بۇل اۋقىمدى ءىس-شاراعا عالىم باينازاروۆتىڭ تۋعان جەردەگى تۋىستارى, بۇرىنعى قىزمەتتەستەرى, اۋدان اكىمدىگى, «نۇر وتان»پارتياسىنىڭ اۋداندىق فيليالى, جالپى جۇرتشىلىق وكىلدەرى قاتىستى. ەلى ءۇشىن ەڭبەك ەتكەن, ۇلكەن تۇلعاعا اينالعان پەرزەنت تۋعان جەردىڭ دە ماقتانىشى. جۇماقان سادۋاقاسوۆ اقساقال – عالىم باينازاروۆتىڭ قىزمەتتەگى ۇستازى. وسىنداي شاكىرت تاربيەلەگەن قارتتى اۋىلداستار دا الدىنان وتپەي سىيلايدى.
– تورعاي توپىراعى حالقىمىزدىڭ ءىرى تۇلعالارىن بەردى. عالىم باينازاروۆ تا قازاقتىڭ ىرىلەرىنىڭ قاتارىن تولىقتىرعان ادام. تورعاي حالقى اۋدانداعى بانك جۇيەسىندە قىزمەت ەتكەن, ونى دامىتۋعا قاتىسقان ەكى ادامدى جاقسى بىلەدى. سوناۋ سوعىس جىلدارى اۋداندا بانكتى نۇرعالي قاراتاەۆ دەگەن كىسى باسقاردى, ول الدىمەن وبلىستىق بانككە, ودان رەسپۋبليكالىق بانككە كوتەرىلىپ, ونى 1965 جىلعا دەيىن باسقاردى. سودان كەيىنگى عالىم بولدى. بانك جۇيەسىن جەتىلدىرۋ, باسقارۋ ەلىمىزدىڭ ەكونوميكاسىن كوتەرۋ دەگەن ءسوز. عالىمنىڭ تاۋەلسىز ەلىمىزدىڭ بانك جۇيەسىنىڭ ىرگەتاسىن قالاۋعا ۇلەسى مول, – دەدى جۇماتاي اقساقال. كەش بارىسىندا قوناقتار مەن كورەرمەندەر مەرەيتوي يەسى عالىم باينازاروۆتىڭ بەينەبايلانىس ارقىلى جەرلەستەرىنە جولداعان جىلى لەبىزىن تىڭدادى. سونىمەن قاتار تەلەارنالارعا بەرگەن سۇحباتتارى دا كورەرمەن نازارىنا ۇسىنىلدى.
كەشكە اتاقتى كومپوزيتور, تورعاي تۋماسى باقىتجان بايقاداموۆتىڭ جيەنى جۇپار تاتكەنوۆانىڭ قاتىسۋى «مۋزەي ءتۇنىنىڭ» مازمۇنىن قالىڭداتا ءتۇستى. كەشتە ول كومپوزيتورعا ارنالعان كورمەنىڭ لەنتاسىن قيدى. باقىتجان بايقاداموۆ تورعاي وڭىرىنەن شىققان العاشقى كاسىبي كومپوزيتور بولدى. قازاق حور ونەرىنىڭ نەگىزىن قالاعان جان. ونىڭ اندەرى سوعىستان كەيىنگى جىلدارى كەڭ تارالدى. تورعاي وڭىرىندە ونىڭ بولات حامزين, قاليبەك دەرپسالدين, باقىتجان ساۋەكەنوۆ, توكەن ەلتەباەۆ, ءامينا سارمانوۆا, اقتورتا ءابىلوۆا سەكىلدى ءىزباسارلارى بار, كەيىنگى تولقىن دا ءوسىپ كەلەدى.
جۇپار اپاي اتاسىنىڭ كورمەسىنە قۇرقول كەلمەپتى. ول مۇراجاي قورىنا باقىتجان بايقاداموۆ پەن دانابيكە قارالدينا-بايقاداموۆانىڭ پورترەتتەرىن, كومپوزيتوردىڭ زايىبى گەنەرال ي.ۆ.پانفيلوۆتىڭ قىزى ۆالەنتينا يۆانوۆنا جەڭگەسىنىڭ ءوز قولىمەن سالعان مينياتيۋرالارىن سىيعا تارتتى. قوناقتار قۇتتىقتاۋلارى مەن جىلى لەبىزدەرى جانە اعا ۇرپاق وكىلدەرىنىڭ مازمۇندى اڭگىمەلەرىنەن كەيىن ءان مەن كۇيگە دە كەزەك بەرىلدى. كۇزدىڭ كەشىنەن باستالعان «مۋزەي ءتۇنى» تۇنگى ساعات 01.00-گە دەيىن جالعاستى.
– كۇندىز جۇمىستان بوساعان سوڭ, كەشكە مۋزەيگە كەلگەن اۋىلداستار اسىقپادى. تۇنگى مۋزەيدە ادامدار مازمۇندى اڭگىمە تيەگىن تارقاتىپ, شارانى ادەمى كەشكە اينالدىرىپ جىبەردى. بۇل مادەني ومىرىمىزدەگى جاقسى داستۇرگە اينالادى, – دەيدى تورعايداعى مۋزەيلەر كەشەنىنىڭ ديرەكتورى گۇلبانۋ سارسەكەەۆا.
قوستاناي وبلىسى,
جانگەلدين اۋدانى
