كەزدەسۋ ينۆەستورلاردىڭ حالىقارالىق اپتالىعىنا (World Investor ' s Week) ورايلاستىرىلىپ, باعالى قاعازدار جونىندەگى كوميسسيالاردىڭ حالىقارالىق ۇيىمىنىڭ (IOSCO) قولداۋىمەن وتكىزىلەدى جانە حالىقتىڭ ينۆەستيتسيالىق ساۋاتىن ارتتىرۋعا باعىتتالعان.
احقو قارجىلىق قىزمەتتەردى رەتتەۋ جونىندەگى كوميتەتى (بۇدان ءارى-AFSA) 2018 جىلدىڭ ماۋسىمىندا IOSCO اسسوتسياتسيالانعان مۇشەسى رەتىندە قابىلداندى. IOSCO بۇكىل الەمدەگى باعالى قاعازدار نارىعىنىڭ رەتتەۋشى ورگاندارىن بىرىكتىرەدى جانە باعالى قاعازدار نارىعى ءۇشىن حالىقارالىق ستاندارتتاردى بەلگىلەيدى. IOSCO مىندەتتەرىنە ۇلتتىق رەتتەۋشى ورگاندارمەن باعالى قاعازدار نارىعىن رەتتەۋدىڭ حالىقارالىق تانىلعان ستاندارتتارىن ازىرلەۋ, ەنگىزۋ جانە ساقتاۋعا جاردەمدەسۋ جونىندەگى ىنتىماقتاستىق كىرەدى.
ءداستۇرلى تۇردە ءىس-شارا قازاننىڭ ءبىرىنشى اپتاسىندا الەمنىڭ 80 ەلىندە وتكىزىلەدى. ماقساتى-ينۆەستيتسيالاۋدىڭ نەگىزدەرى تۋرالى اقپاراتپەن قامتاماسىز ەتۋ جانە قارجىلىق قىزمەتتەردى تۇتىنۋشىلاردى قورعاۋ.
بيىل حالىقارالىق ينۆەستورلار اپتالىعى-2019 جانە احقو 30 قىركۇيەك پەن 6 قازان ارالىعىندا قازاقستاننىڭ 6 قالاسىندا – پەتروپاۆل, اقتاۋ, اقتوبە, تۇركىستان, الماتى جانە نۇر-سۇلتان قالالارىندا وتەدى.
احقو حالىقارالىق ينۆەستورلار اپتالىعىنىڭ باعدارلاماسى اكادەميالىق جانە ىسكەرلىك توپتار ءۇشىن پرەزەنتاتسيالار مەن اقپاراتتىق سەسسيالار فورماتىندا وتەدى.
4 قازاننىڭ ءبىرىنشى جارتىسىندا جاستار مەن اكادەميالىق توپتاردىڭ قارجىلىق جانە ينۆەستيتسيالىق مادەنيەتىن قالىپتاستىرۋ جانە ينۆەستيتسيالاۋ نەگىزدەرى تۋرالى اقپاراتتاندىرۋ ماقساتىندا ايماقتىق جوعارى وقۋ ورىندارىنىڭ ستۋدەنتتەرى مەن پروفەسسور-وقىتۋشىلار قۇرامى ءۇشىن دارىستەر وتەدى. سونداي-اق مەملەكەتتىك قىزمەتشىلەر-قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ تىڭداۋشىلارى ءۇشىن سەمينارلار وتەدى.
ەكىنشى جارتىسىندا وڭىرلىك بيزنەس ءۇشىن پرەزەنتاتسيا وتەدى, ونىڭ بارىسىندا قارجى قىزمەتتەرىن تۇتىنۋشىلاردى قورعاۋ, بيزنەس ءۇشىن احقو مۇمكىندىكتەرى, جاسىل جانە يسلام وبليگاتسيالارىن شىعارۋ ەرەكشەلىكتەرى, احقو-دا تىركەۋدىڭ ارتىقشىلىقتارى مەن ءراسىمى جانە ورتالىقتىڭ ءبىلىم بەرۋ باعدارلامالارى تۋرالى باياندالادى.
ءىس-شارانىڭ سپيكەرلەرى قارجى قىزمەتتەرىن, قارجى تەحنولوگيالارىن رەتتەۋ, جاسىل جانە يسلام وبليگاتسيالارىن شىعارۋ, باعالى قاعازدار نارىعىندا ينۆەستيتسيالاۋ, سونداي-اق ۇزدىكسىز كاسىبي دامۋ سالاسىنداعى احقو ساراپشىلارى بولادى.
