ماڭىزدى جيىنعا اقپارات جانە قوعامدىق دامۋ ءمينيسترى داۋرەن اباەۆ, «Qazaq kuresi» فەدەراتسياسىنىڭ پرەزيدەنتى ارمان شوراەۆ, مادەنيەت جانە سپورت مينيسترلىگى, سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ جانە فەدەراتسيا وكىلدەرى مەن ۇلتتىق كۇرەسكە ەڭبەك سىڭىرگەن ارداگەرلەر قاتىستى.
اتالعان باس قوسۋ اياسىندا, ۇلتتىق كۇرەستىڭ بولاشاعى جايلى ماسەلە قوزعالىپ, الداعى كۇندەرى بۇل سالانى جانداندىرا ءتۇسۋ ءۇشىن جاڭادان رەسپۋبليكالىق «Qazaq kuresi» فەدەراتسياسىنىڭ پرەزيدەنتى بولىپ اقپارات جانە قوعامدىق دامۋ ءمينيسترى داۋرەن اباەۆ سايلاندى.
وزىنە جۇكتەلگەن ماڭىزدى مىندەتتى جاۋاپكەرشىلىك پەن قابىلداعان د.اباەۆ بۇعان دەيىن اتالعان فەدەراتسيا تاراپىنان ۇلكەن جۇمىستار اتقارىلعانىن ايتا كەلىپ: «وسىنىڭ بارىنە باسشىلىق ەتكەن ارمان تولەگەن ۇلى قازاق كۇرەسى برەندىن جوعارى دەڭگەيگە كوتەرىپ, ۇلكەن جۇمىس اتقاردى. سوندىقتان مەن وسى جۇمىستى بىرگە جالعاستىرامىز دەپ ايتقىم كەلىپ وتىر. ەلباسىنىڭ «رۋحاني جاڭعىرۋ» باعدارلاماسىندا دا ۇلتتىق جادىگەرلەرىمىزدى دارىپتەۋ تۋرالى كەڭىنەن ايتىلعان. ويتكەنى ۇلتتىق سپورت – ۇلتتىق سانا مەن ۇلتتىق رۋحتى قالىپتاستىراتىن ۇلتتىڭ كودى بولىپ سانالادى. كۇرەس ارقىلى قازاقتىڭ اتىن ايداي الەمگە تانىتقان, ابىرويىمىزدى اسىرعان قاجىمۇقان بابامىزدىڭ جولىن جالعاستىرىپ, قازاق كۇرەسىن بيىك بەلەستەرگە جەتەلەۋ – ماڭىزدى دا جاۋاپتى ءىس. سوندىقتان فەدەراتسيا وكىلدەرىنىڭ ماعان ارتىپ وتىرعان سەنىمدەرىن اقتاۋعا تىرىسامىن. قازاق كۇرەسىنىڭ دەڭگەيىن ارتتىرۋعا قاتىستى بىرقاتار جوسپار بار. الداعى ۋاقىتتا وسى سالا ماماندارىمەن بىرىگىپ تىڭ شارالاردى جۇزەگە اسىرامىز دەگەن سەنىمدەمىن. قازاقتا «ارىق ايتىپ, سەمىز شىق» دەگەن ءسوز بار. سوندىقتان وسى ءسوزدىڭ ناتيجەسىن كورسەتۋگە تىرىسامىز دەپ ايتقىم كەلىپ وتىر», دەدى ۇلتتىق كۇرەسىمىزدىڭ جاڭا باسشىسى د.اباەۆ.
راسىندا 2013-2019 جىلدار ارالىعىندا فەدەراتسيا جۇمىسىن بيىك دەڭگەيگە كوتەرە بىلگەن ارمان تولەگەن ۇلى «قازاقستان بارىسى» جوباسىن ۇلتتىق برەندكە اينالدىرۋمەن قاتار, «الەم بارىسى», «ەۋرازيا بارىسى», «جاس بارىس», «حالىق بارىسى» سياقتى تىڭ جوبالار ارقىلى پالۋانداردىڭ الەۋمەتتىك بەدەلىن قالىپتاستىردى. فەدەراتسيانى سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ قۇرامىنا قوستى, سونىمەن قاتار اسا زور تاريحي قادام – قازاق كۇرەسىن يۋنەسكو-نىڭ دۇنيەجۇزىلىك مۇرالار تىزىمىنە ەنگىزدى. ياعني وسى جىلدار اراسىندا ا.شوراەۆ قازاق كۇرەسىن ۇلتتىق برەندكە اينالدىردى. بولاشاقتا ارمان تولەگەن ۇلى فەدەراتسيانىڭ ءبىرىنشى ۆيتسە-پرەزيدەنتى رەتىندە جۇمىسىن جالعاستىرا بەرەتىن بولدى.
باسشىلىقتاعى وزگەرىستى ۇلتتىق كۇرەسىمىز ءۇشىن جاسالىپ جاتقان ناتيجەلى قادام دەپ باعا بەرگەن ا.شوراەۆ: «جاڭا پرەزيدەنت د.اباەۆ مينيستر رەتىندە دە, ونىڭ الدىندا ەلباسىنىڭ ءباسپاسوز حاتشىسى كەزىندە دە ءبىزدىڭ جوبالارىمىزعا زور قولعابىس تيگىزىپ كەلە جاتقان ازامات. سول سەبەپتى بولاشاقتا قازاق كۇرەسى ۇلتتىق قۇندىلىق رەتىندە ءارى قاراي اسقاقتاي بەرەتىن بولادى» دەپ ءوزىنىڭ شىنايى ويىن جەتكىزدى.
