پرەزيدەنتتىڭ قازاقستان حالقىنا ارناعان جولداۋىن زيالى قاۋىممەن بىرگە ۇلكەن القالى زالدا تىڭدادىم. جولداۋدا ەلىمىزدە اتقارىلىپ جاتقان وڭ وزگەرىستەرگە, الدا اتقارىلاتىن جۇمىستارعا جان-جاقتى توقتالدى.
دەپۋتاتتاردىڭ الدىندا ءسوز العان مەملەكەت باسشىسى ءۇش پارتيالى پارلامەنت جۇمىسىنىڭ الداعى ۋاقىتتا اتقاراتىن جۇمىستارىنا توقتالا كەلە, قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ ساياساتىنىڭ ساباقتاستىعىن ساقتاپ, جۇيەلى رەفورمالار جۇرگىزۋ جۇمىستارىن جوعارى دەڭگەيدە جالعاستىرۋدى تاپسىردى.
پرەزيدەنتتىڭ قازاقستان حالقىنا ارناعان جولداۋى ەل تۇرعىندارىنىڭ الەۋمەتتىك-تۇرمىستىق جاعدايىن ايتارلىقتاي ارتتىرۋعا ارنالعان ماڭىزدى قۇجات. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» رەتىندە ەلىمىزدىڭ قوعامدىق-ساياسي ومىرىنە سونى وزگەرىستەر ەنگىزىپ, ءتيىمدى ەكونوميكالىق رەفورمالار جاساۋعا ۋاقىتتىڭ ءوزى اكەلگەنىن جەتكىزدى. دەپۋتاتتىق كورپۋستىڭ الدىندا تۇرعان مىندەتتەرگە قاتىستى پرەزيدەنت زاڭ شىعارۋدا قارجى ءتارتىبىن نىعايتۋ, بيۋدجەت قارجىسىن «كولەڭكەگە» جانە «كولەڭكەلى ەكونوميكاعا» جىبەرۋگە باعىتتالعان زاڭنامالىق نورمالارعا بارىنشا زاڭنامالىق تۇرعىدا كەدەرگى جاساۋ سالاسىندا جۇمىس جۇرگىزۋ كەرەكتىگىنە توقتالدى.
قوعامنىڭ باستى قۇندىلىعى – ادام بولسا, بيلىك پەن قوعام اراسىندا ازاماتتاردىڭ بارلىق وتىنىشىنە نازار اۋداراتىن مەملەكەتتى قۇرۋ بۇگىنگى كۇننىڭ باستى ماقساتى ەكەنىن اتاپ ءوتتى. حالىقپەن كەرى بايلانىس ورناتۋ ولاردىڭ وتىنىشتەرىن سوزبۇيداعا سالماي, تەز, ءادىل شەشىلۋىنە مەملەكەتتىك ورگاندار باسشىلارىنىڭ نازارىن اۋداردى.
بۇعان قوسا, پرەزيدەنتىمىزدىڭ جولداۋدا قۇقىق قورعاۋ جۇيەسىن تولىق رەفورمالاۋ – اسا ماڭىزدى مىندەتتەردىڭ ءبىرى ەكەنىن اتاپ ءوتىپ, ەگەمەندى ەلدىڭ تەگەۋرىندى اسكەرىن قالىپتاستىرۋ مىندەتى تۇرعانىن جەتكىزدى.
ءسال ارتقا شەگىنىپ تاريحقا كوز جۇگىرتسەك, قازاقستاننىڭ قارۋلى كۇشتەرى دە ەلمەن بىرگە دامىپ, ەلمەن بىرگە زاماناۋي تالاپتارعا ساي جەتىلە تۇسكەنىن كوردىك. ەلباسىنىڭ جارلىعىمەن 1992 جىلى قۇرىلعان قارۋلى كۇشتەر العاشقى بەس جىلدا ءبىراز قيىنشىلىقتى باستان كەشىردى. اسكەري كادرلار جەتىسپەدى. ەسكى تەحنيكا, جانارماي تاپشىلىعى قولبايلاۋ بولدى. سونىڭ بارىنە ءتوزىپ, شىدامدىلىق كورسەتىپ, تۇيىقتان شىعا بىلدىك. قازاقستاننىڭ اسكەري تاريحىندا وسى العاشقى قالىپتاسۋ كەزەڭدەرى التىن ارىپتەرمەن جازۋلى تۇر.
قارۋلى كۇشتەردىڭ قالىپتاسۋى ەلىمىزدىڭ ءوز الدىنا دەربەس مەملەكەت بولىپ ەڭسە كوتەرۋىمەن قاتار جۇزەگە استى.تاۋەلسىزدىك جىلدارىندا ەلباسىنىڭ تىكەلەي قامقورلىعىنىڭ ارقاسىندا ەلىمىزدە وفيتسەرلەر دايارلاۋدىڭ كوپسالالى جۇيەسىنە باعىتتالعان اسكەري وقۋ ورىندارى قۇرىلدى. تاۋەلسىزدىگىن العانعا دەيىن ەلىمىزدە ەكى-اق اسكەري وقۋ ورنى بولعان. ولار – الماتىنىڭ جالپى جوعارى كوماندالىق جانە شەكارالىق ۋچيليششەلەرى اسكەري كادرلاردى وقىتتى.
ايتالىق, اقتوبەدە اۋە, الماتى راديوەلەكترونيكا بايلانىسى اسكەري ينستيتۋتتارىندا ماماندار دايىندالادى. ىشكى اسكەرلەر (ۇلتتىق ۇلان) كومانديرلەرى ون جەتى جىلدان بەرى پەتروپاۆلدا دايىندالادى. سونىمەن قاتار ششۋچەدە كىشى سەرجانتتاردى دايىندايتىن كادەت كورپۋسى جۇمىس ىستەيدى. ودان وزگە الماتىدا, شىمكەنتتە, قاراعاندىدا سالالىق مەكتەپتەرىمىز, نۇر-سۇلتان قالاسىندا «جاس ۇلان» مەكتەبى اسكەري وقۋ ورىندارىنا تۇسەتىن مامانداردى وقىتۋدا. بۇگىندە ەلوردامىزداعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتى اسكەري عىلىمنىڭ دامۋىنا نەگىز بولىپ وتىر دەپ تولىق ايتا الامىن. مۇنىڭ ءبارى بۇرىن ەلىمىزدە بولماعان ءبىلىم وردالارى. تاۋەلسىزدىكتىڭ ارقاسىندا قول جەتكەن وسىنداي كوپ يگىلىكتى ىستەردىڭ ءبىرى – اسكەري مامان دايىنداپ, ەلىمىزدىڭ قارۋلى كۇشتەرىن وتانىنا ادال, كاسىبي تۇرعىدان دايىنداعان وفيتسەرلەر ەلگە تونگەن كەز كەلگەن قاۋىپكە تويتارىس بەرە الادى دەپ سەنىم بىلدىرەمىن.
مىنە, دەپۋتات رەتىندە بۇيىرتسا, وسى جولدا ەڭبەك ەتپەكپىن. ەلباسىمىز: ء«بىز تاۋەلسىزدىككە اڭساپ, زارىعىپ جەتتىك. ەندى سول تاۋەلسىزدىكتىڭ قاسيەتتى بەلگىلەرىن دە ەرەكشە قادىرلەۋىمىز, قاستەرلەۋىمىز كەرەك. ءاربىر ازامات قازاقستاننىڭ تۋىن, ەلتاڭباسىن, ءانۇرانىن تۇمارداي قاسيەت تۇتۋى قاجەت.ەلدىگىمىزدىڭ سىنالاتىن ءبىر تۇسى وسى», دەگەن پىكىر ايتىپ ەدى.
اڭساپ جەتكەن ازاتتىعىمىزدىڭ بولاشاعى باياندى بولۋىن, پرەزيدەنتىمىزدىڭ العا قويعان ماقساتتارى مەن مىندەتتەرىن ىسكە اسىرۋ جولىندا بار كۇش-جىگەرىمىزدى جۇمىلدىرۋىمىز كەرەك. بۇل – ەل الدىنداعى دا باستى پارىزىمىز.
اباي تاسبولاتوۆ,
پارلامەنت ءماجىلىسىنىڭ دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى
