اتاپ ايتقاندا, تۇركيا ۇلى ۇلتتىق ءماجىلىسىنىڭ سپيكەرى مۇستافا شەنتوپ, ازەربايجان ۇلتتىق ءماجىلىسىنىڭ توراعاسى وكتاي اسادوۆ, تۇركيانىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك, ازەربايجانىڭ قازاقستانداعى توتەنشە جانە وكىلەتتى ەلشىسى راشاد ماممادوۆ, بەلگىلى عالىم, ازەربايجان ۇلتتىق ءماجىلىسىنىڭ دەپۋتاتى جاۆانشير فايزيەۆ باستاعان دەلەگاتسيا وكىلدەرى حالىقارالىق تۇركى اكادەمياسىنىڭ پرەزيدەنتى دارحان قىدىرالىمەن كەزدەسىپ, اتقارىلىپ جاتقان جۇمىستارمەن تانىستى.
سونداي-اق كەزدەسۋگە تۇرىكپا-نىڭ باس حاتشىسى التىنبەك مامايۋسۋپوۆ, تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ, قازاقستان – تۇركيا پارلامەنتارالىق دوستىق توبىنىڭ جەتەكشىسى, دەپۋتات مەحمات ءالي جەۆحەري, ەكى ەل پارلامەنتتەرىنىڭ بىرقاتار دەپۋتاتى قاتىستى.
«بۇگىن ەلوردادا وتەتىن ەۋرازيا ءماجىلىس توراعالارى سپيكەرلەرىنىڭ جيىنىنا كەلگەن تۇركيا مەن ازەربايجان رەسپۋبليكالارى پارلامەنتتەرىنىڭ توراعالارى حالىقارالىق تۇركى اكادەمياسىنا ارنايى كەلىپ وتىر. بيىل 10 جىلدىعى اتالىپ ءوتىپ جاتقان ناحچۆان كەلىسىمى مەن ناحچۆان ءسامميتى تۋرالى دوڭگەلەك ۇستەل ءوتتى. تۇركيا ۇلى ۇلتتىق ءماجىلىسىنىڭ توراعاسى مۇستافا شەنتوپ باستاعان تۇركيالىق دەپۋتاتتار, ازەربايجان ۇلتتىق ءماجىلىسىنىڭ توراعاسى وكتاي اسادوۆ باستاعان مارتەبەلى مەيماندارمەن كەزدەسۋدە جالپى تۇركى ىنتىماقتاستىعىنداعى ەلباسى نۇرسۇلتان نازارباەۆتىڭ ورنى ەرەكشە اتالىپ ءوتتى. سونداي-اق ىنتىماقتاستىقتىڭ 10 جىلدىعىنىڭ دامۋ بارىسى, تۇركى اكادەمياسىنىڭ اتقارىپ جاتقان جۇمىستارى جايلى سوزدەر ايتىلدى. ورتاق تاريح, ورتاق ادەبيەت باعىتىنداعى اكادەميانىڭ جۇمىسىنا وڭ باعا بەرىلدى. 10 جىل بۇرىن ناحچۆاندا باستالعان ينتەگراتسيالىق جۇمىستاردىڭ بارلىعى ونىڭ باستاۋىندا ەلباسىنىڭ تۇرعانى اتالىپ ءوتتى», - دەدى دارحان قىدىرالى.
اكادەميا باسشىسى مەيمانداردى تۇركى مۋزەيىمەن تانىستىرىپ, بىرنەشە جىلدان بەرى قارقىندى تۇردە جۇرگىزىلىپ كەلە جاتقان ارحەولوگيالىق قازبا جۇمىستارىنىڭ ناتيجەسىن بايانداپ بەردى.
دەلەگاتسيا باسشىلارى مۋزەيدەگى «قوناقتار كىتابىنا» ىزگى تىلەكتەرىن جازىپ, قولتاڭبالارىن قالدىردى. وسىدان كەيىن حالىقارالىق تۇركى اكادەمياسىنىڭ كىتاپحاناسىندا جالعاسقان القالى جيىن بارىسىندا قاتىسۋشىلار تۇركى ەلدەرىنىڭ پارلامەنتارالىق ىنتىماقتاستىعى مەن تاريحي تامىرلاستىق, عىلىم جانە ءبىلىم سالاسىنداعى بايلانىستار جونىندە ءوز ويلارىن ورتاعا سالدى.
كەزدەسۋ سوڭىندا دارحان قىدىرالى مارتەبەلى مەيماندارعا تۇركى اكادەمياسى شىعارعان باعالى باسىلىمداردى سىيلادى. قۇرمەت رەتىندە اكادەميا باسشىسى مارتەبەلى مەيمانداردى حالىقارالىق تۇركى اكادەمياسىنىڭ التىن مەدالىمەن ماراپاتتاپ, شاپان جاپتى.
