ۇلى اباي مەن قارقارالى – ەگىز ۇعىم. قارقارالى قالاسىندا اباي توقتاعان ءۇي بار. قارقارالىنىڭ تاتار كوپەسى حاليوللا بەكمەتوۆ سالعان بۇل كوكتوبەل اعاش ءۇي ۇلى ويشىلدىڭ ۇلاعاتتى ومىرىنەن سىر شەرتكەن تاريحي جادىگەر رەتىندە بۇگىندە كوپشىلىكتىڭ ءتاۋ ەتەر كيەلى ورنىنا اينالعان. بۇل ءۇيدىڭ اباي ۇلاعاتىن ءپىر تۇتقان ۇرپاقتارعا شىن مانىندە قاسيەتتى ورىن ەكەندىگىن كوكتوبەل ءۇيدىڭ ماڭدايشاسىنا جازىلعان: «بۇل ۇيدە 1850 جىلى ۇلى اقىن-اعارتۋشى اباي قۇنانباەۆ بولعان» دەگەن ايشىقتى جازۋلار پاش ەتىپ تۇر. قازىر بۇل عيماراتتا اۋداندىق مادەنيەت ءبولىمىنىڭ كەڭسەسى ورنالاسقان.
جاقىندا وسى اباي بابامىز توقتاعان ءۇيدىڭ الدىندا قارقارالى تاۋلارىنىڭ تابيعي تاسىنا قاشالىپ سالىنعان اباي بەينەسى بوي كوتەردى. تاستىڭ بيىكتىگى 350 سانتيمەتردەن اسادى. سۋرەت اۆتورلارى: قارقارالى اۋدانىنىڭ مەملەكەتتىك ءارحيۆىنىڭ باسشىسى ماناربەك كارىم مەن ونىڭ بالاسى – قارقارالى قالاسى, ا.جاۋتىكوۆ اتىنداعى قازاق ورتا مەكتەبىنىڭ 11 سىنىپ وقۋشىسى ەراسىل كارىم. حالىق اراسىنان شىققان قاراپايىم شەبەرلەر ۇلى ويشىلدىڭ بەينەسىن ەرەكشە ىجداعاتتىلىقپەن ءدال ورنەكتەگەن.
اتالعان تاس ەسكەرتكىشتى اۋدان, قالا جۇرتشىلىعىمەن قاتار, اباي اتامىزدىڭ سەمەيدەن ارنايى كەلگەن تۋىستارى دا تاماشالادى. تاس ەسكەرتكىش قازىردىڭ وزىندە قالا قوناقتارى ارنايى بارىپ سۋرەتكە تۇسەتىن, ۇلى اقىننىڭ رۋحىنا ءتاۋ ەتەتىن رۋحاني ورىنعا اينالدى.
سۋرەتتە: تابيعي تاسقا قاشالعان اباي بەينەسى جانە اۆتورلار.
