كەشە كەشكى ساعات جەتىلەر شاماسىندا «الماتى-قوستاناي» باعىتىمەن شىققان №43 پوەزى «الماتى-قاسكەلەن» باعىتىنداعى №456 اۆتوبۋسقا سوعىسىپ, اپات سوڭى اۆتوبۋس جۇرگىزۋشىسى قايتىس بولىپ, 3 جولاۋشى زارداپ شەككەن. وقيعانىڭ ءمان-جايىنا توقتالعان رومان سكلياردىڭ ايتۋىنشا پوەزد 2434 مەتر قاشىقتىقتا كەلە جاتقاندا-اق, اۆتوماتتى تۇردە دابىل بەلگىلەرى قوسىلعان. باعدارشامنىڭ قىزىل ءتۇسى جانىپ, تەمىرجول وتكەلىنىڭ توسقاۋى تولىقتاي جابىلماعان. سەبەبى, جول بويىنداعى كولىك كەپتەلىستەن اۆتوبۋس تەمىر جولدىڭ ۇستىنە شىعىپ كەتكەن.
رومان سكليار: «پوەزد ءماشينيسىنىڭ كولىكتى ەرتە توقتاتۋ ارەكەتى بولعانىمەن, ىسكە اسپاعان. ساعاتىنا 97 كم جىلدامدىقپەن كەلە جاتقان. ال پوەزد ىشىندە زارداپ شەككەندەر جوق. بۇگىنگى تاڭدا ەم قابىلداپ جاتقان بارشا زارداپ شەككەندەرگە مەديتسينالىق, الەۋمەتتىك كومەك كورسەتىلەدى», - دەدى.
ال ىشكى ىستەر ءمينيسترى ەرلان تۇرعىمباەۆتىڭ ايتۋىنشا, مۇنداي جاعدايلار جۇرگىزۋشىلەردىڭ ەرەجەنى ساقتاماۋىنان ءجيى ورىن الادى ەكەن. ناقتى كەشەگى وقيعاعا قاتىستى تەرگەۋ امالدارى جۇرگىزىلىپ, جاۋاپتى ادامدارعا ءتيىستى جازا قولدانىلادى دەدى.
بۇگىندە ەلىمىزدە, تەمىر جول مەن اۆتو جولدار 1058 جەردە توعىسقان. ونىڭ 467-ءسى كۇزەتىلەدى. ءار توعىسقان ورىندا دابىل بەلگىلەرى ورناتىلىپ, تەمىرجول وتكەلىنىڭ توسقاۋلارى جاڭا قوندىرعىلارمەن جابدىقتالعان.
