ۇكىمەتكە ەڭبەكاقى تولەۋ قورىن ارتتىرۋ ءۇشىن جۇمىس بەرۋشىلەردى ىنتالاندىرۋ ماسەلەسىن پىسىقتاۋدى تاپسىرامىن», دەگەن بولاتىن. ۇكىمەت پرەزيدەنت جولداۋىندا ايتىلعان تاپسىرمالاردى ورىنداۋعا كىرىسىپ كەتتى.
قازاق قوعامىنداعى نارازىلىق كوڭىل كۇي مەن الەۋمەتتىك شيەلەنىستەر كوبىنە ەڭبەكاقىنىڭ كوڭىلدەگىدەي بولماۋى مەن تۇرمىس دەڭگەيىنىڭ تومەندىگىنەن تۋىندايتىنىن سوڭعى جىلداردىڭ وقيعالارى بايقاتىپ ءجۇر. ونىڭ ۇستىنە ءبىزدىڭ ەلدە قىزمەت ەتەتىن بىرقاتار شەتەلدىك كاسىپورىندا وتاندىق جۇمىسشىلاردىڭ الاتىن جالاقىسى وزگە ەلدەن كەلگەن ارىپتەستەرىنە قاراعاندا تومەندەۋ بولاتىنى دا كەزدەسىپ قالادى. پرەزيدەنتتىڭ «كەن ءوندىرۋ سالاسىنداعى ءىرى كاسىپورىنداردىڭ تابىسى ارتقانمەن ازاماتتارىمىزدىڭ جالاقىسى ايتارلىقتاي وسپەگەنىن كورىپ وتىرمىز» دەۋ ارقىلى ءبىز ءسوز ەتكەن ماسەلەلەردى تۇسپالداسا كەرەك. دەمەك, ەل ىشىندەگى الەۋمەتتىك شيەلەنىستى ورشىتپەۋ ءۇشىن ۇكىمەتتىڭ بەل شەشە كىرىسەتىن ءجونى بار. سودان دا بولسا كەرەك, جولداۋ جاريالانعان ءبىر ايدان استام ۋاقىتتىڭ ىشىندە اتقارۋشى بيلىكتىڭ بىرقاتار ءىستى تىندىرعانى بايقالادى.
جاقىندا ەڭبەك جانە حالىقتى الەۋمەتتىك قورعاۋ مينيسترلىگى باس پروكۋراتۋرامەن بىرلەسىپ شەتەلدەن جۇمىس كۇشىن تارتاتىن بىرقاتار كاسىپورىندى تەكسەردى. تەكسەرۋ 47 كاسىپورىندا جۇرگىزىلدى. ناتيجەسىندە ەڭبەك جانە كوشى-قون زاڭناماسىن بۇزۋدىڭ 783 دەرەگى تىركەلدى. سونىڭ ىشىندە ەڭبەكاقى تولەۋ مەن سىياقى بەرۋدە بىرقاتار كاسىپورىن شەتەلدىك جۇمىسشىلارعا كوبىرەك كوڭىل بولەتىنى بايقالعان. مۇنداي 457 دەرەك انىقتالعان. مۇنىڭ ءوزى ەلىمىزدە شەتەلدىك جۇمىسشىلاردى قۇداسىنداي كورەتىندەر از ەمەس ەكەنىن بايقاتادى. ال ءبىز اتاپ وتكەن تەكسەرۋ ۇكىمەتتىڭ وتاندىق جۇمىسشىلاردىڭ قۇقىن قورعاۋ مەن ولارعا لايىقتى جالاقى تولەۋ ءىسىن ناقتى باقىلاۋعا العانىن كورسەتىپ وتىر. بۇل ءوز كەزەگىندە بۇقارانىڭ كوڭىلىندەگى كۇدىكتى سەيىلتۋگە سەپتەسەرى ءسوزسىز.
ايتپاقشى, ەڭبەك جانە حالىقتى الەۋمەتتىك قورعاۋ مينيسترلىگى مەن باس پروكۋراتۋرانىڭ بىرلەسكەن تەكسەرۋىنىڭ ناتيجەسىندە ءبىز ايتقان 47 كاسىپورىنعا جالپى سوماسى 33,7 ملن تەڭگە بولاتىن 83 اكىمشىلىك ايىپپۇل سالىنعان. ودان بولەك مينيسترلىك ەڭبەك قاتىناستارى مەن شەتەلدەن جۇمىس كۇشىن تارتۋ سالاسىنا مەملەكەتتىك باقىلاۋدى كۇشەيتۋ شارالارىن دا قولعا الدى. سونىمەن قاتار ەڭبەك زاڭنامالارىن جەتىلدىرۋ ماقساتىندا جۇمىس بەرۋشىگە بارلىق جۇمىسشىلار ءۇشىن بىردەي سانيتارلىق-تۇرمىستىق جاعداي جاساۋدى مىندەتتەيتىن نورمالار قاراستىرىلعان زاڭ جوباسىن ازىرلەدى. بۇل زاڭ نورمالارى شەتەلدىك جانە قازاقستاندىق جۇمىسشىلاردىڭ اراسىندا ديسكريميناتسياعا جول بەرمەۋگە ءتيىس. ەگەر ونداي جاعداي تىركەلە قالسا, اكىمشىلىك جاۋاپكەرشىلىككە تارتۋ دا كوزدەلگەن. قازىر زاڭ جوباسى ءماجىلىستىڭ قاراۋىندا جاتىر.
نەگىزى, قازاقستان ازاماتتارىن وكپەلەتىپ جۇرگەن دۇنيە – شەتەلدەن ءبىزدىڭ ازاماتتارمەن بىلىكتىلىگى بىردەي جۇمىسشى اكەلۋ ەدى. ەڭبەك جانە حالىقتى الەۋمەتتىك قورعاۋ مينيسترلىگى 4-ءشى ساناتقا كىرەتىن شەتەلدىكتەردى, ياعني جۇمىسشى مامانداردى تارتۋدى قىسقارتۋدى كوزدەپ وتىر. ءسويتىپ ىشكى ەڭبەك نارىعىن قورعاماق. ول ءۇشىن شەتەلدىك جۇمىس كۇشىن تارتۋعا كۆوتا ءبولۋ جونىندەگى ەرەجە مەن شەتەلدىكتەردى جۇمىسقا شاقىرۋعا رۇقسات بەرۋ شارتتارىن وزگەرتپەك. ودان بولەك 250-دەن استام جۇمىسشىسى بار, سونىڭ ىشىندە 30-دان كوپ شەتەل جۇمىسشىسىن تارتقان كاسىپورىنداردى جىل سايىن جوسپارلى تۇردە تەكسەرىپ وتىرۋدى دا كوزدەپ وتىر. ءيا, ازىرگە بۇل ەرەجەلەر مەن نورمالار كۇشىنە ەنگەن جوق. بىراق جىل اياعىنا دەيىن اتالعان قۇقىقتىق-نورماتيۆتىك اكتىلەر قابىلداناتىن بولادى.
