شەتەلدەگى دياسپورامەن جۇمىس ىستەۋ جونىندەگى قوردىڭ نەگىزگى جوبالارىنىڭ ءبىرى – الەم بويىنشا قازاق مادەني-ىسكەرلىك ءۇيى جەلىسىن قۇرۋ جونىندەگى جوسپارىمەن تانىستىردى.
ورتالىق كەڭسەسى قازاقستان استاناسىندا ورنالاسقان قازاق مادەني-ىسكەرلىك ءۇيى رەسمي وكىلى رەتىندە شەتەلدەردە تۇراتىن ەتنوستىق قازاقتار تارتىلاتىن ىسكەرلىك ۇيلەرى مەن مادەني ورتالىقتار جەلىسىن قۇرادى. ولار قازاق مادەنيەتىن, سالت-ءداستۇرىن, ۇلتتىق برەندتەرىن دارىپتەيدى جانە ءتىلدى ساقتايدى. سونداي-اق قازاقستاندىق ەكسپورتتى, ونىمدەردى تاراتۋعا اتسالىسادى. بيزنەس-كەلىسىمشارتتار جاساۋعا قاتىسادى, سەرىكتەستەردى, تىڭ بيزنەس يدەيالار مەن يننوۆاتسيالىق ستارتاپتاردى ىزدەيدى. يزرايل, ارمەنيا ءتارىزدى ەلدەردە مادەنيەتتى ىلگەرىلەتۋ مەن بيزنەستى دامىتۋدا كەڭىنەن قولدانىلعان بۇل ۇستانىم – دياسپورا وكىلىنىڭ ءبىلىم-بىلىگى مەن تۇراتىن ەلىنىڭ تۇتىنىس قاجەتتىلىگى جايلى تۇسىنىگىن دۇرىس باعىتتا پايدالانۋدا ناقتى جەمىسىن بەرگەن.
بيزنەس-فورۋم بارىسىندا قاتىسۋشىلار ءوزارا ءىس-قيمىل, بيزنەس-باستامالاردى ىنتالاندىرۋ جانە ستارتاپتاردى قولداۋ تەتىكتەرىن ەگجەي-تەگجەيلى تالقىلادى.
وسى جاعدايدى پايدالانا وتىرىپ, قور وكىلدەرى قازاق دياسپوراسى ارقىلى ۇلىبريتانيا نارىعىنا قازاقستاندىق ونىمدەردى, اتاپ ايتقاندا ايران, شۇبات, قىمىز سياقتى ءسۇت ونىمدەرىن جانە ەۋروپالىقتاردىڭ قىزىعۋشىلىعىن تۋدىراتىن باسقا دا ونىمدەردى شىعارۋ ماسەلەلەرىن تالقىلادى. سونىمەن قاتار لوندوندا «استانا وپەرا», «استانا بالەت», قۇرمانعازى اتىنداعى وركەستر سياقتى مادەني جانە ۇلتتىق برەندتەردى ىلگەرىلەتۋ, دياسپورا اراسىندا ءتىلدى ساقتاۋ, سونداي-اق «اباي» مادەني ورتالىعىن قۇرۋ ماسەلەلەرى قوزعالدى.
سوڭىندا قور وكىلدەرى كەزدەسۋگە قاتىسۋشىلاردىڭ بارلىعىن وسى جىلدىڭ قاراشا ايىندا تۇركىستان قالاسىندا وتەتىن وتانداستاردىڭ ءبىرىنشى فورۋمىنا شاقىردى.
لوندونداعى بيزنەس-فورۋم ميۋنحەن, سان-فرانتسيسكو, ىستانبۇل جانە تاشكەنت قالالارىنداعى كەزدەسۋلەردەن كەيىنگى بەسىنشى جيىن. ءتۇرلى ەلدەردە تۇراتىن وتانداستارمەن وسىنداي كەزدەسۋلەردى الداعى ۋاقىتتا گفر, اقش, قحر, وزبەكستان, تۇركيا جانە رەسەي ەلدەرىندە وتكىزۋ جوسپاردا بار. ال كەلەسى بيزنەس-فورۋم وسى ايدا ستوكگولمدە (شۆەتسيا) وتەدى دەپ كۇتىلۋدە.
دايىنداعان
جولدىباي بازار,
«Egemen Qazaqstan»
