قازاقستان • 20 قىركۇيەك، 2019

كورنەكتى مەملەكەت جانە قوعام قايراتكەرى ءابىش كەكىلباي ۇلىنا الماتىدان كوشە بەرىلدى

191 رەتكورسەتىلدى

قازاقستاننىڭ حالىق جازۋشىسى، ەڭبەك ەرى، كورنەكتى مەملەكەت جانە قوعام قايراتكەرى ءابىش كەكىلباي ۇلىنىڭ 80 جىلدىعىنا ارنالعان ءىس-شارالار شەرۋى الماتىدان باستاۋ الدى. قالانىڭ تاۋ بەتكەيى تۇسىنداعى كابلۋكوۆا كوشەسى ەندى ءابىش كەكىلباي ۇلىنىڭ ەسىمىمەن اتالاتىن بولادى. قاراسوزدىڭ حاس شەبەرىن ماڭگىلىك ەستە قالدىرۋ شاراسىنا جينالعان زيالىلار مەن تۋعان جەرىنەن، الىس-جاقىن ايماقتاردان كەلگەن قاۋىمنىڭ قاراسى قالىڭ بولدى. ولاردىڭ ءبارى دە شاھارداعى ۇزىن ءارى كورىكتى كوشەنىڭ لايىقتى يەسىن تاپقانىنا قۋانىش ءبىلدىردى. كوشەنىڭ اشىلۋ راسىمىنە الماتى قالاسىنىڭ اكىمى باقىتجان ساعىنتاەۆ قاتىسىپ، ۇلت رۋحانياتىنا ولشەۋسىز ۇلەس قوسقان جازۋشىنىڭ ەسىمىن ۇلىقتاۋدىڭ ماڭىزىن اتاپ ءوتتى.

«بۇگىنگى شارانىڭ الماتى قالاسىندا ءوتۋىنىڭ ماڭىزى زور. ۇلى جازۋشى بوزبالا شاعىندا وسىندا كەلىپ، ءومىرىنىڭ ەڭ باقىتتى دا ماعىنالى شاقتارىن وسى الماتى قالاسىندا وتكىزدى. جازۋشىلىق ونەردىڭ، سۋرەتكەرلىك شەبەرلىكتىڭ شىڭىنا شىقتى. مەملەكەتتىك قىزمەت پەن ساياسات ساحناسىندا جاسىنداي جارقىلداپ، ءسوز باستار شەشەنگە، وي تاستار كوسەمگە اينالدى. «جاقسى بولۋدىڭ جاقسىلىق جاساۋدان باسقا جولى جوق» دەيتىن ءابىش كەكىلباەۆتىڭ سوزىندە دە، شىعارماشىلىعىندا دا جاساندىلىق بولعان جوق. ءابىش شىعارمالارىن وقي وتىرىپ، قازاق دەگەن حالىقتىڭ ۇلتتىق مىنەزىن، مادەنيەتىنىڭ سان قىرلى قاتپارىن جازباي تانۋعا بولادى. ول تۋىندىلار ۇلت تاريحىنىڭ جىلناماسىنداي، ءوزىمىز ءومىر ءسۇرىپ جاتقان قوعام مەن زاماننىڭ تىنىسىنداي بولدى»،– دەدى باقىتجان ساعىنتاەۆ.

وزەن جاعاسىندا ورنالاسقان كوشەگە كورىك بەرگەن كورنەكتى تۇلعا تۋرالى بەلگىلى جازۋشى، مەملەكەتتىك سىيلىقتىڭ لاۋرەاتى قاجىعالي مۇحامەتقالي، مەرەكە قۇلكەنوۆ، قازاقستاننىڭ ەڭبەك سىڭىرگەن قايراتكەرى، جەلاياق سپورتشى امەن تۇياقوۆ سىندى زامانداستارى، جارى كلارا جۇماباەۆا جىلى ەستەلىكتەرىمەن ءبولىستى.

سوڭعى جاڭالىقتار

ۇقساس جاڭالىقتار