***
تاۋلار نەگە الىپپىن دەپ ايتپايدى؟
جۇلدىز نەگە جارىقپىن دەپ ايتپايدى؟
ەمەن نەگە بەرىك ءدىڭىم دەمەيدى؟
گۇلدەر نەگە كورىكتىمىن دەمەيدى؟
بيىكتىگىن بۇلدامايدى كوك نەگە؟
قىزۋىمەن ماقتانبايدى وت نەگە؟
ەستەن شىقپاي جاراتقاننىڭ جارلىعى,
قۇل ەكەنىن سەزىنە مە بارلىعى؟
***
قاتەلىكسىز ادام سىندى كۇنəسىز,
ىزگى امال جاسار كەزدە بۇعاسىز.
جەر عۇمىرىن اياقتاۋعا تۇبىندە,
ءبىر توپاننىڭ كەلەتىنى ءشۇبəسىز.
بىرەۋ سوعان الىپ كەمە جاساۋدا,
بىرەۋ شاعىن قايىققا اعاش قاشاۋدا.
ال بىرەۋدە ەش دايىندىق جوق بىراق,
توپان كەلسە, جەر تابار ما قاشارعا؟!
گاۋھارتاس
عاشىقتىق بىتپەس داستان عوي,
جىرلايدى اقىن نار تەكتى.
جۇرەگىم مەنىڭ – اسپان عوي,
اسپانىم كەنەت جارق ەتتى.
كەۋدەمدە ولەڭ ءورىلىپ,
جاناردى ارباپ جاۋھار تاس.
الاتاۋ جاقتان كورىنىپ,
ساۋلەسىن شاشقان گاۋھارتاس.
جۇرەك-اسپانىم جارق ەتتى,
ساۋلەڭنەن سەنىڭ, گاۋھارتاس.
امالىم قۇرىپ, ءحال كەتتى,
اۋرەڭنەن سەنىڭ, گاۋھارتاس.
قۇلاق سال مەندىك تىلەككە,
ولەڭ بوپ لاۋلاپ جانايىن.
گاۋھارتاس, سەنى جۇرەككە,
ءتاج قىلىپ تاعىپ الايىن.
وزىنە مەنى شاقىردى,
الاۋدان ىستىق اسىعىم.
قيناما ەندى اقىندى,
سارىلا كۇتكەن, اسىلىم...
فۋتبول الاڭى
تۋعان جەردىڭ ساي-سالاسى, الابى,
وتكەن شاقتى ءجيى ەسىمە سالادى.
ءبىزدىڭ ءۇيدىڭ ارت جاعىندا, ورالدا,
بولا-تۇعىن ۇلكەن فۋتبول الاڭى.
قانشا ايدى, قانشا جىلدى زىرلاتىپ,
بالالىقتى الدىق سوندا ۇرلاتىپ.
دوپ تەبۋدەن شارشامايتىن ەدىك ءبىز,
كەتسە-داعى قاس قارايىپ, كۇن باتىپ.
سول الاڭعا مەن جىل سايىن كەلەمىن,
ساعىنىش پەن قيالعا ەرىك بەرەمىن.
ءبىر سارى بالا جۇرەدى ىلعي دوپ ويناپ,
بىراق ونى تەك مەن عانا كورەمىن.
جەتەلەسە, جالىنى مەن وتى العا,
التىن كەزدىك قاپ تۇبىندە جاتار ما؟
ءبىر كەزدەرى ويىن قۋعان سول بالا,
وي قۋىپ ءجۇر قازىر باسقا شاھاردا.
بالعىن شاقتىڭ ءاربىر ءساتى, كۇنى – باق,
ەسكە السام, جان-جۇرەگىم جىلىماق.
باعىتتالعان دوپ سەكىلدى قاقپاعا,
بالالىعىم ءوتىپ كەتتى زىمىراپ...
***
بالا كەزدە كورگەن ەمەن قايعى ويلاپ,
ەسكە الامىن ءجۇزىم بال-بۇل جايناي قاپ.
جۇگىرۋشى ەك كوكتەگى ۇشاق سوڭىنان,
ء«بىزدى وزىڭمەن الا كەت!» دەپ ايعايلاپ.
بالالىعىم قانشا قىر مەن بەل كەزدى,
اڭشى قۋعان اڭداي مەنەن ول بەزدى...
ەرجەتكەن سوڭ تالاي ۇشتىم ۇشاقپەن,
بىراق ءالى ساعىنامىن سول كەزدى.
كۋا قىلىپ جەر مەن جەتى قات كوكتى,
كەلمەسكە ەندى سول عاجايىپ شاق كەتتى.
ال ۇشاقتار وزىمەنەن ءبىزدى ەمەس,
ءبىزدىڭ قايران بالالىقتى اپ كەتتى...
جاتاقحانا
بولاشاقتان - بەيتانىس, ۇرپاعىمىز,
بوسات دەپ تۇر ورنىمدى,
ەستىدىڭ بە؟!
مۇقاعالي ماقاتاەۆ
سان مۇڭايتقان, قۋانتقان ءھام كۇلدىرگەن,
وزىڭە جات بولارىمدى كىم بىلگەن؟!
جاتاقحانام, ءتورت جىل تۇرعان تۇراعىم,
ساعان كەلىپ بوتەنسىرەپ تۇرمىن مەن.
جانىم اڭساپ وسىندا وتكەن كۇنىمدى,
تويماي ءىشتىم ساعىنىشتاي شىرىندى.
ءوزىڭ تۇرسىڭ, قايدا بىراق قاتارىم؟
ماعان تانىس جۇزدەر قايدا بۇرىنعى؟
ءبىزدىڭ جاستىق قاناتىن كەڭ جايعاندا,
ءجۇرۋشى ەدىك تويماي ساۋىق-سايرانعا.
بۇگىن باسقا بۋىن كەپتى, كۇي كەشتىم –
شىعىپ قالعان بالىقتايىن قايراڭعا.
قاس قاعىمدا قۇيىپ وتەر جاۋىنداي,
ۋاقىت جۇيرىك وتە شىعار داۋىلداي.
قاتارىم جوق,
جاتاقحانام كورىندىڭ –
ءوزى كوشىپ, جۇرتى قالعان اۋىلداي.
...سەزىنگەندە اۋىرلىعىن جۇگىمنىڭ,
اقىلىمنىڭ ايتقانىنا جىعىلدىم.
جاتاقحانام, ساعان كەلىپ بۇگىن مەن,
ۋاقىتتىڭ تىم بايانسىزىن ۇعىندىم.
