داريعا نازارباەۆا قازاقستان باحرەيندى دوس جانە ماڭىزدى ارىپتەس رەتىندە قاراستىرادى جانە كورولدىكپەن ەكىجاقتى ىنتىماقتاستىقتى دامىتۋعا باسىمدىق بەرەتىنىن اتاپ ءوتتى.
ء«سىزدىڭ ساپارىڭىز پارلامەنتارالىق بايلانىستاردى دامىتۋعا ۇلەس قوسادى دەپ ءۇمىت ارتامىن. پارلامەنتتىك ديپلوماتياعا سەنىم زور», - دەدى د.نازارباەۆا.
فاۋزيا ابدۋللا يۋسۋف زەينال سەنات باسشىسىنىڭ سوزىنە قولداۋ ءبىلدىردى جانە قازاقستان مەن باحرەيننىڭ تەرروريزممەن كۇرەس جانە جانجالداردى بەيبىت ۇنقاتىسۋ ارقىلى شەشۋ سياقتى اسا ماڭىزدى باعىتتار بويىنشا ۇستانىمدارى وتە جاقىن ەكەنىن اتاپ ءوتتى. ول سونداي-اق قازاقستان مەن باحرەين اراسىنداعى تىكەلەي اۋە قاتىناسى مەن ۆيزاسىز ءتارتىپ ماسەلەسىن شەشۋگە ۇمىتتەنەتىنىن جەتكىزدى.
داريعا نازارباەۆا ءوز كەزەگىندە وسى باعىتتاعى جۇمىستى ودان ءارى جالعاستىرۋ ءۇشىن ەكى ەلدىڭ تۋريستىك اگەنتتىكتەرى قىزمەتىن ۇيلەستىرۋدى ۇسىندى. سەنات باسشىسى قازاقستاندا كوپتەگەن تاريحي جانە كوركەم جەرلەر بار ەكەنىن جانە تۋريستىك ينفراقۇرىلىم دامىپ كەلە جاتقانىن ايتا كەلىپ, ءبىزدىڭ ەلىمىزدىڭ تۋريزم الەۋەتىنە ەرەكشە توقتالدى.
فاۋزيا ابدۋللا يۋسۋف زەينال ءبىزدىڭ ەلىمىزدىڭ ادەمىلىگى مەن ەرەكشەلىگىن ايتا كەلىپ, ەڭ باستى سۇلۋلىق – وسىندا تۇراتىن ادامدار ەكەنىن اتاپ ءوتتى.
باحرەين كورولدىگى ۇلتتىق جينالىسىنىڭ دەپۋتاتتار پالاتاسىنىڭ توراعاسى قىسقا مەرزىم ىشىندە سالىنعان جانە ينفراقۇرىلىمى دامىعان قازىرگى زامانعى تولىققاندى قالاعا اينالعان استانانىڭ كەلبەتىنە تاڭدانىسىن ءبىلدىردى.
«سىزدەردىڭ تۇڭعىش پرەزيدەنتىڭىز شىن مانىندە كورەگەن جانە باتىل تۇلعا ەكەنىن اتاپ وتكىم كەلەدى, سەبەبى بۇل ونىڭ ارمانى ەدى, قايسارلىعى مەن كۇش-جىگەرىنىڭ ارقاسىندا وسى ارماندى جۇزەگە اسىردى. ءسىزدىڭ حالقىڭىز – ەركىن ءومىر ءسۇرۋدى اڭسايتىن حالىق. بۇل ىشكى دەڭگەيدەگى قانا ەمەس, الەمدىك ارەناداعى تەڭدەسى جوق جەڭىس», - دەدى ول.
