«بىلتىر 12 ملن شارشى مەتردەن استام ءۇي سالىنسا, بيىل كورسەتكىش 13 ملن-نان اسادى دەپ كۇتىپ وتىرمىز. ياعني, رەسپۋبليكا بويىنشا جالپى سانى 120 مىڭداي جاڭا ءۇي سالىنادى. العاشقى 8 ايدا جالپى كولەمى 7,6 ملن شارشى مەتردەن استام 68 825 جاڭا ءۇي سالىنىپ ءبىتتى. 28 210 ءۇيدى جەكەمەنشىك قۇرىلىس كومپانيالارى سالدى. ال كوپقاباتتى ۇيلەر سانى 37 مىڭنىڭ ۇستىندە», دەدى ق.وسكەنباەۆ.
ۆيتسە-ءمينيستردىڭ ايتۋىنشا, ءۇي قۇرىلىسىنا سالىنعان ينۆەستيتسيا بيىل 19 پايىزعا وسكەن. وڭىرلەردىڭ بارلىعى دەرلىك جوسپارعا ساي جۇمىس ىستەپ جاتىر. دەگەنمەن نۇر-سۇلتان قالاسىندا سالىنعان ۇيلەر بىلتىرعىدان 33 پايىزعا, ماڭعىستاۋ وبلىسىندا 9,5 پايىزعا تومەندەدى.
ءباسپاسوز ءماسليحاتىندا ايتىلعانداي, 2019 جىلى رەسپۋبليكالىق بيۋدجەتتەن اكىمدىكتەردە كەزەكتە تۇرعان ادامدار ءۇشىن 6002 ساتىپ الۋسىز جالعا بەرىلەتىن تۇرعىن ءۇيدىڭ قۇرىلىسىنا 32,8 ملرد تەڭگە بولىنگەن. جىل سايىن كەم دەگەندە 4 مىڭ پاتەر پايدالانۋعا بەرىلۋگە ءتيىس.
كوپ بالالى وتباسىلار ءۇشىن 2025 جىلعا دەيىن 40 مىڭ جالعا بەرىلەتىن تۇرعىن ءۇيدىڭ نەمەسە جىل سايىن 6 مىڭ پاتەر سالۋ جوسپارلانىپ وتىر. وسى ماقساتتا 7 جىلدا 350 ملرد تەڭگە ءبولۋ قاراستىرىلعان. «كوپ بالالى وتباسىلارعا جالعا 6 مىڭداي پاتەر بەرىلەدى. بۇگىنگە دەيىن 2813 پاتەر تاپسىرىلدى. جىل سوڭىنا دەيىن كورسەتكىش 8 مىڭعا جەتۋى ءتيىس», – دەگەن ق.وسكەنباەۆ كوپ بالالى وتباسىلارعا باسپانا الۋ ءۇشىن بولەك كەزەك جاساۋ ماسەلەسى تۋرالى دا پىكىرىن ءبىلدىردى.
«بۇرىن كوپ بالالى وتباسىلار جالپى ورتاق كەزەكتە تۇراتىن. ۇلى وتان سوعىسىنىڭ ارداگەرلەرى مەن جەتىم بالالار ءۇشىن باسىمدىق بولدى. سالىنعان تۇرعىن ءۇيدىڭ 20%-ى سولارعا بەرىلەتىن. 80%-ى قالعان كەزەككە بەرىلدى. بۇل حالىقتىڭ الەۋمەتتىك وسال توبىنىڭ 11 ساناتى», – دەدى ق.وسكەنباەۆ. ونىڭ ايتۋىنشا, بيىل مامىر ايىندا زاڭعا تۇزەتۋلەر ەنگىزىلدى, وعان سايكەس كوپ بالالى وتباسىلار جەڭىلدەتىلگەن باسپانانى ءبىرىنشى كەزەكتە الۋشىلارمەن تەڭەستىرىلدى. بۇل باعدارلامانى «نۇرلى جەر» باعدارلاماسىندا جەدەل ىسكە اسىرۋ ءۇشىن جەكە كەزەك ءبولىندى.
سونىمەن قاتار ءبىرىنشى ۆيتسە-مينيستر كوپ بالالى وتباسىلار قاتارى وسكەنىن اتاپ ءوتتى. ء«ۇش جىلدىڭ ىشىندە ءبىز كوپ بالالى وتباسىلاردى جەڭىلدەتىلگەن باسپانامەن تولىقتاي قامتاماسىز ەتۋىمىز كەرەك. باسىمدىق جاريالانعان كەزدە 29 مىڭ وتباسى كەزەكتە تۇردى. بۇگىندە ولاردىڭ سانى 38 229. كەزەك ايتارلىقتاي جىلدام قارقىنمەن وسۋدە. ءبىز ءوسىمدى ەسكەرە وتىرىپ تۇرعىن ءۇي سالىپ جاتىرمىز. سوندىقتان العا قويىلعان مىندەتتەر تولىعىمەن ورىندالادى», – دەدى ق.وسكەنباەۆ.
ق.وسكەنباەۆ جاستار جىلى اياسىندا جۇمىس ىستەيتىن جاستارعا دا ارناپ ءۇش مەگاپوليستە 3 مىڭ جالدامالى پاتەر سالىنىپ جاتقانىن ايتتى. 2021 جىلعا دەيىن كورسەتكىش 9 مىڭعا جەتپەك.
«تۇرعىنۇيقۇرىلىسجيناقبانكى» اق باسقارما ءتورايىمى ءلاززات يبراگيموۆانىڭ ايتۋىنشا, بيىل اشىلعان «باقىتتى وتباسى» باعدارلاماسى بويىنشا الەۋمەتتىك از قامتىلعان وتباسىلارعا 10 پايىز باستاپقى تولەممەن جىلدىق 2 پايىز ۇستەمەمەن جەڭىلدەتىلگەن يپوتەكا بەرىلەدى. باعدارلاماعا قاتىسۋ ءۇشىن وتباسىنىڭ ءار مۇشەسىنە شاققاندا تابىس ايىنا 42 مىڭ 500 تەڭگەدەن از بولۋى كەرەك.
«بۇگىنگە دەيىن باعدارلاما بويىنشا «تۇرعىنۇيقۇرىلىس-جيناقبانكىنە» 5 مىڭداي ءوتىنىم ءتۇستى. سونىڭ 2,5 مىڭىنا يپوتەكا ماقۇلداندى. ال 455 وتباسى جاڭا ۇيلەرىنە قونىس اۋدارىپ ۇلگەردى. جىل سوڭىنا دەيىن باعدارلاما بويىنشا 5 مىڭ قازاقستاندىققا جاڭا پاتەردىڭ كىلتى تابىستالادى», – دەدى باسقارما ءتورايىمى.
ءلاززات يبراگيموۆانىڭ ايتۋىنشا, «باقىتتى وتباسى» باعدارلاماسى بويىنشا 10 پايىزدىق العاشقى تولەم بولماسا, نۇر-سۇلتان قالاسى مەن اقتوبە وبلىستارىندا 1 ملن تەڭگەگە دەيىنگى تۇرعىن ءۇي سەرتيفيكاتى بار.
جالپى, باعدارلاما بويىنشا نۇر-سۇلتان قالاسى (800 ءوتىنىم) مەن الماتى قالالارىنان (650 ءوتىنىم) جانە اقتوبە وبلىسىنان (542 ءوتىنىم) ەڭ كوپ ءوتىنىم تۇسكەن.
