الەم چەمپيوناتىنىڭ سوڭعى ىرىكتەۋ جەكپە-جەگىنە دەيىن ءساتتى ونەر كورسەتىپ كەلگەن قازاقستان قۇراماسى بوكسشىلارى شيرەك فينالعا شىعاردا ءسۇرىندى. وكىنىشكە قاراي, 63 كيلودا سىنعا تۇسكەن وتانداسىمىز زاكىر سافيۋللين جارىس جولىنان شىعىپ قالدى. شيرەك فينالعا جولداما بەرۋشى جەكپە-جەكتە قانداسىمىز 2017 جىلعى الەم چەمپيونى جانە پانامەريكا ويىندارىنىڭ ەكى دۇركىن جەڭىمپازى, كۋبالىق ەندي كرۋز گومەستەن جەڭىلىپ قالدى. تورەشىلەر 5:0 ەسەبىمەن جەڭىستى ءبىراۋىزدان كۋبالىق بوكسشىعا بەرگەن. وسىلايشا قازاقستان كومانداسى ساپىنان جۇلدەدەن ءۇمىتتى ءبىر بوكسشى جارىستى ەرتە اياقتاۋعا ءماجبۇر بولدى. 32 جاستاعى وتانداسىمىز بيىل ەكىنشى رەت الەم بىرىنشىلىگىنە قاتىستى. 2015 جىلى قاتار استاناسى دوحادا وتكەن باسەكەدە ءبىرىنشى اينالىمدا سۇرىنگەن-ءدى.
سونىمەن قاتار شيرەك فينالدا الەم چەمپيونى قايرات ەراليەۆ كۇتپەگەن جەردە حالىقارالىق دەڭگەيدە تاجىريبەسى از وزبەكستاندىق بوكسشىدان جەڭىلىپ قالدى. ميرازيزبەك ميرزاحاليلوۆپەن بولعان جەكپە-جەك بارىسىندا ءبىزدىڭ بوكسشىنىڭ باسىمداۋ بولعانى راس ەدى. ەكىنشى راۋندتاعى شارتپا-شۇرت ايقاس كەزىندە ەكەۋى باسپەن ءسۇزىسىپ قالعان.سالدارىنان ەراليەۆتىڭ قاباعى جارىلدى. وسى كەزدە, تورەشى جەكپە-جەكتى توقتاتتى دا, وزبەكستاندىق بوكسشىنىڭ قولىن كوتەردى. ال شيرەك فينالدا جۇدىرىقتاسقان قالعان التى بوكسشىنىڭ ءبارى دە قارسىلاستارىن ەش قيىندىقسىز جەڭىپ, الەم چەمپيوناتىنىڭ جارتىلاي فينالىنا جولداما الدى.
اتاپ ايتار بولساق, شيرەك فينالدا 52 كيلودا جۇدىرىقتاسقان ساكەن بيبوسىنوۆ پەن اسا اۋىر سالماقتاعى قامشىبەك قونقاباەۆتىڭ ونەرىنە قازاق جانكۇيەرلەرى ءتانتى بولدى. ەكەۋى دە قارسىلاستارىنىڭ سوققىسىن وزدەرىنە دارىتپاي, اۋا قارماتىپ قالۋعا تىرىستى. بيبوسىنوۆ پەن قونقاباەۆتىڭ جەكپە-جەگىن قاراپ وتىرىپ, ايگىلى ۋكراينالىق باپكەر اناتولي لوماچەنكونىڭ (ۆاسيلي لوماچەنكونىڭ اكەسى – رەد) كاسىپقوي بوكستىڭ اۋىر سالماعىنداعى الەكساندر ۋسيك پەن مۋرات گاسسيەۆ جەكپە-جەگىندە ۋسيككە ايتقان: «ول سەنى ەمەس, اۋانى ۇرۋى كەرەك» دەگەن ءسوزى بىردەن ويىمىزعا ورالدى.
ال 81 كيلوداعى بەكزات نۇرداۋلەتوۆ وسىمەن ءۇشىنشى جەكپە-جەگىندە كارسىلاسىن نوكداۋنعا ءتۇسىردى. تۇركيالىق بوكسشى بايرام مالكانعا قارسى وتكەن كەزدەسۋدە وتانداسىمىز 4:0 ەسەبىمەن جەڭىسكە جەتتى. ءبىر تورەشى جەكپە-جەكتى تەڭ ءوتتى دەپ ەسەپتەگەن. سونىمەن قاتار 69 كيلوداعى ابىلايحان ءجۇسىپوۆ دومينيكان رەسپۋبليكاسىنىڭ وكىلى روحان پولانكونى, 75 كيلوداعى تۇرسىنباي قۇلاحمەت ارمەنيالىق ارمان دارچانياندى جانە 91 كيلو سالماقتا جۇدىرىقتاساتىن ۆاسيلي لەۆيت يوردانيالىق حۋسسەين ءياشايشتى سان سوقتىرىپ كەتتى.
كەشە جارتىلاي فينالعا شىققان بوكسشىلارعا ءبىر كۇندىك دەمالىس بەرىلدى. ەندى بۇگىن وتانداستارىمىز فينالعا شىعۋ ءۇشىن بارىن سالادى. بىراق قارسىلاستارى دا قاراپ قالمايتىنى انىق. 52 كيلوداعى ساكەن بيبوسىنوۆ بيىلعى ازيا چەمپيونى, ۇندىستاندىق اميت پانگالمەن كەزدەسەدى. 69 كيلوداعى ابىلايحان ءجۇسىپوۆ شارشى الاڭ يەسى اندرەي زامكوۆويمەن جۇدىرىقتاسادى. 2009 جىلعى الەم چەمپيوناتىنىڭ كۇمىس, لوندون وليمپياداسىنىڭ قولا جۇلدەگەرى قازاقستاندىق بوكس جانكۇيەرلەرىنە جاقسى تانىس. 75 كيلودا ونەر كورسەتەتىن تۇرسىنباي قۇلاحمەت فينال جولداماسى ءۇشىن تالاستا فيليپپيندىك ەۋمير مارسيالمەن قولعاپ تۇيىستىرەدى.
سونىمەن قاتار بەكزات نۇرداۋلەتوۆ (81 كگ) جارتىلاي فينالدا وليمپيادا چەمپيونى, الەم بىرىنشىلىگىنىڭ ءتورت دۇركىن جەڭىمپازى كۋبالىق حۋليو سەزار لا كرۋزبەن كەزدەسەدى. 91 كيلوداعى ۆاسيلي لەۆيتتىڭ جارتىلاي فينالداعى قارسىلاسى – ەكۆادورلىق حۋلير سەزار كاستيلليو توررەس. اسا اۋىر سالماقتاعى قامشىبەك قوڭقاباەۆتى اۋستراليالىق دجاستيس حۋني كۇتىپ تۇر. جارتىلاي فينالدىڭ جەكپە-جەكتەرى نۇر-سۇلتان ۋاقىتىمەن 16:00-دە باستالادى.
تاعى ءبىر ايتا كەتەرلىگى, قازاقستان الەم چەمپيوناتىندا جارتىلاي فينالعا شىققان بوكسشىلار سانى بويىنشا (7) ءبىرىنشى ورىندا تۇر. ەكىنشى ورىندا بەس بوكسشىمەن وزبەكستان قۇراماسى بولسا, ءۇشىنشى ورىندى ءتورت بوكسشىمەن رەسەي جانە انگليا قۇرامالارى ءبولىسىپ تۇر. ال كۋبانىڭ ءۇش بوكسشىسى جارتىلاي فينالدا جۇدىرىقتاسادى.
