2018 جىلى ولاردىڭ قاتارى 3 508 ادامعا جەتتى. بيىلعى جاستار جىلىندا ەلىمىزدىڭ باتىس قازاقستان, اتىراۋ, ماڭعىستاۋ, اقمولا وبلىستارى مەن نۇر-سۇلتان جانە الماتى قالالارىنىڭ جاستارى 1063 الەۋمەتتىك جوبا گرانتىن ۇتىپ الدى.
جالپى, Zhas Project جوباسى جاستاردىڭ ومىردەن ءوز ورنىن تابۋعا ىقپال ەتەدى دەسەك ارتىق ايتپايمىز. سەبەبى ونىڭ نەگىزگى قاتىسۋشىلارى NEET ساناتىنداعى جاستار. ولار الەۋمەتتىك جوبانى ىسكە اسىرۋ بارىسىندا ومىرلىك ماڭىزى بار داعدىلار مەن جوبالاردى باسقارۋدىڭ باعدارلاماسى بويىنشا ءۇش كەزەڭدىك وقىتۋدان وتەدى. الدىمەن التى اي بويى الەۋمەتتىك جوبالارىن ىسكە اسىرادى. جاستارعا اي سايىن تولەنەتىن شاكىرتاقى دا قاراستىرىلعان. جوو تۇلەكتەرىنە 60 000 تەڭگە بەرىلسە, قالعاندارىنا – 40 000 تەڭگە شاكىرتاقى تيەسىلى. سونىمەن قوسا, بارلىق قاتىسۋشىلار ءوز جوبالارىن ىسكە اسىرۋ كەزىندە مەنتورلاردىڭ, ياعني ءجون كورسەتىپ, باعىت سىلتەيتىن ادامداردىڭ قولداۋىن الادى.
بۇگىندە باس قالامىزدا ءوز جۇمىسىن باستاپ كەتكەن الەۋمەتتىك جوبالار قارقىندى جۇمىس ىستەپ وتىر. ۇيدە وتىرعان كەلىنشەكتەر, ەڭبەككە جارامدى جۇمىسسىز جاستاردىڭ تىڭ يدەيالارىن ىسكە اسىرۋعا مۇمكىندىك بەرىپ وتىرعان Zhas Project جوباسىنىڭ بۇل دا ءبىر ۇلكەن جەتىستىگى. ماسەلەن, زاۋرە دوستاحينا, ۇلجان سەرىك جانە راۋشان بوستەك ەسىمدى كەلىنشەك ەلوردادا تاكتيلدى جانە سەنسورلىق ويىنشىقتار تىگەتىن تىگىن ورتالىعىن اشتى. ءبىلىم جانە عىلىم مينيسترلىگى مەن دۇنيەجۇزىلىك بانك ۇسىنعان جوبانىڭ گرانتىن جەڭىپ العان جاستار قوعامعا پايدالى شارۋانى باستاپ كەتتى.
زاۋرە دوستاحينا 1990 جىلى سەمەي قالاسىندا تۋىپ-وسكەن. مەكتەپتە فيزيكانى ءسۇيىپ وقىعان زاۋرەنىڭ نەگىزگى ماماندىعى تەمىرجولشى. جوعارى وقۋ ورنىن الماتىدا تامامداعان. Zhas Project جوباسى جايىندا الەۋمەتتىك جەلىلەردەن بىلگەن. ءسويتىپ جانىنا ءوزى سياقتى پىسىق ءارى ىزدەنىمپاز قىز-كەلىنشەكتەردى جيناپ, توپ قۇرىپ, بايقاۋعا الەۋمەتتىك جوبالارىن ۇسىنىپتى.
– ءبىزدىڭ جوبا بالالاردىڭ ۇساق موتوريكاسىن جانە جالپى دامۋىنا پايدالى. اسىرەسە داۋن سيندرومىنا شالدىققان, اۋتيزممەن اۋىراتىن بالالار ءۇشىن وتە قاجەت. ەرەكشە بالالاردا ۇساق موتوريكانىڭ داعدىلارى باياۋ داميدى. ءبىزدىڭ ويىنشىقپەن ويناعاندا ولاردىڭ ساباققا دەگەن قىزىعۋشىلىعى ارتادى, كوبىرەك قيمىلدايدى. ويناۋ ارقىلى قولىنىڭ موتوريكاسى, اينالاداعى زاتتاردى سەنسورلىق قابىلداۋى داميدى. ويىنشىقتاردىڭ ديزاينىنىن ءوزىمىز جاسادىق. دايىن ءونىمدى وسىنداي بالالارعا تەگىن تاراتامىز,– دەيدى زاۋرە. ول الداعى ۋاقىتتا دەمەۋشى تابىلسا, مۇقتاج جاندارعا كومەكتى كوبىرەك بەرسەك دەپ ارماندايدى.
Zhas Project الەۋمەتتىك جوباسى اياسىندا نۇرسۇلتان قالاسىندا اشىلعان تاعى دا ءبىر ەرەكشە جوبا – Booktime دەپ اتالادى. بۇل الەۋمەتتىك جوبانىڭ جەتەكشىسى مادينا جۇمانقىزى بالا كۇتىمىنە بايلانىستى ۇيدە وتىرعان جاس كەلىنشەك. ونىڭ ايتۋىنشا, بالا كەزىنەن كىتاپقا دەگەن سۇيىسپەنشىلىگى ەرەكشە بولعان. اكەسى ونى كىتاپقا دەگەن ماحابباتىن وياتۋعا سەبەپشى بولىپتى. ءارىپتى ەرتە تانىپ, ەرتەگىلەردى سۋدىراتا وقىعان ەكەن. سودان Zhas Project الەۋمەتتىك جوباسى جايىندا ءوزىنىڭ جەرلەستەرىنەن ەستىگەندە, استانالىق قۇربىلارىمەن اقىلداسا كەلە, تەگىن كىتاپ وقىتۋ ورتالىعىن اشۋعا بەل بۋعان. توپ قۇرامىندا ءوزى سياقتى ۇيدە وتىرعان اسەم جانە دينا قۇربىلارى دا بۇل ويدى قولداپ, قازىرگى تاڭدا بالالارعا كىتاپ وقىتۋ ورتالىعى تەگىن قىزمەت ەتىپ كەلەدى. بۇل ورتالىق بۇگىندە ەلورداداعى جاعالاۋ اۋدانىندا ورنالاسقان.
