ءىس-شاراعا وبلىس اكىمى دانيال احمەتوۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, ءبىلىم جانە عىلىم ءمينيسترى اسحات ايماعامبەتوۆ, مادەنيەت جانە سپورت ءمينيسترى اقتوتى رايىمقۇلوۆا, دەنساۋلىق ساقتاۋ ۆيتسە-ءمينيسترى كامالجان نادىروۆ, اقپارات جانە قوعامدىق دامۋ ۆيتسە-ءمينيسترى دانيار يسين, سونداي-اق ۇكىمەتتىك ەمەس جانە جاستار ۇيىمدارى, بيزنەس قوعامداستىقتار, شىعارماشىلىق جانە عىلىم, زيالى قاۋىم وكىلدەرى قاتىستى.
ۆيتسە-پرەمەر ءوز سوزىندە مەملەكەت باسشىسىنىڭ ساياساتى حالىقتى ەڭبەك ەتۋگە شاقىرىپ, مەملەكەتتىك قولداۋ مەحانيزمىن قولدانۋعا باستايتىنىن اتاپ ءوتتى.
«بيىل 400 مىڭ وتباسىعا نەمەسە 2 ميلليونعا جۋىق قازاقستاندىققا اتاۋلى الەۋمەتتىك كومەك تاعايىندالدى. الايدا جاردەماقىنىڭ جاعدايى بار ادامدارعا دا تولەنىپ كەلگەنى انىقتالدى. ەسكەرتە كەتەتىن جايت, اتاۋلى الەۋمەتتىك كومەك تەك مۇقتاج جاندارعا عانا كورسەتىلۋى ءتيىس. ال ەڭبەككە جارامدى ادامدار جۇمىس ىستەۋى ءتيىس. ەگەر ماماندىعى جوق بولسا, وقىتىپ, جۇمىس تاۋىپ بەرۋگە, گرانت پەن شاعىن نەسيە الۋعا, جەكە بيزنەسىن اشۋعا قولداۋ كورسەتە الامىز. الەۋمەتتىك قولداۋ قوعامدى مەملەكەت اسىرايدى دەگەن ۇعىمعا يلاندىرماۋى كەرەك», دەدى ب.ساپارباەۆ.
سونداي-اق جاس بۋىننىڭ تاربيەسى مەن وتباسىلىق قۇندىلىقتاردى ساقتاۋ ماسەلەلەرىنە باسا توقتالدى.
«وكىنىشكە قاراي, جاستار اراسىندا, ونىڭ ىشىندە كامەلەتتىك جاسقا تولماعان بالالاردىڭ ورتاسىندا قىلمىس پەن زورلىق-زومبىلىق جاعدايلارى ءورشىپ بارادى. سوندىقتان مەملەكەت پەن قوعام بىرلەسە وتىرىپ وسى باعىتتا ءتيىمدى جۇمىس ىستەۋى كەرەك. اتا-انالار بالالارىنا سانالى تاربيە بەرىپ, ادامگەرشىلىك, مورالدىق قاسيەتتەرىن بويلارىنا سىڭىرە وسۋىنە زور كوڭىل ءبولۋى ءتيىس», دەدى ول.
كەزدەسۋ بارىسىندا تۇرعىندارمەن قوعامدىق كەلىسىمدى نىعايتۋ, انا مەن بالانى قولداۋ, دەنساۋلىق ساقتاۋ جانە الەۋمەتتىك قورعاۋ سالالارىنداعى قىزمەت كورسەتۋ ساپاسىن ارتتىرۋ, مادەنيەت پەن سپورتتى دامىتۋ سياقتى باسقا دا ماسەلەلەر تالقىلاندى.
ۇكىمەتتىك دەلەگاتسيا سەمەي قالاسىنداعى جەدەل مەديتسينالىق جاردەم اۋرۋحاناسىنداعى بىرەگەي انگيوگرافيالىق قۇرىلعىمەن جاساقتالعان گيبريدتى وپەراتسيا جاساۋ ءبولىمىنىڭ جۇمىسىمەن تانىستى. رەسپۋبليكادا ءبىرىنشى بولىپ اشىلعان وپەراتسيالىق ءبولىمنىڭ ەرەكشەلىگى, ناۋقاستارعا ءبىر مەزگىلدە بىرنەشە اشىق ادىسپەن جانە ينتەرۆەنتسيالىق ارالاسۋ ارقىلى كەشەندى گيبريدتى وتا جاساۋعا مۇمكىندىك بەرەدى. گيبريدتى وتا جاساۋ قوندىرعىسىن ورناتۋ جانە عيماراتتى قايتا قالپىنا كەلتىرۋ جۇمىستارىنا جەرگىلىكتى بيۋدجەتتەن 2,3 ملرد تەڭگە, ونىڭ ىشىندە جابدىقتاۋعا 1,7 ملرد تەڭگە جۇمسالدى. ايتا كەتەيىك, كەشەن حالىقارالىق JCI تالاپتارىنا ساي, «التىن» ستاندارت جۇيەسى بويىنشا سالىندى. ورتالىق اشىلعالى بەرى 263 وپەراتسيا جاسالىندى. جالپى جىل سايىن 2,9 مىڭ وپەراتسيا جاساۋ جوسپارى تۇر. ەلوردادان كەلگەن مارتەبەلى مەيماندار شاھارداعى ەلەكتروتەحنيكالىق كوللەدجدىڭ تىنىس-تىرشىلىگىمەن تانىسۋ بارىسىندا ءبىلىم سالاسىنداعى مەملەكەتتىك باعدارلامالاردى جۇزەگە اسىرۋ, قىزمەت كورسەتۋ ساپاسىن ارتتىرۋ, مۇعالىمدەردىڭ الەۋمەتتىك مارتەبەسىن كوتەرۋ سياقتى باسقا دا ماسەلەلەر كوتەرىلدى.
ۇكىمەتتىك دەلەگاتسيا رەسمي ساپاردىڭ العاشقى كۇنىندە ۇلىلار مەكەنى – اباي اۋدانىنا ات باسىن بۇرىپ, كەلەسى جىلى 175 جىلدىعى يۋنەسكو كولەمىندە مەرەكەلەنگەلى وتىرعان ۇلى اقىن اباي قۇنانباي ۇلىنىڭ مەرەيتويىن وتكىزۋدىڭ جاي-جاپسارىن جان-جاقتى تالقىلادى. «مەملەكەت باسشىسى قاسىم-جومارت توقاەۆتىڭ مەرەيتويدى جوعارى دەڭگەيدە مەرەكەلەۋ تۋرالى جارلىعى شىقتى. اباي قۇنانباي ۇلىنىڭ 175 جىلدىعىن دايىنداۋ جانە وتكىزۋ جونىندەگى مەملەكەتتىك كوميسسيا قۇرىلدى. مەملەكەتىمىز اقىن مەرەيتويىن جوعارى دەڭگەيدە تاعىلىمدى شارالارمەن اتاپ وتۋگە ازىرلەنىپ جاتىر. بۇل رەتتە دارا تۇلعا دۇنيەگە كەلگەن توپىراق – ۇلىلار مەكەنى شىڭعىستاۋ الەمنىڭ تۇكپىر-تۇكپىرىنەن كەلەتىن قوناقتاردى قارسى الۋعا دايىن بولۋى قاجەت. بۇل جەر تۋريستىك ورتالىققا اينالادى. قازىر ۇكىمەت, وبلىس باسشىلىعى تاراپىنان ءتيىستى جۇمىستار قولعا الىنىپ جاتىر. ەڭ باستىسى, اقىن مەرەيتويى ۇلكەن تاربيەلىك ءمانى زور شارالارمەن ەستە قالۋى كەرەك» دەدى ب.ساپارباەۆ اباي اۋدانىنىڭ ورتالىعى – قاراۋىل اۋىلىندا اقىن ۇرپاقتارى مەن جەرگىلىكتى اقساقالدارمەن كەزدەسۋىندە.
بۇدان ءارى پرەمەر-مينيستر ورىنباسارىنىڭ رەسمي ساپارى وسكەمەن قالاسىندا جالعاستى. ەڭ اۋەلى ۇكىمەتتىك دەلەگاتسيا شاھار جۇرتشىلىعىمەن جۇزدەسىپ, پرەزيدەنت جولداۋىنىڭ نەگىزگى باعىتتارىن ءتۇسىندىرىپ, تۇرعىنداردىڭ ساۋالدارىنا جاۋاپ بەردى. ساپار اياسىندا ۇكىمەت باسشىسىنىڭ ورىنباسارى وبلىس ورتالىعىنداعى «سيلۋمين ۆوستوك» كاسىپورنى مەن روبوتتاندىرىلعان حيرۋرگيا ورتالىعىنىڭ جۇمىسىمەن تانىستى.
ۇكىمەتتىك دەلەگاتسيا مۇشەلەرى 21 قىركۇيەكتە التاي اۋدانىنا جول تارتىپ, تۇرعىسىن اۋىلىنىڭ تۇرعىندارىمەن كەزدەسىپ, التاي قالاسىنداعى ينسۋلتتىك ورتالىقتى كوردى. «قاي كەزدە اۋدان دارىگەرلەرى انگلياعا بارىپ, تاجىريبەلەرىن شىڭداپ ەدى؟ قاي كەزدە اۋدان ورتالىعىندا كومپيۋتەرلىك توموگرافيا بولىپ ەدى؟! دەنساۋلىق جانە باسقا دا سالالار بويىنشا شىعىس قازاقستان وبلىسى اتقارىپ جاتقان جۇمىستاردى قازىر باسقا وڭىرلەر جاساي الىپ وتىرعان جوق» دەگەن بەردىبەك ساپارباەۆ ايماقتىڭ الەۋمەتتىك سالاسىنداعى جۇرگىزىلىپ جاتقان جۇمىستارعا جوعارى باعا بەردى.
شىعىس قازاقستان وبلىسى
