بولاشاق وفيتسەرلەر ءىس جۇزىندە العان تەوريالىق بىلىمدەرىن پىسىقتاپ, اسكەري تەحنيكانى باسقارۋ شەبەرلىكتەرىن پاش ەتتى جانە سۋ بوگەتتەرىن ۇرىس ماشيناسىمەن ەڭسەرۋدىڭ بارلىق مۇمكىندىكتەرىن زەردەلەدى.
قۇراما ەكيپاجدار قاتارىندا ولار جاياۋ اسكەردىڭ جاۋىنگەرلىك ماشينالارى مەن ت-72 تانكتەرىندە 100 شاقىرىمدىق مارش جاسادى. ول ءۇشىن اسكەري ينستيتۋتتىڭ وقۋ-جاتتىعۋ ورتالىعىندا ارنايى كورسەتىلىمدى ساباق ۇيىمداستىرىلدى.
جاۋىنگەرلىك تەحنيكاداعى مارش – بۇل جولدار مەن كەدەرگىلى جولدار ارقىلى ۆزۆودتىڭ نەمەسە روتانىڭ لەگى قۇرامىنداعى جاي عانا ءجۇرىس ەمەس. ەڭ الدىمەن, مارشتى جوسپارلاۋ جانە ۇيىمداستىرۋ بويىنشا بارلىق دارەجەدەگى كومانديرلەردىڭ جۇمىسى. كۋرسانتتار جاۋىنگەرلىك ماشينالاردى جۇرگىزۋ, كۇردەلى جاعدايدا مانەۆرلەۋ, ءارتۇرلى كەدەرگىلەردى ەڭسەرۋدە تاباندىلىق پەن باتىلدىقتى پاش ەتتى.
– مارشتى ۇيىمداستىرۋ مەن وتكىزۋدى زەردەلەۋ كەزەڭ-كەزەڭمەن وتەدى. ءبىرىنشى كۋرستا كۋرسانتتار بولىمشە كومانديرىنىڭ جۇمىسى كولەمىندە, ەكىنشى جانە ءۇشىنشى كەزەڭدە ۆزۆود جانە روتا كومانديرى كولەمىندە قاجەتتى ماسەلەلەردى زەردەلەيدى. بولاشاق وفيتسەرلەرمەن 100 شاقىرىمدىق مارشتى ءجۇرىپ ءوتۋدى وقىتۋدىڭ سوڭعى ءتورتىنشى كۋرسى باتالون كومانديرى دارەجەسىندە وتكىزىلەدى, – دەيدى قۇرلىق اسكەرلەرى اسكەري ينستيتۋتى وقۋ ءبولىمىنىڭ باستىعى پودپولكوۆنيك جانىبەك سارعازين.
تاجىريبەلىك ساباقتار وقىپ-ۇيرەنۋشىلەردىڭ تاكتيكالىق, اتىس جانە ادىستەمەلىك ماشىعىن ارتتىرۋعا ىقپال ەتەتىنىن, ۇرىستى ۇيىمداستىرۋ مەن جۇرگىزۋدەگى قابىلەتتەرىن جەتىلدىرەتىنىن اتاپ وتكەن ءجون. كۋرسانتتار اسكەرلەرگە قىزمەت ەتۋگە جوعارى دەڭگەيدەگى كاسىبي دايىندىقپەن, وفيتسەرلەر ءۇشىن قاجەتتى ءبىلىم جانە بىلىكتىلىكپەن اتتانادى.
