جوبالىق قۇنى 55 ملن ەۋرو بولاتىن كۇن ەلەكتر ستانساسىنىڭ اشىلۋ سالتاناتىندا ءسوز سويلەگەن وبلىس اكىمىنىڭ ورىنباسارى الماس ايداروۆ ەلباسىنىڭ قازاقستانداعى بالاما ەنەرگيا كوزدەرىنىڭ ۇلەسىن 30%-عا جەتكىزۋ جونىندەگى تاپسىرماسىن ورىنداۋ ىسىندە اۋىز تولتىرىپ ايتار ناتيجەلەردىڭ بارلىعىن اتاپ ءوتتى.
– ءبىز وبلىستا ءۇشىنشى ءىرى كۇن ەلەكتر ستانساسىن ىسكە قوسقالى تۇرمىز. بۇل جوبا ءوڭىرىمىزدىڭ ونەركاسىبىن دامىتۋ ءۇشىن وتە ماڭىزدى. كۇن ەنەرگياسىن دامىتا وتىرىپ, ءبىز قۋات تاپشىلىعىن ەڭسەرىپ قانا قويماي, ەكولوگيالىق ماسەلەلەردى دە شەشۋگە مۇمكىندىك الامىز, – دەدى ول.
جاڭادان ىسكە اسىرىلعان جوبانىڭ باس ينۆەستورى يوحيم گولدبەك «اقادىر» كەس-ءتىڭ ونىمدىلىگى ساعاتىنا 25 مۆت ەنەرگيانى قۇرايتىنىن, الداعى ۋاقىتتا ونىڭ قۋاتتىلىعىن 76 مۆت-قا دەيىن ارتتىرۋ جونىندە كەلىسىمگە قول جەتكىزىلگەنىن ءمالىم ەتتى.
– بۇل ءبىزدىڭ قاراعاندى وبلىسىندا ىسكە قوسىپ وتىرعان ەكىنشى كۇن ەلەكتر ستانساسى. اتالعان جوبالار نەمىس ينۆەستورلارى مەن وبلىس اكىمدىگىنىڭ جانە «Kazakh Invest» ۇك» اق-نىڭ بىرلەسكەن جۇمىسى ارقىلى مۇمكىن بولدى, – دەدى باس ينۆەستور.
بيىلعى جىلدىڭ باسىندا قاراعاندى وبلىسىنىڭ اكىمدىگى ەۋروپالىق ينۆەستورلارمەن بالامالى ەنەرگەتيكانى دامىتۋ جونىندە مەموراندۋمعا قول قويعان بولاتىن. بۇگىنگى كۇن تۇرعىسىنان قاراعاندا, بۇل كەلىسىمدەر سوزدەن ىسكە اينالىپ, بەلگىلى ءبىر دارەجەدە جەمىستى ناتيجە بەرە باستادى. مۇنىڭ ءوزى الداعى ۋاقىتتا كۇننەن الىناتىن ەنەرگيانىڭ قۋاتىن 500 مۆت-قا جەتكىزۋگە جانە شەتەلدەن 500 ملن ەۋرو كولەمىندە ينۆەستيتسيا تارتۋعا مۇمكىندىك بەرەدى.
نەگىزى, قاراعاندى وبلىسىن جاڭارتىلعان ەنەرگيا كوزدەرىن ەنگىزۋ بويىنشا ەلىمىزدە كوشباسشى وڭىرگە اينالدى دەپ سەنىممەن ايتۋعا بولادى. بۇعان دەيىن وبلىستىڭ ساران قالاسى مەن گۇلشات كەنتىندە ەكى كۇن ەلەكتر ستانساسى سالىنىپ, قازىرگى ۋاقىتتا ولار قالىپتى جۇمىس ىستەپ تۇر. ەندى بۇل ەكەۋىنە «اقادىر» كەس-ءتى قوسقاندا, ءوڭىر بويىنشا وندىرىلەتىن «جاسىل» ەنەرگيانىڭ جالپى قۋاتى 200 مۆت شاماسىندا بولادى دەگەن بولجام بار.
قاراعاندى وبلىسى
