رۋحانيات • 22 قىركۇيەك، 2019

نۇرتاس وڭداسىنوۆ تۋرالى دەرەكتى ءفيلمنىڭ تۇساۋكەسەرى ءوتتى ​

138 رەتكورسەتىلدى

دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا جاستارمەن كەزدەسۋ وتكىزدى. بۇل جونىندە دۇنيەجۇزى قازاقتارىنىڭ قاۋىمداستىعى ءباسپاسوز قىزمەتىنىڭ باسشى-حاتشىسى سىرىمبەك تولەۋ حابارلادى.

كەزدەسۋدىڭ باستى تاقىرىبى الاشتىڭ ەلىمىز بەن جەرىمىزدىڭ تۇتاستىعىنا ۇلكەن ۇلەس قوسقان تەكتى تۇلعالارى تۋرالى ءوربىدى. زاۋىتبەك تۇرىسبەكوۆ قازاقستاننىڭ تۇڭعىش پرەزيدەنتى-ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا اتقارىلعان جۇمىستاردىڭ جۇزەگە اسۋىنىڭ ماڭىزدىلىعىن اتاپ ءوتىپ، جاستاردى وتانسۇيگىشتىككە جانە ءوز وتانىنىڭ تاريحىن بىلۋگە ​​شاقىردى.

شاراعا جينالعان زيالى قاۋىم وكىلدەرىمەن قاتار ماگيسترانتتار، دوكتورانتتار جانە اكادەميا ستۋدەنتتەرى ەلىمىز تاريحىنا قاتىستى ايتىلعان اڭگىمەلەرگە ۇلكەن قىزىعۋشىلىق تانىتتى.

«كەشەگى كەڭەستەر وداعىن باسقارعانداردىڭ ءبىرى نيكيتا حرۋششەۆتىڭ ەڭ زور ساياسي قاتەلىگى – قازاق دالاسىن يادرولىق سىناق الاڭىنا اينالدىرۋى مەن جەرىن بولشەكتەپ، ماسكەۋگە باعىندىرعىسى كەلۋى بولدى. ونىڭ سىرتىندا مۇنايلى ايماعىن تۇركىمەنستان مەن ازىربايجانعا، وڭتۇستىك ءوڭىردى وزبەكستانعا بەرە سالۋى سياقتى ز ۇلىمدىق يدەياسىنا اشىقتان-اشىق قارسى شىعىپ، ۇلتىنىڭ مۇددەسىن قولىنداعى بيلىكتەن دە بيىك قويعان حالقىمىزدىڭ ارىستان تەكتەس تۇلعالارىن بۇگىنگى جاستار ءبىلۋى كەرەك» دەدى زاۋىتبەك قاۋىسبەك ۇلى. ءوزىنىڭ باستاماسىمەن تۇسىرىلگەن نۇرتاس وڭداسىنوۆ تۋرالى دەرەكتى ءفيلمنىڭ تۇساۋكەسەرى بولدى، ونى كەزدەسۋگە جينالعان زيالى قاۋىم وكىلدەرى، عالىمدارمەن قاتار، جاستار تاماشالادى. سونداي-اق زاۋىتبەك تۇرىسبەكوۆ «كىسەندەۋلى جولبارىس» اتانعان جۇمابەك تاشەنەۆ، جان باسپاعان جاپان دالامىزدىڭ قويناۋىنان «قارا التىننىڭ» قويماسىن اشقان قانىش ساتپاەۆ پەن شاحماردان ەسەنوۆتەر، قازاق تاريحىندا ويىپ الار ورنى بار باسقا دا تۇلعالار جونىندە ەرەكشە تولعانىسپەن جەتكىزدى.

ەسكە سالا كەتسەك، دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ تاريحي تۇلعالار جونىندە دەرەكتى فيلمدەر ءتۇسىرۋ يدەياسىن ۇسىنىپ، قولداۋ كورسەتكەن بولاتىن.

فيلمدەردىڭ اۆتورى – نازگۇل ابۋتراپوۆا.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار