بۇگىنگى تاڭدا جامبىل وبلىسىندا بارلىعى 14 فرونت-كەڭسە جۇمىس اتقارادى. پوليتسيانىڭ حالىقپەن بايلانىس جاساۋداعى ەنگىزىلگەن جاڭاشىلدىق ءۇردىسى قوعامدىق ديالوگتى ۇيىمداستىرۋدى ايتارلىقتاي جاقسارتۋدا. سونىمەن قاتار ازاماتتاردىڭ قاجەتتىلىكتەرىنە قاتىستى اشىقتىق پەن جەدەل دەن قويۋ قاعيداتتارىن ىسكە اسىرۋعا مۇمكىندىك بەرۋدە. مۇندا اكىمشىلىك پوليتسيا, كوشى-قون جانە جەرگىلىكتى پوليتسيا قىزمەتىنىڭ ماماندارى تۇرعىنداردىڭ سۇراقتارىنا جاۋاپ بەرىپ, ءتۇرلى ماسەلەلەردى شەشۋگە قاتىستى قاجەتتى كومەك كورسەتەدى. سونىمەن قاتار, حالىققا كورسەتىلەتىن مەملەكەتتىك قىزمەتتەر بويىنشا اقپارات بەرەدى. سونداي-اق فرونت-كەڭسە قىزمەتكەرلەرى وزدەرىنىڭ تىكەلەي مىندەتتەرىن ورىنداۋمەن قاتار, قۇقىق قورعاۋ ورگاندارىنىڭ جۇمىسىن جاقسارتۋ جونىندەگى ازاماتتاردىڭ ۇسىنىس-پىكىرلەرىن دە تىركەيدى. «قۇقىق قورعاۋ ورگاندارىندا بۇرىن-سوڭدى ازاماتتاردى قابىلدايتىن مۇنداي فرونت-كەڭسەلەردىڭ بولماعانىن ەسكەرسەك, دەپارتامەنت باسشىلىعى وبلىس تۇرعىندارى ءۇشىن بۇل جاڭاشىلدىقتىڭ تيگىزەر پايداسى مول بولاتىنىنا سەنىم ارتىپ وتىر», دەيدى جامبىل وبلىستىق پوليتسيا دەپارتامەنتىنىڭ ءباسپاسوز حاتشىسى گۇلسارا مۇحتارقۇلوۆا.
جاڭا فرونت-كەڭسە ءوز جۇمىسىن باستاعاننان كەيىن وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى ارمان ورازاليەۆ ازاماتتاردى جەكە قابىلدادى. بۇدان كەيىن تاراز قالاسىنىڭ پوليتسيا باسقارماسى مەن №2 قالالىق پوليتسيا بولىمىندە اشىلعان جاڭا فرونت-كەڭسەلەرمەن تانىستى. بۇگىنگى تاڭدا فرونت-كەڭسە قىزمەتكەرلەرىنە بارلىعى 5000-نان استام ادام جۇگىنگەن. ولاردىڭ بارلىعىنا دەر كەزىندە قۇقىقتىق كومەك كورسەتىلىپ كەلەدى جانە ءاربىر وتىنىشكە ازاماتتار تولىققاندى جاۋاپ الۋدا.
