قوعام • 20 قىركۇيەك، 2019

بقو-دا 1094 وتباسى ااك الۋ ءۇشىن تابىسىن جاسىرۋعا تىرىسقان

53 رەتكورسەتىلدى

باتىس قازاقستان وبلىسىندا (بۇدان ءارى – بقو) 2516 وتباسىنىڭ اتاۋلى الەۋمەتتىك كومەك (بۇدان ءارى – ااك) الۋىنىڭ زاڭدىلىعى تەكسەرىلدى، ونىڭ ىشىندە 586 وتباسىنا  تولەم ۋاقىتشا توقتاتىلعان بولسا، تاعى 508 وتباسىنا تولەم مۇلدەم تولەنبەيتىن بولدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى قايىرعالي نادىرعاليەۆ بقو تۇرعىندارىنىڭ الەۋمەتتىك قىزمەت قىزمەتكەرلەرىن الداۋىنىڭ ورەسكەل فاكتىلەرى تۋرالى حابارلادى. ونىڭ ايتۋىنشا، ااك تاعايىنداۋ كەزىندە ەڭ كوپ تارالعان بۇزۋشىلىق ناقتى تابىستاردى جاسىرۋ بولىپ تابىلادى

«وسىلايشا، ورالدا التى بالانىڭ اناسى وتكەن جىلدىڭ جەلتوقسان ايىنان باستاپ ااك الا باستادى. الەۋمەتتىك كومەك الۋدىڭ زاڭدىلىعىن تەكسەرۋ بارىسىندا ءبىز وتباسىنىڭ ناقتى تابىسىنىڭ جاسىرىلعانىن انىقتادىق. 2018 جىلى جەكە كاسىپكەر رەتىندە تىركەلگەن وتاعاسىنىڭ 6 ميلليون 904 مىڭ 550 تەڭگە كولەمىندەگى تابىسىن جاسىرعان. اعىمداعى جىلدىڭ ءبىرىنشى جارتىجىلدىعىنداعى سالىق ەسەپتەرى بويىنشا وتباسىنىڭ تابىسى 3 ميلليون 877 مىڭ تەڭگەنى قۇرادى. قايتا ەسەپتەۋ ناتيجەسىندە وتباسىنا ااك تولەۋدەن باس تارتىلدى»، – دەدى قايىرعالي نادىرعاليەۆ.

وسىعان ۇقساس جاعداي جاڭاقالا اۋدانىندا دا ورىن الدى. وتكەن جىلدىڭ ءساۋىر ايىندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسى اياسىندا ءوتىنىش بەرۋشىنىڭ قايىن اتاسى 5 ميلليون 200 مىڭ تەڭگە كولەمىندە كرەديت الىپ، ول قاراجاتقا 17 ءىرى قارا مال ساتىپ العان.

ء«وتىنىش بەرۋشىنىڭ بىرگە تۇرىپ جاتقان قايىن اتاسى جەڭىلدەتىلگەن كرەديتكە ساتىپ العان ءىرى قارا مالدى كورسەتپەستەن وتباسىنىڭ ناقتى تابىسىن جاسىرعانىن ەسكەرە وتىرىپ، وعان 1 ملن 530 مىڭ 612 تەڭگە كولەمىندە ااك تولەۋ توقتاتىلدى. ءساۋىر مەن مامىر ايلارىندا 255 مىڭ 100 تەڭگە كولەمىندە تولەنگەن قاراجات بيۋدجەتكە قايتارىلدى»، – دەدى نادىرعاليەۆ.

اعىمداعى جىلعى 16 قىركۇيەكتەگى جاعداي بويىنشا بقو-نىڭ 59 مىڭ 566 تۇرعىنى نەمەسە 11 مىڭ 778 وتباسى 3،7 ملرد تەڭگە كولەمىندە ااك الدى.

ەستەرىڭىزگە سالا كەتەيىك، ااك تاعايىنداۋ مەن تولەۋدىڭ دۇرىستىعىن مونيتورينگتەۋ ناتيجەسىندە 72 مىڭنان استام اتاۋلى الەۋمەتتىك كومەك الۋشى تابىسى تۋرالى جالعان اقپارات بەرگەنى انىقتالدى.

وسىعان بايلانىستى مينيسترلىك اكىمدىكتەرمەن بىرلەسە وتىرىپ، ءاربىر انىقتالعان فاكتى بويىنشا، بۇزۋشىلىقتارعا جول بەرمەۋ جانە «مەملەكەتتىك اتاۋلى الەۋمەتتىك كومەك تۋرالى» قر زاڭىن بۇزىپ زاڭسىز تاعايىندالعان تولەمدەردى قايتا قاراۋ بويىنشا جەكە-جەكە جۇمىس جۇرگىزۋدە. بۇل باعىتتاعى جۇمىس جالعاسىپ جاتىر.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار