بۇگىندە اۆتوماتتى دانەكەرلەۋ-ءپىسىرۋ جۇمىستارى تولىعىمەن اياقتالىپ, قۇبىردىڭ 1061,3 شاقىرىمى تارتىلدى. گاز قۇبىرىنىڭ 515 شاقىرىمى گيدراۆليكالىق سىناقتان ءساتتى ءوتتى. قالعان ۋچاسكەلەردى سىناۋعا دايىندىق جۇرگىزىلۋدە. سىناق جۇمىستارى اياقتالعاننان كەيىن قۇبىردىڭ بارلىق ۋچاسكەلەرى ءبىر بىرىمەن وراما جاپسارلارمەن جالعاناتىن بولادى.
سونداي-اق گاز ولشەۋ ستانتسياسى مەن جەزقازعان, قاراعاندى, تەمىرتاۋ جانە نۇر-سۇلتان قالالارىنداعى بەس گاز تاراتۋ ستانتسيالارىنىڭ قۇرىلىسى كەستەگە سايكەس جۇرگىزىلىپ كەلەدى.
«سارىارقا» گاز قۇبىرىنىڭ قۇرىلىسى بويىنشا جۇمىستار كەشەنى 2019 جىلدىڭ سوڭىنا دەيىن تولىعىمەن اياقتالادى. سودان كەيىن اكىمدىكتەر ەلدى مەكەندەردى, سونىڭ ىشىندە ەلوردانى گازداندىرۋ جۇمىستارىنا كىرىسۋدى جوسپارلاپ وتىر.
پايدالانۋعا بەرىلگەننەن كەيىن «سارىارقا» گاز قۇبىرى «ينتەرگاز ورتالىق ازيا» اق (بۇدان ءارى - يوا) جالعا بەرىلەدى. ول گاز تاسىمالداۋدى جۇزەگە اسىراتىن بولادى.
قازىرگى ۋاقىتتا گاز ءتاريفىنىڭ مولشەرى مەن قۇرىلىمى انىقتالعان جوق. گاز تاسىمالىنىڭ ءتاريفىن قالىپتاستىرۋ كەزىندە يوا-نىڭ قۇبىردى پايدالانۋ شىعىندارى مەن جالعا بەرۋ تولەمدەرى ەسكەرىلۋى ءتيىس. ال ءتاريفتى بەكىتۋ قازاقستان رەسپۋبليكاسىنىڭ ۇلتتىق ەكونوميكا مينيسترلىگى تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ قۇزىرەتىنە جاتادى. وسى ورايدا, «گاز جانە گازبەن جابدىقتاۋ تۋرالى» زاڭعا سايكەس ىشكى نارىقتا «قازترانسگاز» اق-نىڭ تاۋارلىق گازدى كوتەرمە ساۋدادا ساتۋ باعاسىنىڭ جوعارعى شەگىن قازاقستان رەسپۋبليكاسى ەنەرگەتيكا مينيسترلىگىمەن بەكىتىلەدى.
ايتا كەتەيىك, «سارىارقا» ەلدىڭ ەنەرگەتيكالىق قاۋىپسىزدىگى دەڭگەيىن ارتتىرۋعا, ورتالىق جانە سولتۇستىك ايماقتاردى كوگىلدىر وتىنمەن ۇزدىكسىز قامتي وتىرىپ, ەكولوگيالىق احۋالدى جاقسارتۋعا ءتيىس. بولاشاقتا جەكە-مەنشىك جانە شاعىن كوممۋنالدىق قازاندىقتاردى, جەر ۇيلەر مەن تۇرعىن ۇيلەردى, جىلۋ-ەلەكتر ورتالىقتارىن بىرتىندەپ گازعا اۋىستىرۋ جوسپارلانۋدا.
