پەللەت دەپ اتالاتىن وتىن كادىمگى وسىمدىك قالدىقتارىنان جاسالادى ەكەن. اسىرەسە سابان مەن قامىستان جاقسى وتىن شىعادى. وتىننىڭ بۇل ءتۇرى تابيعي سانالادى. ەڭ باستىسى ارزان.
– «قىزىل پارتيزان» ەلدى مەكەنىندەگى №8 جىلۋ قازاندىعىن تۇيىرشىك وتىنمەن جاعىلاتىن ەتىپ قايتا جابدىقتادىق. تاعى ءبىر جىلۋ قازاندىعىن الدىرعالى جاتىرمىز. پەللەت وسىمدىك شيكىزاتىنان جاسالادى. كوبىنە قامىس, ءشوپ, سابان قولدانىلادى. شيكىزات نىعىزدالىپ, تۇيىرشىكتەلەدى. تابيعي ءونىمنىڭ قىزۋى جاقسى, قالدىعى دا اناعۇرلىم از, ەڭ باستىسى – باعاسى ءتيىمدى, – دەيدى «قجەك» مكك ديرەكتورى اسقار بەكماعامبەتوۆ.
اتالعان وتىننىڭ دامىعان ەلدەردە كەڭىنەن قولدانىلاتىنىن ايتا كەتكەن ءجون. ماسەلەن, اقش-تا 2008 جىلدان بەرى قولدانىلىپ كەلەدى. سول كەزدىڭ وزىندە بۇل ەلدە تۇيىرشىك وندىرىسىمەن 80-نەن استام كومپانيا اينالىسىپ, جىلىنا 1,1 ملن توننا ءونىم شىعارعان. قازىر قۇراما شتاتتاردا 600 مىڭنان استام عيمارات جىل سايىن 2 ملن توننا تۇيىرشىك وتىنمەن جىلىتىلادى.
ال فينليانديانىڭ تۇرعىن ءۇي سەكتورى جىلىنا 70 مىڭ توننا تۇيىرشىك قولدانادى. 7 مىڭعا جۋىق عيمارات بيووتىنمەن جىلىتىلادى. كليماتى قازاقستانعا ۇقساس كانادا دا – تۇيىرشىك وتىندى كوپ تۇتىناتىن ەلدەردىڭ ءبىرى. بۇل ەلدە جىلىنا 1,3 ملن تونناعا جۋىق ءونىم وندىرىلەدى. تۇيىرشىك شىعاراتىن زاۋىتتار نەگىزىنەن جاعالاۋدا ورنالاسقان. كانادانىڭ باتىس جاعالاۋىندا ورنالاسقان زاۋىتتار اعاشتىڭ جۇمساق شىرشا, قاراعاي ىسپەتتى سۇرىپتارىن پايدالانادى. ال شىعىس جاعالاۋىنىڭ زاۋىتتارى ەمەن, ۇيەڭكى, شيە جانە باسقا دا قاتتى سورتتاردى پايدالاناتىن كورىنەدى. دامۋ دەڭگەيى جوعارى باسقا دا مەملەكەتتەرگە توقتالار بولساق, جىل سايىن شۆەتسيا – 1,7 ملن توننا, گەرمانيا – 900 مىڭ توننا, اۋستريا – 800 مىڭ توننا, لاتۆيا – 200 مىڭ توننا پەللەت تۇتىنادى. ەۋروپادا وتىندىق اعاش تۇيىرشىكتەرىن شىعاراتىن شامامەن 650 زاۋىت جىلىنا 10 ملن توننادان استام ءونىم شىعارادى. جالپى, الەم بويىنشا جىلىنا 22,5 ملن توننا تۇيىرشىك وتىن كادەگە جاراتىلادى.
قوستانايلىق جىلۋ كومپانياسىنىڭ مالىمەتىنە جۇگىنەر بولساق, وتىن گرانۋلالارىن پايدالانۋ ەكونوميكالىق جاعىنان ءتيىمدى. سەبەبى ءبىز جاعىپ وتىرعان گازدىڭ ءار تونناسىن جىلۋ كومپانياسى 24 مىڭ تەڭگەدەن ۇسىندى. ال بالامالى وتىن 11-12 مىڭ تەڭگەگە شىعۋى ءتيىس. ونىڭ ۇستىنە ءونىمنىڭ ءار تونناسىنان 3,5-4 گكاللوريا جىلۋ الۋعا بولادى. ەسەپ دۇرىس بولسا, جىلىنا 20 ملن تەڭگەگە دەيىن قارجى ۇنەمدەۋگە بولادى دەيدى ماماندار.
جۇماتاي كاكىمجانوۆ,
جۋرناليست
قوستاناي
