ادۆوكاتتار القاسى توراعاسىنىڭ ايتۋىنشا, ادۆوكاتتار كۇن سايىن ادامداردىڭ تاعدىرىمەن, ادىلدىككە دەگەن ۇمىتىمەن بەتپە-بەت كەلەدى.
«قاعازداعى زاڭ نورمالارىنىڭ ارتىندا ءاردايىم ادام ءومىرى, قۇقىعى مەن بوستاندىعى, اتاق-ابىرويى, وتباسى مەن بولاشاعى تۇرادى. جاڭا كونستيتۋتسيادا «زاڭ مەن ءتارتىپ» قاعيداسى ايقىندالدى. بۇل – ەلىمىزدىڭ بارلىق قۇقىقتىق جۇيەسىن قامتيتىن قۇندىلىقتاردى جيىندىعى. ارينە «زاڭ مەن ءتارتىپ» ۇعىمى قىسىمدى كۇشەيتۋ نەمەسە ەرەجەلەردى قاتاڭداتۋ دەگەن مىعىنا بەرمەيدى. بۇل – ەڭ اۋەلى, زاڭدى قۇرمەتتەۋ, زاڭ الدىنداعى تەڭدىك دەگەن ءسوز», دەدى ول.
مادي مىرزاعاراەۆ بۇل قاعيدانىڭ ازاماتتاردىڭ قۇقىقتارىن قورعاۋعا ناقتى كەپىلدىك بەرەتىنىن اتاپ ءوتتى. جاڭا نورمالارعا سايكەس, قۇقىق قورعاۋ ورگاندارى ادامدى ۇستاعان ساتتەن باستاپ ونىڭ قۇقىقتارىن تۇسىندىرۋگە مىندەتتى. ءار ازاماتتىڭ بىلىكتى زاڭ كومەگىن الۋ, قاماۋعا الىنعان ساتتەن باستاپ ءوزىن قورعاۋ, كىناسىزدىك پرەزۋمپتسياسى ساقتالۋى سياقتى نەگىزگى كەپىلدىكتەرى ايقىندالادى. سونىمەن قاتار ادامدى وزىنە نەمەسە جاقىندارىنا قارسى ايعاق بەرۋگە ماجبۇرلەۋگە جول بەرىلمەيدى.
سپيكەردىڭ سوزىنشە, بۇل – قاعيدالار ادۆوكاتتار ءۇشىن تەك دەكلاراتسيا ەمەس, زاڭ مەن زاڭسىزدىقتىڭ اراسىن ايقىندايتىن ناقتى ولشەم. ەگەر ازاماتتارعا قۇقىقتارى دەر كەزىندە ءتۇسىندىرىلىپ, قورعاۋشى ىسكە كەدەرگىسىز كىرىسسە, ال سوت كىناسىزدىك پرەزۋمپتسياسىن ساقتاسا, قۇقىقتىق جۇيە ءتيىمدى ءارى ءادىل جۇمىس ىستەي باستايدى. سول كەزدە ادىلدىككە دەگەن سەنىم دە ناقتى ىستەر ارقىلى نىعايادى.
جاڭا كونستيتۋتسيادا جەكە ءومىر مەن دەرەكتەردى, ونىڭ ىشىندە تسيفرلىق ورتاداعى قۇپيالىلىقتى قورعاۋ ماسەلەسىنە دە ەرەكشە كوڭىل بولىنگەنى ايتىلدى. بۇل – قازىرگى تسيفرلىق قوعام ءۇشىن اسا وزەكتى باعىتتاردىڭ ءبىرى.
ەسكە سالا كەتەيىك, بۇگىن استانادا كونستيتۋتسيالىق رەفورمانى قولداۋ ماقساتىندا «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» دەپ اتالاتىن جالپىۇلتتىق كواليتسياسى قۇرىلدى. ونىڭ قۇرامىنا ەلىمىزدەگى ساياسي پارتيالار, قوعامدىق ۇيىمدار, دەپۋتاتتار, زيالى قاۋىم وكىلدەرى, جاستار بىرلەستىكتەرى, كاسىپوداق ۇيىمدارى كىردى.
جاڭا كونستيتۋتسيا جوباسى بويىنشا رەفەرەندۋمعا قانشا قاراجات جۇمسالادى؟
