جوسپار بويىنشا جەزقازعان قالاسىنداعى تالاپ اۋىلى, گەولوگيچەسكي, قوستانكەلدىساي, بەكبولاتساي ەلدى مەكەندەرىندە ورتالىق جىلۋ جۇيەسىنە قوسىلماعان بارلىعى 2 مىڭنىڭ ۇستىندەگى جەكە تۇرعىن ءۇي گازبەن قامتاماسىز ەتىلەدى. 2019-2020 جىلداردى قامتيتىن گازداندىرۋ جوسپارى بويىنشا مەردىگەر ء«اليا-سەرۆيس» جشس وسى جىلدىڭ سوڭىنا دەيىن اۆتوماتتى گاز تاراتۋ ستانساسىنان (اگتس) تالاپ اۋىلى مەن جەزقازعان قالاسىنىڭ پريستانتسيوننىي ەلدى مەكەنىنە ماگيسترالدى گاز قۇبىرىن تارتادى. سونىمەن بىرگە, تالاپ اۋىلىنداعى 148 ءۇي مەن مەكتەپ, كلۋب سىندى الەۋمەتتىك نىساندار دا بيىل كوگىلدىر وتىننىڭ يگىلىگىن كورمەك. قالانىڭ قالعان بولىگى كەستەگە ساي كەلەر جىلى گاز جەلىسىنە قوسىلماق.
ورالدىق ء«اليا-سەرۆيس» جشس ماماندارى قازىر تالاپ اۋىلىندا ىشكى گاز قۇبىرلارىن تارتۋدا. جوبا بويىنشا ءار ۇيگە گاز ەسەپتەگىش قۇرالدار ورناتۋ دا قاراستىرىلعان.
– قازىر تالاپ اۋىلىنىڭ ىشىندە ورتاشا جانە تومەن قىسىمداعى جالپى ۇزىندىعى 6,8 شاقىرىم گاز جەلىلەرىن تارتىپ جاتىرمىز. بۇگىندە 5,5 شاقىرىمى تارتىلىپ بولدى. اۋىل ىشىنە ورتاشا جانە تومەن قىسىمعا ارنالعان پلاستيك قۇبىرلار تارتىلۋدا. جۇمىس بيىل تولىق اياقتالادى, – دەيدى ء«اليا-سەرۆيس» جشس وكىلى ايدوس سەبەپوۆ.
مەردىگەر كومپانيا وكىلىنىڭ ايتۋىنشا, اگتس-تان پريستانتسيوننىي ەلدى مەكەنىنە دەيىن 16 شاقىرىم ماگيسترالدى تەمىر قۇبىرى تارتىلماق. بۇل جوعارى قىسىمداعى جەلى بولادى. قازىر دايىندىق جۇمىستارى جۇرۋدە.
– مۇنداعى جۇمىسقا بارلىعى 9 تەحنيكا, 25 ادام جۇمىلدىرىلعان. ونىڭ ىشىندە 10 ادامدى وسى تالاپ اۋىلىنان جۇمىسقا قابىلدادىق. تالاپتاعى جۇمىس اياقتالعان سوڭ پريستانتسيوننىي باعىتىنداعى جۇمىس جاندانادى. وعان قوسىمشا جۇمىس كۇشىن تارتاتىن بولامىز. كەلەر جىلى قالانىڭ باسقا اۋداندارىنا گاز جەتكىزەمىز, – دەيدى كومپانيا وكىلى.
مەردىگەر جۇمىسىنا تەحنيكالىق قاداعالاۋ جۇرگىزۋگە جاۋاپتى «قازارتقۇرىلىس» جشس وكىلى جەڭىس ءالىمجان جۇمىستىڭ كەستە بويىنشا ءجۇرىپ جاتقانىن, تەحنيكالىق تالاپتار مەن جوبالىق قۇجاتتاردان اۋىتقۋشىلىق جوق ەكەنىن ايتادى.
ەكى جىلعا جوسپارلانعان جەزقازعان قالاسىن گازداندىرۋ جوباسىنا بيۋدجەتتەن 3 ملرد تەڭگە قاراجات قاراستىرىلعان. الدىن الا بولجام بويىنشا قالادا ءبىر تەكشە مەتر گازدىڭ قۇنى 47 تەڭگەنى قۇراماق.
ەستەرىڭىزگە سالساق, قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆ 2018 جىلعى 5 ناۋرىزدا ءوزىنىڭ بەس الەۋمەتتىك باستاماسىن جاريالاپ, وندا استانانى گازداندىرۋ تۋرالى تاپسىرما بەرگەن ەدى.
بيىل ناۋرىزدا العاشقى دانەكەرلەۋ جۇمىستارى باستالىپ, بۇگىندە بۇل قۇبىر ەلورداعا دا جەتىپ قالدى. ماگيسترالدى قۇبىردىڭ 80 پايىزى قاراعاندى وبلىسىنىڭ اۋماعىمەن وتەدى. اۋقىمدى جوبا اياسىندا قاراعاندى وبلىسىندا جەزقازعان, تەمىرتاۋ, اباي, ساران, شاحتينسك قالالارى مەن وبلىستاعى باسقا دا 114 ەلدى مەكەندى گازداندىرۋ جوسپارلانعان.
دارحان مۇحان,
جۋرناليست
جەزقازعان
