10 قىركۇيەك، 2019

ساقشىلار ىسىنە دە ساقتىق كەرەك

345 رەت كورسەتىلدى

الا تاياق جول-پاترۋلدىك پوليتسيا قىزمەتكەرىنىڭ قولىنا قايتا ءتيدى. ال كەزىندە وسى الا تاياقتى قانشاما ايتىس-تارتىسپەن الىپ تاستاعان ەدىك. بۇ­عان باستى سەبەپ جول-پاترۋلدىك پولي­تسيا قىزمەتىنىڭ ساپاسىنا كوڭىل تولماۋ­شىلىقتان باستالعانى بەلگىلى.

پوليتسيا قۇقىق قورعاۋ مىندەتىن اتقارادى دەسە دە، ولاردىڭ ءتۇرلى كەلەڭسىز قىلىقتارىنان حالىقتىڭ ولارعا دەگەن سەنىمى بىرتىندەپ كەمي ءتۇستى. ويتكەنى زاڭنىڭ ساقتالۋىنا جاۋاپ بەرەتىن ءتارتىپ ساقشىسىنىڭ ءوزى ونى ساقتاماۋى ءجيى كورىنىس بەرگەندىكتەن ولاردان كوپشىلىكتىڭ ادىلدىكتى تالاپ ەتۋگە دەگەن ءۇمىتى دە تىيىلدى. وسىدان كەيىن ازاماتتارعا قۇقىق بۇزدىڭ دەيتىن پوليتسيامەن بىتپەيتىن ايتىس-تارتىس ءورىس الدى. قازىر قاراساڭىز، كولىكتى توقتاتقان جول-پاترۋلدىك پوليتسياسىمەن داۋ­لاسپايتىن جان جوق. نەگە؟ سەبەبى جوعارىدا ايتقانىمىزداي، جول-پاترۋلدىك پوليتسيا قىزمەتكەرىنىڭ زاڭدى بەس ساۋساعىنداي بىلەتىندىگىنە جانە ونى دۇرىس، ورنىمەن قولدانا الاتىندىعىنا كۇمان كەلتىرىلەدى. سوندىقتان وسىنداي كەلەڭسىزدىكتەردى جويۋ نەمەسە بولدىرماۋ ماقساتىندا قانشا جەردەن شەتەلدىك جاڭالىقتاردى ەنگىزگەنمەن، جول-پاترۋلدىك پوليتسيا قىزمەتكەرلەرى زاڭدى مۇلتىكسىز ساقتايدى، ادال، ءادىل، شىنشىل، اقيقاتتى عانا ايتادى دەگەن سەنىمدى كوپشىلىككە قايتارماسا، ءىس بىتپەيدى.

ارينە وركەنيەتى وزىق ەلدەردىڭ جاڭالىقتارى جاقسى عوي. بىراق ولاردى باس-كوز دەمەي ەلگە الىپ كەلىپ، شاش ال دەسە، باس الاتىن ۇردىستە جۇرگىزبەۋ كەرەك. وركەنيەتى دامىعان وزىق ەلدەردە پوليتسيانىڭ ايتقانى بولادى. ويتكەنى جۇرت ولاردىڭ الدامايتىندىعىنا سەنەدى جانە پوليتسيا قىزمەتكەرىنىڭ ءوز ءىسىن، زاڭدى جاقسى بىلەتىندىگىنە كۇمان كەلتىرمەيدى. جەمقورلىققا سالىنادى دەپ ويلامايدى. سوندىقتان پوليتسيا قىزمەتكەرى ءبىر نارسە دامەتىپ تۇر دەگەن وي كەلمەيدى. ول تەك ءوز مىندەتىن، جۇمىسىن اتقارىپ تۇر. بىزدە پوليتسيا دۇرىس ىستەدى، ادىلدىككە ساي دۇرىس اكت تولتىردى دەگەندى ەستىمەيسىز. سوعان بايلانىستى ۇنەمى پوليتسيا ىسىنە ساي داۋ تۋىندايدى. بۇل پوليتسيا قىزمەتكەرىنىڭ زاڭدى ناقتى بىلەتىندىگىنە جانە ادالدىعىنا مۇلدە سەنىم قالماعاندىعى ما دەيسىز. قازىر قۇقىقتىق جاعىنان ساۋاتتى جاندار از ەمەس. ال پوليتسيا قىزمەتكەرلەرىنىڭ ءبارى بىردەي قۇقىقتىق ساۋاتتى دەپ نىق سەنىممەن ايتا المايمىز. سوندىقتان ءىىم ورگاندارىنا تۇبەگەيلى رەفورمانىڭ قاجەتتىگى ايتپاسا دا تۇسىنىكتى.

سەبەبى قولىندا بيلىگى بار ادامنىڭ كەيدە ادىلدىكتى بەلدەن باسىپ جىبەرەتىنى جاسىرىن ەمەس. ءوز وكتەمدىگىن جۇرگىزۋ ءۇشىن زاڭنىڭ ءوزىن ءيدىرىپ، ءوز مۇددەسىنە ساي رەتتەيتىندەر دە كەزدەسەدى. ال بۇل وكتەمدىكتىڭ استىندا تالاي ادامنىڭ شىندىعى جانشىلادى. الا تاياق تا وكتەمدىك ەتۋدىڭ ءبىر قۇرالى رەتىندە كورىنىس بەرمەسە دەيسىز. ەكىنشى جاعىنان الا تاياقسىز بىزدەگى جول-پاترۋلدىك پوليتسيانىڭ ءىسى جۇرمەيتىن بولدى. بارىنەن بۇرىن، كەزىندە وسى الا تاياقتىڭ جول قيىلىسىندا كولىك اعىنىن رەتتەۋ ءۇشىن جول پوليتسياسى قىزمەتكەرىنە اسا قاجەت ەكەنىن جۇرگىزۋشىلەردىڭ وزدەرى ايتقاندا، پوليتسيانىڭ ءوزى بوي بەرمەي قويىپ ەدى. ءبىز شەتەلدەگىدەي قولمەن-اق ءبارىن رەتتەيمىز دەگەن. جۇرگىزۋشىلەر كەشكى ىمىرتتا، تۇنگى كەزدە كوشە قيىلىسىندا تۇرعان كولىك ءجۇرىسىن رەتتەۋشى جول پوليتسيا قىزمەتكەرىنىڭ قولى قاي باعىتتى كورسەتىپ تۇرعانى انىق بايقالماي قالاتىنىن ايتىپ، الا تاياقتى وسى رەتتەۋ بارىسىنا عانا قايتارۋدى دا وتىنگەن. بىراق ولار ءبىز ءبارىن شەتەلدەگىدەي ىستەيمىز، سوندىقتان الا تاياق ەندى قايتپايدى دەپ كەسكەن. دەگەندەرى بولمادى. ال مۇنىڭ ءبارى پوليتسيانىڭ حالىق پىكىرىمەن ساناسپايتىندىعىن بىلدىرتسە كەرەك.

ەندى مىنە، ءىىم ءوزى الا تاياقتار (جەزل) تەك جول قوزعالىسىن رەتتەۋ ءۇشىن، اسىرەسە تاۋلىكتىڭ قاراڭعى ۋاقىتىندا جانە ناشار كورىنۋ جاعدايىندا كەرەك ەكەن دەيدى. سوندىقتان جول-كولىك وقيعالارى جانە جولداردا كەپتەلىس پايدا بولعاندا، باعدارشام ىستەمەي قالعاندا، كولىك قۇرالدارىنان قۇرالعان كولوننالاردى الىپ جۇرگەندە، تەرروريزمگە قارسى جەدەل شارانى جانە كۇزەتتىك ءىس-شارانى وتكىزۋدە، تابيعي جانە تەحنوگەندىك سيپاتتاعى توتەنشە جاعدايلار مەن ولاردىڭ سالدارىن بولدىرماۋ جانە جويۋ كەزىندە كولىك قۇرالدارىن باعىتتاۋ ماقساتىندا قولدانىلماق. «الا تاياقتى پايدالانۋ رەتتەۋشى بەرەتىن بەلگىلەردى جول قوزعالىسىنا قاتىسۋشىلاردىڭ قابىلداۋىن جاقسارتادى جانە پوليتسەيلەردىڭ قاۋىپسىزدىگىن ارتتىرادى» دەيدى. ءسويتىپ بۇگىندە جول ءجۇرىسىن رەتتەۋ سارى ءتۇستى كەۋدەشەلەر مەن ارناۋلى جارىق شاعىلىستىرعىشتى قولعاپتار كيىپ، الا تاياق ۇستاپ، ىسقىرىقپەن بەلگى بەرەتىن ساقشىلار ءىسىن جاڭالىق پەن جاقسىلىقتىڭ ءبىرى دەپ قابىلداۋىمىزعا تۋرا كەلەدى.

سوڭعى جاڭالىقتار

ەلىمىزدە كۇن قايتا سالقىندايدى

اۋا رايى • بۇگىن، 16:53

ەسىل وزەنىنە جاڭا كوپىر سالىنادى

ايماقتار • بۇگىن، 15:16

شىعىس قازاقستان «جاسىل» ايماقتا

ايماقتار • بۇگىن، 12:15

دوللار ارزانداپ، مۇناي قىمباتتادى

ەكونوميكا • بۇگىن، 11:36

قىركۇيەكتە حالىق ساناعى باستالادى

قازاقستان • بۇگىن، 09:47

ۇقساس جاڭالىقتار